ЎҒИРЛИКНИНГ СЎНГИ – ХОРЛИК

Оила – муқаддас қўрғон. Унда авлодлар давомчиси – фарзандлар дунёга келиб, илк  тарбия олишади. Ота-онанинг то фарзанд туғилганидан бошлаб, унинг комил инсон бўлиб вояга етиши, эл-юртига хизмат қиладиган, қайишадиган инсон бўлиб шаклланиши учун қилган саъй-ҳаракатлари албатта, бемасар кетмайди.

Афсуски, бугунгидай дориломон замонда тўкин-сочин ҳаётни қадрлаш, турмушини ўзи янада фаровон қилиш учун ҳалол меҳнат қилиш ўрнига бировнинг ҳақига кўз олайтирадиган яъни етарли тарбия берилмаган ёшлар ҳам орамизда учраб туради.

Туманимизнинг чекка овулларидан бирида истиқомат қилувчи Бахтбек (исм ўзгартирилди) ҳам шундайлар тоифасидан.

Тоғни урса, талқон қиладиган айни йигирма ёшга кириб, куч-қувватга тўлган Бахтбек ўз келажагини ўзи ҳавойи нафс учун қурбон қилди. Оила аъзоларининг бирон касб ё ҳунарнинг бошини тут, ризқингни ҳалол ишлаб топ, дея тергамаганликлари унга жуда қўл келди.

Гап шундаки, у ўтган йилнинг ноябрида овулидаги пахтадан бўшаган далада боғлоғлик турган молларга қараб “шулардан бирини ўғирлаб сотсам, биров билармиди”, деган ўй келди кўнглига. Молларнинг кечаси ҳам далада қолиши унинг хаёлидаги режасини амалга оширишига жуда  қўл келди. Шундай қилди ҳам. Ярим кечаси эл оёғи тинганида далада “тунаб” ўтган моллардан ўртача бозор баҳоси 7 млн. 500 минг сўмлик келадиган бир ғунажинни етаклаб кетди ва овлоқ жойга олиб бориб боғлади. Бу билан чекланмай, орадан озроқ вақт ўтказиб, бир овулдошининг молхонаси чердагида боғлик турган ўртача бозор баҳоси 5 млн. 500 минг сўмлик ғунажинни ярим кечаси ўғирлаб кетди ва мол савдоси билан шуғулланувчи танишларига сотиб юборди.

Бироқ, бировнинг ҳалол моли бировга буюрармиди? Қўшимчасига эндигина йигитликнинг олтин даврига қадам қўйган ўспирин эларо ўғри деган ном олди.

Жиноят ишлари бўйича туман суди ушбу жиноят ишни  у яшайдиган овулда бўлиб ўтган очиқ суд мажлисида атрофлича муҳокама қилди ва тегишли жазо тайинлади.

Ўғирликнинг охири – хорлик, деганлари шу-да.

С.ДАВЛЕТМУРОДОВ, Жиноят ишлари бўйича туман суди раиси.