“Шиша ичидаги айрон, ичингга кирса шайтон”...

Инсон ўзига берилган ҳаёт деб аталмиш бебаҳо неъматнинг қадрига ҳамиша ҳам етавермайди. Бошингга кулфат ёки қийинчилик тушса-ю уни енгиб ўтишда тўғри йўлдан кўра шайтон васвасаси тўрига тушиб, ароқга рўжу қўйсанг бу икки карра кулфат, фожиа.

2020 йилнинг 2 май куни Тахиатош тумани “Дўстлик” маҳалласидаги 4 нафар қўшни жўранинг маишатбозлиги жиноят билан якун топади. Аниқроқ, Тахиятош тумани “Дўстлик” маҳалласида истиқомат қилувчи 1967 йилда туғилган Б.К қўшниси Т.Сга бир кун олдин маош олиб байрам қилгани, бугун ҳам уни давом эттириш таклифини билдиради. Ёнига яна иккита қўшниси Ж.С ҳамда М.Б ларни ҳам таклиф қилиб, тўрттала жўра дастлаб 2 шиша, яна озроқ етмай бир шиша ароқ олиб, маишатни қиздиради.

Ўтган кунларни эслаб, яхши хотиралар ҳақида гурунглашиб ўтирган “ахил қўшни”ларнинг  кайфи ҳам ошиб, ўз нуқтасига етиб бўлганди. Шунда кутилмаганда ароқ таъсирида кайфи ошиб, ўзининг босар тусарини билмай қолган Б.К ошхона пичоғи билан қўшниси Т.С га ташланиб, бўғзидан олади. Атрофидаги бўлаётган воқеаларни ҳали тўлиқ англаб улгурмаган   ширакайф Ж.С ҳамда М.Б  лар Б.Книнг уларга ҳам тажовуз қилишини кутмаганди. Б.К қўлидаги “совуқ қурол” билан бирданига Т.С, Ж.С ва М.Бларга ҳам ташланиб қолади. Жон талвасасидаги Т.С нинг ҳолатини кўриб “шок”га тушган  Ж.С ва  М.Б ўзларига пичоқ билан тажовуз қилаётган Б.К га қандай қаршилик кўрсатишни, ёки ёнидаги ҳаёт учун курашаётган Т.С га ёрдам беришни билмай аросатда қолади. Орадан кўп вақт ўтмасдан 3 нафар қўшнисига пичоқ билан тажовуз қилган Б.К уйидан чиқиб кетади. Бўлган воқеани англаб етганда эса қўшниси Т.С бу оламни тарк этган, яна икки нафар қўшниси оғир тан жароҳатини олган эди.

Ушбу ҳолат юзасидан жиноят иши қўзғатилиб,  Қорақалпоғистон Республикаси судининг ҳукми билан  фуқаро Б.Кга Ўзбекистон Республикаси Жиноят кодексининг тегишли моддалари билан   озодликдан маҳрум қилиш жазоси тайинланди.

Шуни айтса керак, “шиша ичидаги айрон, ичингга кирса шайтон”.

Асқар Бекманов Қорақалпоғистон Республикаси  суди судьяси.