HARBIY XIZMATChI XOTIRASIGA BAGʻIShLANGAN TADBIR BOʻLIB OʻTDI

Mamlakatimizda 9-may – Xotira va qadrlash kuni umumxalq bayrami sifatida keng nishonlanadi. Boisi inson xotira bilan tirik, qadr bilan ulugʻ. Bugungiday tinch, osoyishta va farovon kunlarimiz uchun kurashganlarning jasoratini, fidoyiligini, xayrli ishlarini yodga olmoq, eʼzozlamoq milliy qadriyatimizga aylandi.

Ikkinchi jahon urushida, mamlakatimiz mustaqilligini himoya qilishda halok boʻlgan yurtdoshlarimiz xotirasini yod etish, yosh avlodni ularning ezgu xizmatlari bilan tanishtirib borish ham savobli ish. Chunki xotira – insonning insonligini anglatuvchi, uni oʻtmish va istiqbol bilan bogʻlab turuvchi ilohiy rishtadir. Shuning uchun ham mamlakatimizning barcha hududlarida 9-may – Xotira va qadrlash kuni munosabati bilan koʻpgina xotira tadbirlari, mehnat faxriylari bilan uchrashuvlar oʻtkazildi.

Yaqinda tumanimizdagi 22-sonli maktabda ushbu maktabda taʼlim-tarbiya olgan sobiq bitiruvchi, Oʻzbekiston Respublikasi Qurolli kuchlari safida necha yillar samarali xizmat qilgan va xizmati chogʻida halok boʻlgan kapitan Jumamurod Ahmedovning xotirasiga bagʻishlab oʻtkazilgan harbiy sport festivali va xotira turniri  ham shularning biridir.

Ushbu tadbir tuman Xalq  taʼlimi, Mudofaa ishlari boʻlimlari, 22-maktab oʻqituvchilar jamoasi va Mudofaaga koʻmaklashuvchi “Vatanparvar” tashkiloti tuman boʻlimi hamkorligida tashkillashtirildi.

Tadbirni 22-sonli maktab direktori Azimjon Bekberganov ochdi va Jumamurod Ahmedovning yorqin xotirasi haqida gapirdi. Undan barcha yoshlar vatanparvarlik, jasurlik, harbiy burchiga, Vataniga sadoqatni oʻrgansa, ibrat olsa, arziydi, deya taʼkidladi.

Harbiy sport festivalida tuman Mudofaa ishlari boʻlimi xodimi Muzaffar Madreimov, “Vatanparvar” tashkiloti tuman boʻlimi xodimi Azamat Qozoqboyev, Jumamurod Ahmedovning ukasi, 22-sonli maktab yoshlarni chaqiriqqacha tayyorlash fani  oʻqituvchisi Alisher Ahmedovlar soʻzga chiqib, Jumamurod Ahmedov haqida gapirdilar.

Shundan keyin harbiy sport festivali va xotira turniriga start berildi. Unda 22-, 55-, 28- va 59-maktablarning yosh sportchi oʻquvchilari oʻzaro bellashdilar. Bellashuv oʻgʻil va qizlar orasida harbiy estafeta, avtomatni tez yoyish va yigʻish, yaradorlarga birinchi tibbiy yordam koʻrsatish, pnevmatik miltiqdan oʻq otish, turnikda tortilish, arqon tortishish, yugurish boʻyicha oʻtkazildi.

22-sonli maktab oʻquvchilari ijrosida yurtimizning sodiq oʻgʻlonlari jasoratini madh  etuvchi sheʼrlar ijro etilgach, 5 “A” sinf oʻquvchilari rus xalqining mashhur “Katyusha” qoʻshigʻiga raqsga tushdilar.

Tadbir davomida harbiy sport festivali, xotira turniri shartlarini aʼlo darajada bajargan oʻquvchilar mahoratini hakamlar hayʼati aʼzolari odilona baholab bordilar. Natijalarga koʻra gʻolib jamoalar va qatnashchilar tadbir tashkilotchilaridan biri  “Vatanparvar” tashkiloti tuman boʻlimi va harbiy xizmati chogʻida halok boʻlgan Jumamurod Ahmedovning ukasi Alisher Ahmedov tomonidan ragʻbatlantirildi.

O.RAJABOVA.