Очиқ дарсларда қорақалпоқ тили ва адабиётининг турли қирралари очиб берилди

Таълим муассасаларида ўқувчиларнинг ҳар бир фанга бўлган қизиқишларини янада ошириш, уларда фанлар юзасидан янги билим, кўникмаларни ҳосил қилиш, таълим сифати ва самарадорлигини оширишда умумтаълим мактабларида ҳар ойда ўтказиладиган фан ойликлари ва улар доирасидаги турли тадбирлар муҳим аҳамият касб этмоқда. Фан ойликлари доирасида ташкил этилаётган очиқ дарслар ўқувчиларнинг олган билимларини  мустаҳкамлаш ҳамда янада бойитиш билан бир қаторда ўқитувчиларнинг ўз педогогик маҳоратларини намойиш этишларига ҳамда ўзаро тажриба алмашинувларига имконият яратмоқда.

Октябрь ойи она тили ва адабиёти ҳамда қорақалпоқ тили ва адабиёти фанлари ойлиги бўлиб,  умумтаълим мактабларида шу ойда мазкур фанлар бўйича кўплаб маънавий-маърифий тадбирлар ташкил этилади. Хусусан, октябрь ойи давомида Амударё туманидаги умумтаълим мактабларида она тили ва адабиёти ҳамда қорақалпоқ тили ва адабиёти фани ўқитувчилари томонидан кўплаб тадбирлар, адабий кечалар ҳамда очиқ дарслар ташкил этилиб, ўқувчиларнинг ушбу фанлардан олган билимлари янада мустаҳкамланди, уларнинг фанга бўлган қизиқишлари янада оширилди.

Хусусан, 1-сонли умумтаълим мактабида қорақалпоқ тили ва адабиёти фани ўқитувчилари турли синфларда, ҳар хил мавзуларда очиқ дарслар, адабий-бадиий кечалар, қолаверса, бу йил қорақалпоқ тилига Қорақалпоқ Республикасининг давлат тилини мақоми берилганига 32 йил тўлиши муносабати билан маънавий-маърифий тадбир ташкил этилди.

Туман Халқ таълими бўлимига қарашли 1-сонли умумтаълим мактабининг қорақалпоқ тили ва адабиёти фани бўйича олий тоифали ўқитувчиси Абтабида Абдимуратова томонидан 10-синф ўқувчилари учун “Классик адабиёт намояндалари ижоди” мавзусида очиқ дарс машғулоти ўтказилди. Очиқ дарсда ўқитувчи томонидан қорақалпоқ адабиётнинг ёрқин намоёндалари ҳаёти ва ижодининг ўзига хос хусусиятлари ҳамда фаннинг турли янги қирралари очиб берилди.

Айтиш керакки, Абтабида Абдимуратова тумандаги энг илғор, ташаббускор, юқори билим ва салоҳиятга эга бўлган, ҳар жабҳада ҳамкасбларига ўрнак бўлиб келаётган тажрибали педогоглардан бири ҳисобланади. Унинг иш фаолияти давомида ўз фанини, ўқувчиларини ҳамда касбини севиши, ишига бўлган масъулияти яққол сезилиб туради. Абтабида Абдимуратова ҳар бир дарс жараёнига ижодий ёндашиши, изланувчанлиги билан мактаб жамоаси ҳурмати ва эътиборига сазовор бўлган. У ўз педагогик фаолияти мобайнида қатор кўрик танловларда ишторок этиб совринли ўринларни эгаллаб келмоқда. Шунингдек, Абтабида Абдимуратованинг шогирдлари қорақалпоқ тили ва адбиёти фани бўйича туман ва республика миқёсидаги қатор беллашувларда, олимпиядаларда фаол иштирок этиб, устозининг меҳнатларини юзага чиқариб, ғолибликни қўлга киритиб келмоқдалар. Мактабнинг турли фан ўқитувчилари юқори педогогик маҳоратга эга бўлган ҳамкасби томонидан ўтилаётган очиқ дарсни катта қизиқиш билан кузатиб бордилар ҳамда янги тажрибалар орттирдилар.

Шунигдек, мактабнинг қорақалпоқ тили ва адабиёти фани ўқитувчилари ҳисобланган биринчи тоифали ўқитувчи Дилдора Қўчқарова 7-синфларда, иккинчи тоифали ўқитувчи Насиба Қўчқарова 3-синфларда, Янгила Шомуратова 2-синфларда, Моҳира Камолова 7-синфларда, Дилноза Иброҳимова 8-синфларда қорақалпоқ ва адабиёти фанларидан ҳар хил мавзуларда намунали очиқ дарслар ташкил этдилар. Очиқ дарс жараёнларида янги педогогик технологиялардан, иннавацион таълим методларидан фойдаланилиши ўқувчиларнинг очиқ дарслардаги фаоллигини янада оширди.

Очиқ дарсларда ўқитувчилар юртимизда қорақалпоқ тили ва адабиётини янада ривожлантиришга қаратилган эътибор тобора кучайиб бораётгани, қорақалпоқ адабиёти вакилларининг ижод мактаблари ташкил этилиши қорақалпоқ тили ва адабиётининг бой хазинаси, нафосатини ёш авлод қалбига сингдиришда муҳим аҳамият касб этаётгани хусусида сўз юритдилар.

Айтиш керакки, фан ойлиги доирасида ташкил этилган адабий-мусиқий кеча барча ўқувчиларда катта таассуротлар қолдирди. 5-8-синфлар ўқувчилари қорақалоқ адабиёти намуналаридан ажойиб шеърлар ҳамда куй-қўшиқлар ижро қилдилар. Тадбир кўтаринки руҳда ҳамда байрамона тарзда ўтди.

Чарос Арслонова.