КАСБ-ҲУНАРЛИ ЁШЛАР ЖАМИЯТНИ БЕЗАЙДИ

Инсонга умри давомида касб-ҳунар ва билим доим ҳамроҳлик қилади. Улар билангина ҳаёт мукаммал, тўкис ва мазмунли бўлади. Ҳунар ва билимга эга бўлган инсон, албатта, жамиятни ҳам безайди.
Ёшларнинг касб-ҳунар ўрганишига имконият яратиш мақсадида туманимизда ҳам Президентимизнинг “Профессионал таълим тизимини янада такомиллаштиришга доир қўшимча чора-тадбирлар тўғрисида”ги Фармонига биноан Амударё қишлоқ хўжалиги касб-ҳунар коллежи негизида 2020-2021 ўқув йилидан  Бердақ номидаги Қорақалпоқ Давлат Университети тасарруфидаги Амударё муҳандислик техникуми ташкил этилди. Мазкур техникумга ўтган ўқув йилида 10 турдан ортиқ йўналиш бўйича 173 нафар ўқувчи қабул қилинди. Ушбу масканда касб-ҳунар ўрганаётган ёшлар айни пайтда 2-босқичда таълим олишмоқда.
Техникумнинг ҳозирги кундаги қуввати 936 ўринли. Ундан ташқари, 100 нафар ўқувчи ўринга мўлжалланган ётоқхона, 150 ўринли фаоллар зали, 100 ўринли ошхона мунтазам ишлаб турибди. Таълим кундузги шаклда олиб борилади, ўқиш муддати эса 2 йил давом этади. Ўқув муассасасига умумтаълим мактабларининг 11-синф битирувчилари ҳамда ўрта махсус маълумотга эга бўлган ёшлар тўлов-контракт ва давлат бюджети асосида қабул қилинади.
Амударё муҳандислик техникумидаги ўқув жараёнини сифатли ташкил этиш мақсадида зарур шарт-шароитлар яратилган. Ўқув-лаборатория, устахона жиҳозлари ва бошқа техника воситалари билан таъминланган. Йўналишлар бўйича ўқув амалиётларини ўташ учун мос равишдаги машғулот хоналари мавжуд. Техникумда ўқув аудиториялар сони 25 та, фан кабинетлар ва лабораториялар сони 5 та, ўқув устахоналари, яъни амалиёт хоналари 9 тадан иборат. Маскандаги кутубхонада 11300 тага яқин бадиий ва мутахассисликлар бўйича ўқув адабиётлар келтирилган. Қишлоқ хўжалигини механизациялаш ва сервис техник-технологи, ташишларни ташкил этиш ва транспортни бошқариш, электр станциялари тармоқлари ва тизимлари, ветеринария медицинаси каби йўналишларда таҳсил олаётган ёшлар мукаммал таълим олиб, ҳунар ўрганишлари учун ушбу муассасада кенг имкониятлар мавжуд.
Жорий 2021-2022 ўқув йилида ҳам техникумда  қабул жараёнлари ўтказилиб, 178 нафар ўқувчи қабул қилинди ва ўқув машғулотлари бошлаб юборилди.
Амударё муҳандислик техникумида Озодбой Эшимбетов, Сайёра Мингбоева,  Гулхумор Эрнапасова, Тўлғоной Эшмуродовалар каби тажрибали ўқитувчилар ва ишлаб чиқариш таълими усталари фаолият кўрсатмоқда. Собиқ Амударё қишлоқ хўжалиги касб-ҳунар коллежида ҳам улардан билим олиб, касб ва ҳунар ўрганган ўқувчилардан 12 нафари 2017 йилда, 2 нафари 2018 йилда, нафари 2019 йилда математика ва физика фанларидан совринли ўринлар ғолиблари бўлишган эди.  Шахмат бўйича 2016 йилда ўтказилган Қорақалпоғистон чемпионатида иштирок этган Азимжон Раҳимов 1-ўрин ғолиби, 2018 йилда ўтказилган баркамол авлод спорт мусобақаларида 2 нафар, 2019 йилда ҳам 2 нафар ўқувчи совринли ўринларни эгаллашди.
2017-2018 йилларда Мўйноқ туманида ўтказилган “Орол ва Мўйноқнинг қайта тикланиши” экофестивали, “Орол денгизи балиқларидан 99 турдаги таомлар” гастрономик фестивали кабиларда ўқувчи-ёшлар ўз иқтидорларини кўрсатиб, Қорақалпоғистон Республикаси ўрта махсус касб-ҳунар таълими бошқармаси томонидан ҳурмат ёрлиғи билан тақдирланди. 2018-2019 ўқув йилида эса «Касб-маҳорати» кўрик-танловида иқтидорли ўқувчи Муниса Одилова Қорақалпоғистонда 1 ўрин ғолиби бўлди ва Тошкент шаҳрида  ўтказилган Ўзбекистон босқичида фахрли 3-ўринни эгаллади.  
Амударё муҳандислик техникумида ҳам келажакда самарали натижаларни қўлга киритиш, муассаса нуфузини кўтариш борасида тегишли чора-тадбирлар кўрилмоқда. Ҳозирги кунда фаолият олиб бораётган мавжуд кафедралар ва олий таълим муассасаларидаги кафедралар билан ҳамкорлик шартномалари тузилиб, ўқув-услубий мажмуалар яратилмоқда. Ўқув масканида таълим сифатини янада ошириш, ўқувчиларнинг касб-ҳунар сирларини мукаммал ўрганишларига имконият яратиш мақсадида машғулотлар интеграциялашган таълим усулида ташкил этилмоқда.

Озода Худойберганова.