KASB-HUNARLI YoShLAR JAMIYaTNI BEZAYDI

Insonga umri davomida kasb-hunar va bilim doim hamrohlik qiladi. Ular bilangina hayot mukammal, toʻkis va mazmunli boʻladi. Hunar va bilimga ega boʻlgan inson, albatta, jamiyatni ham bezaydi.
Yoshlarning kasb-hunar oʻrganishiga imkoniyat yaratish maqsadida tumanimizda ham Prezidentimizning “Professional taʼlim tizimini yanada takomillashtirishga doir qoʻshimcha chora-tadbirlar toʻgʻrisida”gi Farmoniga binoan Amudaryo qishloq xoʻjaligi kasb-hunar kolleji negizida 2020-2021 oʻquv yilidan  Berdaq nomidagi Qoraqalpoq Davlat Universiteti tasarrufidagi Amudaryo muhandislik texnikumi tashkil etildi. Mazkur texnikumga oʻtgan oʻquv yilida 10 turdan ortiq yoʻnalish boʻyicha 173 nafar oʻquvchi qabul qilindi. Ushbu maskanda kasb-hunar oʻrganayotgan yoshlar ayni paytda 2-bosqichda taʼlim olishmoqda.
Texnikumning hozirgi kundagi quvvati 936-oʻrinli. Undan tashqari, 100 nafar oʻquvchi oʻringa moʻljallangan yotoqxona, 150-oʻrinli faollar zali, 100-oʻrinli oshxona muntazam ishlab turibdi. Taʼlim kunduzgi shaklda olib boriladi, oʻqish muddati esa 2-yil davom etadi. Oʻquv muassasasiga umumtaʼlim maktablarining 11-sinf bitiruvchilari hamda oʻrta maxsus maʼlumotga ega boʻlgan yoshlar toʻlov-kontrakt va davlat byudjeti asosida qabul qilinadi.
Amudaryo muhandislik texnikumidagi oʻquv jarayonini sifatli tashkil etish maqsadida zarur shart-sharoitlar yaratilgan. Oʻquv-laboratoriya, ustaxona jihozlari va boshqa texnika vositalari bilan taʼminlangan. Yoʻnalishlar boʻyicha oʻquv amaliyotlarini oʻtash uchun mos ravishdagi mashgʻulot xonalari mavjud. Texnikumda oʻquv auditoriyalar soni 25 ta, fan kabinetlar va laboratoriyalar soni 5 ta, oʻquv ustaxonalari, yaʼni amaliyot xonalari 9 tadan iborat. Maskandagi kutubxonada 11300 taga yaqin badiiy va mutaxassisliklar boʻyicha oʻquv adabiyotlar keltirilgan. Qishloq xoʻjaligini mexanizatsiyalash va servis texnik-texnologi, tashishlarni tashkil etish va transportni boshqarish, elektr stantsiyalari tarmoqlari va tizimlari, veterinariya meditsinasi kabi yoʻnalishlarda tahsil olayotgan yoshlar mukammal taʼlim olib, hunar oʻrganishlari uchun ushbu muassasada keng imkoniyatlar mavjud.
Joriy 2021-2022 oʻquv yilida ham texnikumda  qabul jarayonlari oʻtkazilib, 178 nafar oʻquvchi qabul qilindi va oʻquv mashgʻulotlari boshlab yuborildi.
Amudaryo muhandislik texnikumida Ozodboy Eshimbetov, Sayyora Mingboyeva,  Gulxumor Ernapasova, Toʻlgʻonoy Eshmurodovalar kabi tajribali oʻqituvchilar va ishlab chiqarish taʼlimi ustalari faoliyat koʻrsatmoqda. Sobiq Amudaryo qishloq xoʻjaligi kasb-hunar kollejida ham ulardan bilim olib, kasb va hunar oʻrgangan oʻquvchilardan 12 nafari 2017-yilda, 2 nafari 2018-yilda, nafari 2019-yilda matematika va fizika fanlaridan sovrinli oʻrinlar gʻoliblari boʻlishgan edi.  Shaxmat boʻyicha 2016-yilda oʻtkazilgan Qoraqalpogʻiston chempionatida ishtirok etgan Azimjon Rahimov 1-oʻrin gʻolibi, 2018-yilda oʻtkazilgan barkamol avlod sport musobaqalarida 2 nafar, 2019-yilda ham 2 nafar oʻquvchi sovrinli oʻrinlarni egallashdi.
2017-2018-yillarda Moʻynoq tumanida oʻtkazilgan “Orol va Moʻynoqning qayta tiklanishi” ekofestivali, “Orol dengizi baliqlaridan 99 turdagi taomlar” gastronomik festivali kabilarda oʻquvchi-yoshlar oʻz iqtidorlarini koʻrsatib, Qoraqalpogʻiston Respublikasi oʻrta maxsus kasb-hunar taʼlimi boshqarmasi tomonidan hurmat yorligʻi bilan taqdirlandi. 2018-2019 oʻquv yilida esa «Kasb-mahorati» koʻrik-tanlovida iqtidorli oʻquvchi Munisa Odilova Qoraqalpogʻistonda 1-oʻrin gʻolibi boʻldi va Toshkent shahrida  oʻtkazilgan Oʻzbekiston bosqichida faxrli 3-oʻrinni egalladi.  
Amudaryo muhandislik texnikumida ham kelajakda samarali natijalarni qoʻlga kiritish, muassasa nufuzini koʻtarish borasida tegishli chora-tadbirlar koʻrilmoqda. Hozirgi kunda faoliyat olib borayotgan mavjud kafedralar va oliy taʼlim muassasalaridagi kafedralar bilan hamkorlik shartnomalari tuzilib, oʻquv-uslubiy majmualar yaratilmoqda. Oʻquv maskanida taʼlim sifatini yanada oshirish, oʻquvchilarning kasb-hunar sirlarini mukammal oʻrganishlariga imkoniyat yaratish maqsadida mashgʻulotlar integratsiyalashgan taʼlim usulida tashkil etilmoqda.

Ozoda Xudoyberganova.