Фидойи устоз Фарҳод Бекчановнинг 60 йиллик юбилейи нишонланди

Жамият тараққиёти ва миллатнинг порлоқ келажаги фидойи устозлар, ўз касбига меҳр қўйган муаллимларнинг машаққатли меҳнати билан чамбарчас боғлиқ. Ёш авлод қалбига илм-фан зиёсини таратадиган, уларни ватанпарварлик ва инсонпарварлик руҳида тарбиялайдиган устозлар ҳар доим халқимизнинг чексиз эҳтироми ва юксак ардоғида бўлиб келган. Орамиздаги ана шундай фидойи инсонларнинг меҳнатини эътироф этиш мақсадида ўқитувчиликдек шарафли ва масъулиятли касб эгаларидан бири, ўз умрини ёшлар таълим-тарбиясига бағишлаган Фарҳод Бекчановнинг 60 йиллик юбилейи муносабати билан катта тадбир ташкил қилинди.

Амударё туманидаги Уйшин маҳалласи ҳудудида жойлашган 75-умумтаълим мактабида ўтказилган ушбу тадбир нафақат бир инсоннинг қутлуғ ёшини нишонлаш, балки кўп йиллик ҳалол меҳнат, устозлик мақомига кўрсатилган юксак эҳтиромнинг ёрқин намунаси бўлди.

Таъкидлаш жоизки, Фарҳод Бекчанов шу мактабнинг ўзида 37 йил давомида бошланғич таълим ўқитувчиси бўлиб фаолият юритган. 37 йиллик фаолият бу – минглаб мурғак қалбларга илк ҳарфларни танитган, уларнинг қўлига қалам тутқазиб, ҳаётнинг катта оқимлари сари йўллаган беминнат меҳнат демакдир.

Фарҳод Бекчановнинг босиб ўтган ҳаёт йўли фақатгина мактаб ва таълим бериш машаққатлари билан чегараланиб қолмайди. Бу фидойи ўқитувчи ҳарбий хизматни Афғонистонда ўтаб, Афғон урушида иштирок этиб, йигитлик бурчини мардонавор бажарган ҳақиқий жасорат эгасидир. Урушнинг оғир ва суронли йиллари унинг иродасини тоблади, тинчликнинг қадрини ва мусаффо осмоннинг нечоғлик улуғ неъмат эканлигини чуқур ҳис қилишга ўргатди. Айнан шу ҳаётий тажриба ва қатъият кейинчалик унинг ўқитувчилик фаолиятида, ўқувчиларга ватанпарварлик туйғуларини сингдиришида муҳим пойдевор бўлиб хизмат қилди.

Тантанали тадбирда Ўзбекистон Ветеран ва фахрийлар бирлашмаси Қорақалпоғистон Республикаси бўлимининг Амударё тумани бўйича вакили Баҳодир Жуманиёзов иштирок этиб, устознинг ёш авлодни маънавий етук ва ҳақиқий ватанпарвар қилиб вояга етказишдаги улкан ҳиссасини алоҳида эътироф этди. Ушбу фидокорона меҳнатларининг муносиб эътирофи сифатида Фарҳод Бекчановга “Ёшларни ватанпарварлик руҳида тарбиялаш учун” кўкрак нишони, яъни махсус медаль тантанали равишда топширилди. Бундай юксак мукофот устознинг таълим соҳасидаги кўп йиллик машаққатли ва шарафли йўлига берилган энг адолатли ва ҳақли баҳолардан бири бўлди.

Тадбир давомида сўзга чиққан меҳмонлар ва ҳамкасблар устознинг инсоний фазилатлари, касбига бўлган садоқати ҳақида илиқ фикрларни билдириб ўтдилар. Хусусан, Уйшин маҳалла фуқаролар йиғини раиси Рустам Ражабов ва тадбирда иштирок этган фахрийлар ҳамда жамоатчилик вакиллари сўзга чиқиб, ўзларининг самимий табрикларини ва энг эзгу тилакларини изҳор қилдилар.

Йиғилишда мактабнинг юқори синф ўқувчилари ҳам фаол иштирок этиб, ўзларининг севимли устозларини қутлуғ 60 ёшлик юбилейи ва юксак мукофот билан қутлашди. Уларнинг юзларидаги қувонч ва кўзларидаги миннатдорчилик ҳисси устоз меҳнатининг ўзига хос акс-садоси, йиллар давомида қилинган меҳнатнинг ширин меваси бўлди.

Тантанали маросим сўнгида кўп йиллик тажрибага эга, фидойи муаллим Фарҳод Бекчанов сўзга чиқиб, ўзига кўрсатилган бундай юксак эътибор ва эҳтиром учун барча йиғилганларга, ташкилотчиларга ва жамоатчиликка ўзининг чексиз миннатдорчилигини билдирди.

Бу каби маънавий-маърифий тадбирлар жамиятимизда устоз ва мураббийларга бўлган ҳурмат-эътиборнинг тобора ортиб бораётганлигини, уларнинг ҳалол меҳнати ҳеч қачон эътибордан четда қолмаслигини яна бир бор намоён этади. Зеро, миллат келажагини яратувчи инсонларнинг қадри баланд бўлган юртда юксалиш, маънавият ва тараққиёт бардавом бўлади.