ЁШЛАР ҚАЛБИГА САНЪАТ УРУҒИНИ ЭКАЁТГАН ТАЖРИБАЛИ ЁШ УСТОЗ

Юртимизда маданият ва санъат соҳасини ривожлантириш, айниқса, ёш истеъдод эгаларини қўллаб-қувватлаш давлат сиёсатининг устувор йўналишларидан бирига айланди. Кейинги йилларда маданият марказлари фаолиятини жонлантириш, ёшларни миллий ва умуминсоний қадриятлар руҳида тарбиялаш, уларнинг ижодий салоҳиятини юзага чиқаришга қаратилган кенг кўламли ишлар амалга оширилмоқда. Ана шундай эзгу саъй-ҳаракатлар самараси ўлароқ, жойларда фидойи маданият ходимлари етишиб чиқмоқда. Улар орасида Амударё тумани Маданият бўлимига қарашли 34-сонли туман маданият марказида созанда вазифасида фаолият юритаётган Илёсбек Ўринбоевнинг ижодий йўли алоҳида эътиборга лойиқ.

Ижодкорнинг санъат оламидаги дастлабки ютуқлари 2012 йилга бориб тақалади. Шу йили 24 май куни у “Ягонасан, муқаддас Ватан!” республика танловининг туман босқичида фаол иштироки учун фахрий ёрлиқ билан тақдирланди ва маданият соҳаси раҳбарияти эътиборига тушди.

Ўтган 15 йилга яқин вақт давомида истеъдодли ёш ижодкор турли танловларнинг ҳудудий, туман ва Республика босқичларида, байрам тадбирларида фаол иштирок этиб, Қорақалпоғистон Республикаси Маданият вазирлиги, туман ҳокимлиги ва туман Маданият бўлимининг фахрий ёрлиқлари ҳамда ташаккурномалари билан тақдирланди.

Илёсбек Ўринбоевнинг сўнгги 3 йилдаги ютуқларига назар ташласак, унинг маҳорати билан бирга ютуқлари ҳам тобора юксалиб бораётганига гувоҳ бўлиш мумкин. У 2023 йилнинг сентябрь ойида “Янги Ўзбекистоннинг янги қўшиқлари” танловининг республика босқичида ҳаваскор ижрочилар орасида фахрли 3-ўринни эгаллади. Шу йили Ботир Зокиров номидаги замонавий эстрада қўшиқчилари республика кўрик-танловида фаол иштироки учун унга Қорақалпоғистон Республикаси Маданият вазирлигининг фахрий ёрлиғи топширилди. 20 декабрда эса Қорақалпоғистон Республикасида хизмат кўрсатган артист Рашид Хожасов хотирасига бағишланган республика танловида фаол иштироки учун яна бир фахрий ёрлиққа сазовор бўлди.

Истеъдодли ижодкор ўша йили йил якунлари бўйича юртимизнинг маънавий юксалишига қўшган салмоқли ҳиссаси, маданият ва санъат соҳасидаги фидойилиги учун туман маданият бўлими ташаккурномаси билан тақдирланди.

Илёсбек Ўринбоевнинг ижодий ютуқлари — бу изланиш, меҳнат ва машаққатнинг мевасидир. У ўз шогирдларига ҳам чин ихлос билан ижод қилишни, туман маданият ва санъатини янада юксакларга кўтаришга ҳисса қўшиш йўлида қийинчилик ва машаққатларни сабр билан енгиб ўтишни маслаҳат беради.

Серқирра ижодкор истеъдодли созанда — бу нафақат миллий чолғулар ижрочиси, балки ёшлар қалбига санъат уруғини экиб, уларни эзгу орзулар сари етакловчи санъат сирларини қунт билан ўргатувчи  устоздир. Унинг асосий вазифаси созанда мусиқачи сифатида тадбирларни мусиқий жиҳатдан бойитиш, дастурларни мазмунан бой тарзда ташкил этишдан ташқари марказда овоз ёзиш студиясида иқтидорли ёшларни саралаб, уларнинг овоз, саҳна маданияти ва ижрочилик маҳоратини мунтазам равишда ошириб боришдан иборат.

Жамоа студия раҳбари сифатида у шогирдлари билан турли маданий тадбирлар, байрамона концерт дастурлари ва танловларга пухта тайёргарлик кўради. Шунингдек, ёшларни миллий ва умуминсоний қадриятлар руҳида тарбиялаш, уларда ватанпарварлик, эстетик дид ва жамоада ишлаш кўникмасини шакллантиришга ҳам алоҳида эътибор қаратади.

Илёсбек Ўринбоев каби истеъдодли ва жонкуяр маданият ходимларининг саъй-ҳаракати билан жойлардаги маданият марказлари ёшлар учун ҳақиқий ижод мактабига айланмоқда. Санъатга меҳр қўйган ҳар бир йигит-қиз ана шу масканларда ўз истеъдодини кашф этиб, катта саҳналар сари дадил қадам ташламоқда.

Илёсбекнинг ушбу хайрли ва сермашаққат ишларида омад ва муваффақиятлар тилаб қоламиз!

Насибахон ЕШЧАНОВА, Амударё тумани маданият бўлими тасарруфидаги 34-сонли маданият маркази мутахассиси