Mardlikka ehtirom, xotiraga sadoqat: Amudaryoda Afgʻon urushi faxriylariga yuksak ehtirom koʻrsatildi

1989-yil 15-fevral — Afgʻoniston hududidan sobiq Sovet Ittifoqi qoʻshinlari toʻliq olib chiqilgan kun sifatida tarixda muhrlangan. Ushbu sana yillar oʻtgan sari jasorat va fidoyilik timsoliga, jang-u jadallarda qatnashgan minglab yurtdoshlarimiz xotirasini yod etish, omon qaytgan faxriylarimizga hurmat bajo keltirish kuniga aylandi.

Oʻn yilga yaqin vaqt mobaynida davom etgan harbiy harakatlar koʻplab oilalar taqdiriga oʻz taʼsirini oʻtkazdi. Respublikamizdan 3580 nafar harbiy xizmatchi ushbu urushda ishtirok etib, oʻz burchini ado etdi. Bugun esa ularning jasorati va sabr-matonati tinch va osoyishta hayotimizning qadriga yetish, yosh avlodni vatanparvarlik ruhida tarbiyalashda muhim ibrat maktabi boʻlib xizmat qilmoqda.

Joriy yilda sobiq ittifoq qoʻshinlari Afgʻonistondan olib chiqilganining 37-yilligi munosabati bilan Amudaryo tumanida ham keng koʻlamli tadbirlar tashkil etildi. Sana arafasida tuman Xotira maydonida afgʻon urushi faxriylari xotirasiga bagʻishlab haykal muqaddas oʻrnatilgani tadbirning maʼnaviy ahamiyatini yanada oshirdi. Ushbu maskanda oʻtkazilgan marosimda jangchi-faxriylar, nuroniylar, yoshlar hamda keng jamoatchilik vakillari ishtirok etdi.

Tuman hokimligi tashabbusi bilan tashkil etilgan tadbirda hokimning yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, tuman Mudofaa ishlari boʻlimi boshligʻi Shuhrat Mamatov, Oʻzbekiston “Veteran” jangchi-faxriy va nogironlar birlashmasining respublika va tuman miqyosidagi rahbarlari hamda aʼzolari, bir guruh baynalmilal jangchilar qatnashdi.

Tadbirni ochib bergan tuman hokimi oʻrinbosari Nodirbek Kamolov oʻz nutqida 15-fevral sanasi faxriylar uchun chin maʼnodagi bayram ekanini alohida taʼkidladi. U murakkab sharoitlarda jang-u jadallarda qatnashib, Vatanga omon qaytgan yurtdoshlarimizning jasorati, matonati va sadoqati bugungi tinch hayotimizning qadriga yetishda muhim oʻrin tutishini qayd etdi.

Soʻzga chiqqanlar yurtimizda jangchi-faxriylarni har tomonlama qoʻllab-quvvatlash, ularning munosib hayot kechirishi, salomatligini tiklashi va ijtimoiy himoyasini taʼminlash borasida amalga oshirilayotgan ishlar haqida toʻxtaldi. Shu bilan birga, Afgʻon urushi saboqlari bugungi yosh avlod uchun ibrat maktabi ekani alohida qayd etildi.

Tadbir davomida amudaryolik afgʻon urushi qatnashchilari ishtirokida Xotira maydonidagi haykal poyiga gulchambarlar qoʻyildi. Baynalmilal jangchilar Afgʻonistondagi urush harakatlarida halok boʻlgan quroldoshlari xotirasiga hurmat bajo keltirib, ularning yorqin xotirasini yod etdilar. Yurtimizda tinchlik va osoyishtalik mangu boʻlishi tilab, duoga qoʻl ochildi.

Tantanalar Mangʻit shahridagi “Diamond” restoranida davom ettirildi. Bu yerda faxriylar uchun bayram dasturxoni yozilib, ularning xizmatlari eʼtirof etildi. Sana munosabati bilan tashakkurnomalar va esdalik sovgʻalari topshirildi. Faxriylar hukumatimiz tomonidan koʻrsatilayotgan eʼtibor va gʻamxoʻrlik uchun minnatdorlik bildirdilar.

Bayram tadbirida tuman Madaniyat boʻlimi sanʼatkorlari tomonidan kontsert dasturi namoyish etildi. Vatan, ona, tinchlik va shukronalikni madh etuvchi kuy-qoʻshiqlar tadbirga koʻtarinki ruh bagʻishladi.

Charos Arslonova, tuman hokimligining Axborot xizmati rahbari.