OʻGʻIRLIKNING SOʻNGI – XORLIK

Oila – muqaddas qoʻrgʻon. Unda avlodlar davomchisi – farzandlar dunyoga kelib, ilk  tarbiya olishadi. Ota-onaning to farzand tugʻilganidan boshlab, uning komil inson boʻlib voyaga yetishi, el-yurtiga xizmat qiladigan, qayishadigan inson boʻlib shakllanishi uchun qilgan saʼy-harakatlari albatta, bemasar ketmaydi.

Afsuski, bugungiday dorilomon zamonda toʻkin-sochin hayotni qadrlash, turmushini oʻzi yanada farovon qilish uchun halol mehnat qilish oʻrniga birovning haqiga koʻz olaytiradigan yaʼni yetarli tarbiya berilmagan yoshlar ham oramizda uchrab turadi.

Tumanimizning chekka ovullaridan birida istiqomat qiluvchi Baxtbek (ism oʻzgartirildi) ham shundaylar toifasidan.

Togʻni ursa, talqon qiladigan ayni yigirma yoshga kirib, kuch-quvvatga toʻlgan Baxtbek oʻz kelajagini oʻzi havoyi nafs uchun qurbon qildi. Oila aʼzolarining biron kasb yo hunarning boshini tut, rizqingni halol ishlab top, deya tergamaganliklari unga juda qoʻl keldi.

Gap shundaki, u oʻtgan yilning noyabrida ovulidagi paxtadan boʻshagan dalada bogʻlogʻlik turgan mollarga qarab “shulardan birini oʻgʻirlab sotsam, birov bilarmidi”, degan oʻy keldi koʻngliga. Mollarning kechasi ham dalada qolishi uning xayolidagi rejasini amalga oshirishiga juda  qoʻl keldi. Shunday qildi ham. Yarim kechasi el oyogʻi tinganida dalada “tunab” oʻtgan mollardan oʻrtacha bozor bahosi 7 mln. 500 ming soʻmlik keladigan bir gʻunajinni yetaklab ketdi va ovloq joyga olib borib bogʻladi. Bu bilan cheklanmay, oradan ozroq vaqt oʻtkazib, bir ovuldoshining molxonasi cherdagida bogʻlik turgan oʻrtacha bozor bahosi 5 mln. 500 ming soʻmlik gʻunajinni yarim kechasi oʻgʻirlab ketdi va mol savdosi bilan shugʻullanuvchi tanishlariga sotib yubordi.

Biroq, birovning halol moli birovga buyurarmidi? Qoʻshimchasiga endigina yigitlikning oltin davriga qadam qoʻygan oʻspirin elaro oʻgʻri degan nom oldi.

Jinoyat ishlari boʻyicha tuman sudi ushbu jinoyat ishni  u yashaydigan ovulda boʻlib oʻtgan ochiq sud majlisida atroflicha muhokama qildi va tegishli jazo tayinladi.

Oʻgʻirlikning oxiri – xorlik, deganlari shu-da.

S.DAVLETMURODOV, Jinoyat ishlari boʻyicha tuman sudi raisi.