МАСТ БЎЛДИ ВА... ЎЗ ОИЛАСИ РИЗҚИНИ ҚИРҚДИ
Йўл қоидаси – умр фойдаси. Чунки оддий йўловчими, ҳаваскор ҳайдовчи ёки малакали ҳайдовчими, ким бўлишидан қатъий назар, йўл ҳаракати қоидаларига қатъий амал қилгандагина бахтсиз воқеаларнинг олди олинади, йўл-транспорт ҳодисалари содир этилишига барҳам берилади.
Лекин минг афсуски, инсон ҳаёти учун муҳим аҳамиятга эга бўлган йўл ҳаракати қоидаларига амал қилмаслик оқибатида мамлакатимизда кунига ўнлаб йўл-транспорт ҳодисалари содир этилиб, кўплаб инсонлар ҳаётдан бевақт кўз юмишмоқда. Кўпинча бундай ҳолатларга спиртли ичимлик истеъмол қилиш, тезликни ошириш сабаб бўлаётгани сир эмас.
Туманимиз маҳаллаларидан бирида яшовчи фуқаро Аслиддин Раҳимов (исм-шарифи ўзгартирилди) ўзганинг номидаги енгил автомобилни “Йўл ҳаракати қоидалари”нинг 12-бандида белгиланган автомобилни мастлик ҳолатда бошқармаслик ҳақидаги талабни бузган ҳолда рулга ўтиргани ва тезликни оширгани учун йўл ҳаракати хавфсизлиги ходимлари томонидан тўхтатилди. Агар у тўхтатилмаганида яна бир мудҳиш йўл-транспорт ҳодисаси содир этилиши табиий эди.
Аслиддин Раҳимов бу ҳаракатлари билан Ўзбекистон Республикаси МЖтКнинг тегишли моддаларига кўра, маъмурий жавобгарликка тортилди ва Амударё туман Жиноят ишлари бўйича суди томонидан БҲМнинг 25 баравари миқдорида, яъни, 6 млн. 125 минг сўм жарима жазосига ҳукм этилди. Унинг мастлик оқибатида содир этган бу ҳуқуқбузарлиги оиласига қимматга тушди. Ўз оила аъзоларини оз эмас, камида бир ойлик ризқдан айирди.
С.ДАВЛЕТМУРОДОВ, Жиноят ишлари бўйича Амударё туман суди раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
