Китоб билан юксалган аёл — миллат келажаги

Инсоният тамаддуни тарихига назар ташлар эканмиз, жамиятнинг маънавий қиёфасини белгиловчи энг муҳим мезонлардан бири бу аёлнинг илм-маърифатга бўлган интилиши эканига гувоҳ бўламиз. “Китоб” ва “Аёл” тушунчалари бир-бирига шу қадар уйғун ва пайвандки, уларни айро ҳолда тасаввур қилиш қийин. Билимли аёл нафақат ўз ҳаётини, балки бутун бир жамиятнинг келажагини нурафшон этишга қодир қудратли кучдир. Амударё тумани Ахборот-кутубхона марказида ташкил этилган «Китоб билан юксалган аёл» номли давра суҳбатининг мазмун-моҳиятида ҳам «Бир эркак ўқиса – бир инсон билимли бўлади, бир аёл ўқиса – бутун миллат билимли бўлади» деган ҳаётий ҳикмат мужассам бўлди.

Ахборот-кутубхона марказида бўлиб ўтган мазкур тадбирнинг асосий диққат марказида болалар китобхонлигини ривожлантиришда аёлнинг ва оиланинг тутган ўрни мавзуси бўлди. Давра суҳбатининг меҳмони – Амударё туман ҳокими ўринбосари, Оила ва хотин-қизлар бўлими бошлиғи Гўзал Сабирова ўз нутқида бу борадаги муҳим жиҳатларга тўхталиб ўтди. Таъкидландики, болани китобга дўст қилиш – унга дунёни англаш калитини бериш билан баробардир. Оила бу илк таълим даргоҳи, ота-она эса фарзанд учун ҳаётдаги энг биринчи ва энг муҳим муаллимлардир. Агар биз бугун фарзандларимиз қалбида китобга нисбатан самимий муҳаббат уйғота олсак, эртага билимли, юксак маънавиятли ва чин ватанпарвар авлодни тарбиялаган бўламиз.

Тадбирда маҳаллаларнинг фаол онахонлари ва ёш китобхонларнинг иштирок этиши авлодлар ўртасидаги маънавий кўприкнинг янада мустаҳкамланишига хизмат қилди. Онахонларнинг ҳаётий тажрибалари ва ёшларнинг билимга бўлган иштиёқи давра суҳбатига ўзгача файз бағишлади. Мулоқот давомида ҳар бир иштирокчи китобхонлик маданиятини ошириш бўйича ўз фикр-мулоҳазаларини ўртоқлашди. Ёшларни китоб мутолаасига чорловчи самимий сўзлар, бадиий асарларнинг инсон руҳиятига таъсири ҳақидаги ҳаётий мисоллар барчада катта таассурот қолдирди. Бу каби тадбирлар жамиятимизда китобхонлик муҳитини янада яхшилашга, аёлларнинг ижтимоий-сиёсий фаоллигини ошириш билан бирга, уларнинг маънавий оламини юксалтиришга хизмат қилади.

Бугунги тезкор замон аёлдан нафақат уй ишлари ёки фарзанд тарбиясини, балки кенг дунёқараш ва интеллектуал салоҳиятни ҳам талаб этмоқда. Давра суҳбати давомида айнан электрон ва босма китобларнинг уйғунлиги, аёлларнинг замонавий илм-фан ютуқларидан хабардор бўлиши жамиятдаги ижтимоий барқарорликнинг асосий омили экани эътироф этилди. Мутолаа қиладиган аёл – бу ҳар қандай мураккаб вазиятда тўғри қарор қабул қила оладиган, оиладаги маънавий муҳитни соғлом сақлашга қодир бўлган кучли шахс бўлиши қайд қилинди.

Шунингдек, учрашувда китобхонлик маданиятини оилада шакллантиришнинг амалий усуллари ҳақида ҳам қизғин фикр алмашилди. Ота-онанинг фарзанд кўз ўнгида китоб ўқиши – бу ҳар қандай насиҳатдан кўра таъсирлироқ тарбия усули экани ҳаётий мисоллар билан тушунтириб берилди. Маҳалла фаоллари ва онахонлар ўз нутқларида хонадонларда шахсий кутубхоналарни ташкил этиш, болаларга совға сифатида китоб бериш анъанасини қайта тиклаш зарурлигини таъкидладилар. Бу каби жонли мулоқотлар аёлларнинг нафақат билим олишига, балки жамиятда ўз ўрнини топиши ва келажак авлод олдидаги масъулиятини янада чуқурроқ ҳис қилишига хизмат қилиши шубҳасиздир.

Хулоса ўрнида айтиш мумкинки, китоб билан юксалган аёл – бу бахтли ва фаровон жамият демакдир. Амударё туманида ўтказилган ушбу маънавий-маърифий учрашув яна бир бор исботладики, китоб ва маърифат бор жойда доимо юксалиш, тараққиёт ва файз-барака бўлади. Зеро, китоб саҳифаларига муҳрланган билимлар асрлар оша инсониятга тўғри йўлни кўрсатиб келган ва бундан кейин ҳам жамиятимизнинг маънавий устуни бўлиб қолаверади. Шундай экан, фарзандларимизга нафақат моддий бойлик, балки энг аввало китобга бўлган меҳр ва юксак маънавиятни мерос қилиб қолдиришимиз лозим.