NAVOIY DAHOSIGA EHTIROM KOʻRSATILDI

Ayni kunlarda mamlakatimizning barcha oʻquv muassasalarida, ijodiy jamoalarda, har bir mahalla va xonadonda hazrat Navoiy tavalludining 580 yilligi munosabati bilan koʻpmillatli xalqimiz uchun deyarli yod boʻlib ketgan shoir gʻazallari, ruboiylari qayta-qayta jaranglamoqda.

Tumanimizdagi 45-sonli umumtaʼlim maktabida ham “Gʻazal mulkining sultoni” mavzusida oʻtkazilgan adabiy-musiqiy tadbirda ulugʻ bobokalonimiz asarlarining dunyo xalqlari hayotida tutgan oʻrni, xalqimiz maʼnaviyatini yuksaltirishdagi beqiyos ahamiyati haqida oʻquvchi-yoshlar faxrlanib soʻz yuritdilar.

Tadbirni maktab direktori Guloyim Qalandarova ochdi va Alisher Navoiyning buyuk maʼnaviy merosi hamda asarlarining yoshlar taʼlim-tarbiyasidagi ahamiyati haqida batafsil toʻxtaldi. Ayniqsa, yoshlar kamoloti, ota-onaning  farzand oldidagi burch va vazifalari, farzandning ota-onaga ehtiromi, masʼuliyati, shoirning “Hayrat ul-abror” asarining badiiy qimmati xususida gapirib berdi. Maktabning maʼnaviy-maʼrifiy ishlar boʻyicha direktor oʻrinbosari Soatboy Matkarimov ham soʻzga chiqib, Navoiy asarlarining yoshlar tarbiyasidagi ahamiyati haqida qisqacha toʻxtaldi.

Shundan soʻng, maktabning 9-10-sinflar oʻquvchilari shoir gʻazallarini ifodali oʻqib berdilar hamda ruboiy va tuyuqlarining mazmun-mohiyati xususida bir-birlariga savollar berishib, Navoiy asarlaridan olgan taassurotlari haqida toʻlqinlanib soʻzladilar.

Tadbirning musiqiy qismida oʻquvchilar shoirning “Kelmadi”, “Mubtalo” gʻazallari asosida xalq hofizlari tomonidan kuylangan ashulalarga raqsga tushdilar. Oʻquvchilarning oʻzlari ham shoir gʻazallarini kuyga solib ijro etishdi.

Alisher Navoiy asarlari asosida tayyorlangan kichik sahna koʻrinishlari orqali shoirning yurt obodonchiligi, xalqlar tinchligi, yoshlar taʼlim-tarbiyasi xususida fidoyilik bilan qilgan bunyodkorlik ishlari, ayniqsa, madrasa talabalariga koʻrsatgan begʻaraz moddiy yordamlari, mamlakatni obod qilish, ijod ahlini qoʻllab-quvvatlash borasida amalga oshirgan katta bunyodkorlik ishlari, saxovatpeshaligi namoyish etildi.

Ushbu tadbirni maktabning ona tili va adabiyoti fani oʻqituvchilari Shodiya Tojiboyeva va Eʼtibor Shukurullayevalar 9-10-sinflar oʻquvchilari bilan hamkorlikda tayyorlashdi. Tadbir katta mahorat va izlanuvchanlik mahsuli sifatida barchaga manzur boʻldi. Navoiy asarlari, uning yorqin va ibratli hayoti, davlat va jamoat arbobi sifatidagi faoliyatini aks ettiruvchi sahna koʻrinishlari, sahna bezaklari ishtirokchilarga maʼnaviy ruh bagʻishladi.

Robiya YOʻLDOShEVA.