ЭЛ АРДОҒИДАГИ УСТОЗ

Куюк кўпир овулидаги Адилбой ака ва Марям опа Элубоевларни ҳамма танийди. Овулда орастагина, саранжом-саришта ҳовлида яшовчи бу оила элда намунали, ҳурматга сазовор.
Ҳудуд ёшларининг таълим-тарбиясига муносиб ҳисса қўшган Марям
Нурекешова 1945 йилда Бердақ овулида таваллуд топган. У 1968 йилда Нукус педагогика институтининг кимё-биология факультетини тугатган эди. Ўқишни тугатиб, 1973 йилдан турмуш ўртоғи Адилбой ака билан Куюк кўпир овулидаги ҳозирги 19-сонли мактабда ўқитувчи бўлиб фаолият юрита бошлашди. Адилбой ака – кимё фани,  Марям опа эса биология фанидан дарс беришди. Йиллар давомида ёш авлодга таълим берган устозлар ҳозир нафақа гаштини суриб, фарзандлари, неваралари ардоғида ҳаёт гаштини суришмоқда.

Улар биргаликда иккита қиз, тўртта ўғил фарзандларни вояга етказишди. Фарзандлари ҳам юртга, элга нафи тегиб, хизматлари, меҳнати билан танилишди. Катта қизи Насиба опа Бўз ёп овулда жойлашган 10-сонли умумтаълим мактабида ўқитувчи, ўғли Омон ака Хитой овулидаги ҚОПда тиббиёт ходими бўлиб ишлайди. Азиз – Тошкент шаҳрида тадбиркор, Гулнафиса эса Қозоғистонда шифокор, Олмос ва Ойбек "Ўзбекистон темир йўллари" акциядорлик жамиятига қарашли темир йўл станцияси ходими бўлиб хизмат кўрсатишмоқда.

Адилбой ака ва Марям опаларнинг неваралари ҳам ўқитувчилик касбини танлашган. Катта набираси Зилола 10-сонли умумтаълим мактабида бошланғич синфларга дарс беради. Юлдуз эса Нукус шаҳридаги 7-сонли умумтаълим мактабида ўқитувчи. Асадбек ҳам ҚДУ талабаси.

Умрининг ана шундай нурли манзилларига етганида Адилбой акани бемаврид ўлим ҳаётдан олиб кетди.  Элдошлари ва шогирдлари унинг хотирасини ёд этиб, хонадонига келиб туришади. Марям опа ана шундай шогирдлари, ҳаётини қувончга тўлдирадиган ва ўз ҳаётининг бахтли онларини улар билан ўтказадиган фарзандлари, суюкли набиралари борлигидан ҳамиша хурсанд. Эл ардоғида, барча яқинлари қуршовида ҳаёт кечираётганидан, меҳнатларининг роҳатига етказганидан Яратганга шукрона билан яшамоқда.

Моҳинур Одилбоева, 19-сонли мактаб ўқувчиси.