НАВОИЙ ДАҲОСИГА ЭҲТИРОМ КЎРСАТИЛДИ
Айни кунларда мамлакатимизнинг барча ўқув муассасаларида, ижодий жамоаларда, ҳар бир маҳалла ва хонадонда ҳазрат Навоий таваллудининг 580 йиллиги муносабати билан кўпмиллатли халқимиз учун деярли ёд бўлиб кетган шоир ғазаллари, рубоийлари қайта-қайта жарангламоқда.
Туманимиздаги 45-сонли умумтаълим мактабида ҳам “Ғазал мулкининг султони” мавзусида ўтказилган адабий-мусиқий тадбирда улуғ бобокалонимиз асарларининг дунё халқлари ҳаётида тутган ўрни, халқимиз маънавиятини юксалтиришдаги беқиёс аҳамияти ҳақида ўқувчи-ёшлар фахрланиб сўз юритдилар.
Тадбирни мактаб директори Гулойим Қаландарова очди ва Алишер Навоийнинг буюк маънавий мероси ҳамда асарларининг ёшлар таълим-тарбиясидаги аҳамияти ҳақида батафсил тўхталди. Айниқса, ёшлар камолоти, ота-онанинг фарзанд олдидаги бурч ва вазифалари, фарзанднинг ота-онага эҳтироми, масъулияти, шоирнинг “Ҳайрат ул-аброр” асарининг бадиий қиммати хусусида гапириб берди. Мактабнинг маънавий-маърифий ишлар бўйича директор ўринбосари Соатбой Маткаримов ҳам сўзга чиқиб, Навоий асарларининг ёшлар тарбиясидаги аҳамияти ҳақида қисқача тўхталди.
Шундан сўнг, мактабнинг 9-10-синфлар ўқувчилари шоир ғазалларини ифодали ўқиб бердилар ҳамда рубоий ва туюқларининг мазмун-моҳияти хусусида бир-бирларига саволлар беришиб, Навоий асарларидан олган таассуротлари ҳақида тўлқинланиб сўзладилар.
Тадбирнинг мусиқий қисмида ўқувчилар шоирнинг “Келмади”, “Мубтало” ғазаллари асосида халқ ҳофизлари томонидан куйланган ашулаларга рақсга тушдилар. Ўқувчиларнинг ўзлари ҳам шоир ғазалларини куйга солиб ижро этишди.
Алишер Навоий асарлари асосида тайёрланган кичик саҳна кўринишлари орқали шоирнинг юрт ободончилиги, халқлар тинчлиги, ёшлар таълим-тарбияси хусусида фидойилик билан қилган бунёдкорлик ишлари, айниқса, мадраса талабаларига кўрсатган беғараз моддий ёрдамлари, мамлакатни обод қилиш, ижод аҳлини қўллаб-қувватлаш борасида амалга оширган катта бунёдкорлик ишлари, саховатпешалиги намойиш этилди.
Ушбу тадбирни мактабнинг она тили ва адабиёти фани ўқитувчилари Шодия Тожибоева ва Эътибор Шукуруллаевалар 9-10-синфлар ўқувчилари билан ҳамкорликда тайёрлашди. Тадбир катта маҳорат ва изланувчанлик маҳсули сифатида барчага манзур бўлди. Навоий асарлари, унинг ёрқин ва ибратли ҳаёти, давлат ва жамоат арбоби сифатидаги фаолиятини акс эттирувчи саҳна кўринишлари, саҳна безаклари иштирокчиларга маънавий руҳ бағишлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
