ҲАРБИЙ ХИЗМАТЧИ ХОТИРАСИГА БАҒИШЛАНГАН ТАДБИР БЎЛИБ ЎТДИ

Мамлакатимизда 9 май – Хотира ва қадрлаш куни умумхалқ байрами сифатида кенг нишонланади. Боиси инсон хотира билан тирик, қадр билан улуғ. Бугунгидай тинч, осойишта ва фаровон кунларимиз учун курашганларнинг жасоратини, фидойилигини, хайрли ишларини ёдга олмоқ, эъзозламоқ миллий қадриятимизга айланди.

Иккинчи жаҳон урушида, мамлакатимиз мустақиллигини ҳимоя қилишда ҳалок бўлган юртдошларимиз хотирасини ёд этиш, ёш авлодни уларнинг эзгу хизматлари билан таништириб бориш ҳам савобли иш. Чунки хотира – инсоннинг инсонлигини англатувчи, уни ўтмиш ва истиқбол билан боғлаб турувчи илоҳий риштадир. Шунинг учун ҳам мамлакатимизнинг барча ҳудудларида 9 май – Хотира ва қадрлаш куни муносабати билан кўпгина хотира тадбирлари, меҳнат фахрийлари билан учрашувлар ўтказилди.

Яқинда туманимиздаги 22-сонли мактабда ушбу мактабда таълим-тарбия олган собиқ битирувчи, Ўзбекистон Республикаси Қуролли кучлари сафида неча йиллар самарали хизмат қилган ва хизмати чоғида ҳалок бўлган капитан Жумамурод Аҳмедовнинг хотирасига бағишлаб ўтказилган ҳарбий спорт фестивали ва хотира турнири  ҳам шуларнинг биридир.

Ушбу тадбир туман Халқ  таълими, Мудофаа ишлари бўлимлари, 22-мактаб ўқитувчилар жамоаси ва Мудофаага кўмаклашувчи “Ватанпарвар” ташкилоти туман бўлими ҳамкорлигида ташкиллаштирилди.

Тадбирни 22-сонли мактаб директори Азимжон Бекберганов очди ва Жумамурод Аҳмедовнинг ёрқин хотираси ҳақида гапирди. Ундан барча ёшлар ватанпарварлик, жасурлик, ҳарбий бурчига, Ватанига садоқатни ўрганса, ибрат олса, арзийди, дея таъкидлади.

Ҳарбий спорт фестивалида туман Мудофаа ишлари бўлими ходими Музаффар Мадреимов, “Ватанпарвар” ташкилоти туман бўлими ходими Азамат Қозоқбоев, Жумамурод Аҳмедовнинг укаси, 22-сонли мактаб ёшларни чақириққача тайёрлаш фани  ўқитувчиси Алишер Аҳмедовлар сўзга чиқиб, Жумамурод Аҳмедов ҳақида гапирдилар.

Шундан кейин ҳарбий спорт фестивали ва хотира турнирига старт берилди. Унда 22-, 55-, 28- ва 59-мактабларнинг ёш спортчи ўқувчилари ўзаро беллашдилар. Беллашув ўғил ва қизлар орасида ҳарбий эстафета, автоматни тез ёйиш ва йиғиш, ярадорларга биринчи тиббий ёрдам кўрсатиш, пневматик милтиқдан ўқ отиш, турникда тортилиш, арқон тортишиш, югуриш бўйича ўтказилди.

22-сонли мактаб ўқувчилари ижросида юртимизнинг содиқ ўғлонлари жасоратини мадҳ  этувчи шеърлар ижро этилгач, 5 “А” синф ўқувчилари рус халқининг машҳур “Катюша” қўшиғига рақсга тушдилар.

Тадбир давомида ҳарбий спорт фестивали, хотира турнири шартларини аъло даражада бажарган ўқувчилар маҳоратини ҳакамлар ҳайъати аъзолари одилона баҳолаб бордилар. Натижаларга кўра ғолиб жамоалар ва қатнашчилар тадбир ташкилотчиларидан бири  “Ватанпарвар” ташкилоти туман бўлими ва ҳарбий хизмати чоғида ҳалок бўлган Жумамурод Аҳмедовнинг укаси Алишер Аҳмедов томонидан рағбатлантирилди.

О.РАЖАБОВА.