Ochiq darslarda qoraqalpoq tili va adabiyotining turli qirralari ochib berildi

Taʼlim muassasalarida oʻquvchilarning har bir fanga boʻlgan qiziqishlarini yanada oshirish, ularda fanlar yuzasidan yangi bilim, koʻnikmalarni hosil qilish, taʼlim sifati va samaradorligini oshirishda umumtaʼlim maktablarida har oyda oʻtkaziladigan fan oyliklari va ular doirasidagi turli tadbirlar muhim ahamiyat kasb etmoqda. Fan oyliklari doirasida tashkil etilayotgan ochiq darslar oʻquvchilarning olgan bilimlarini  mustahkamlash hamda yanada boyitish bilan bir qatorda oʻqituvchilarning oʻz pedogogik mahoratlarini namoyish etishlariga hamda oʻzaro tajriba almashinuvlariga imkoniyat yaratmoqda.

Oktyabr oyi ona tili va adabiyoti hamda qoraqalpoq tili va adabiyoti fanlari oyligi boʻlib,  umumtaʼlim maktablarida shu oyda mazkur fanlar boʻyicha koʻplab maʼnaviy-maʼrifiy tadbirlar tashkil etiladi. Xususan, oktyabr oyi davomida Amudaryo tumanidagi umumtaʼlim maktablarida ona tili va adabiyoti hamda qoraqalpoq tili va adabiyoti fani oʻqituvchilari tomonidan koʻplab tadbirlar, adabiy kechalar hamda ochiq darslar tashkil etilib, oʻquvchilarning ushbu fanlardan olgan bilimlari yanada mustahkamlandi, ularning fanga boʻlgan qiziqishlari yanada oshirildi.

Xususan, 1-sonli umumtaʼlim maktabida qoraqalpoq tili va adabiyoti fani oʻqituvchilari turli sinflarda, har xil mavzularda ochiq darslar, adabiy-badiiy kechalar, qolaversa, bu yil qoraqalpoq tiliga Qoraqalpoq Respublikasining davlat tilini maqomi berilganiga 32-yil toʻlishi munosabati bilan maʼnaviy-maʼrifiy tadbir tashkil etildi.

Tuman Xalq taʼlimi boʻlimiga qarashli 1-sonli umumtaʼlim maktabining qoraqalpoq tili va adabiyoti fani boʻyicha oliy toifali oʻqituvchisi Abtabida Abdimuratova tomonidan 10-sinf oʻquvchilari uchun “Klassik adabiyot namoyandalari ijodi” mavzusida ochiq dars mashgʻuloti oʻtkazildi. Ochiq darsda oʻqituvchi tomonidan qoraqalpoq adabiyotning yorqin namoyondalari hayoti va ijodining oʻziga xos xususiyatlari hamda fanning turli yangi qirralari ochib berildi.

Aytish kerakki, Abtabida Abdimuratova tumandagi eng ilgʻor, tashabbuskor, yuqori bilim va salohiyatga ega boʻlgan, har jabhada hamkasblariga oʻrnak boʻlib kelayotgan tajribali pedogoglardan biri hisoblanadi. Uning ish faoliyati davomida oʻz fanini, oʻquvchilarini hamda kasbini sevishi, ishiga boʻlgan masʼuliyati yaqqol sezilib turadi. Abtabida Abdimuratova har bir dars jarayoniga ijodiy yondashishi, izlanuvchanligi bilan maktab jamoasi hurmati va eʼtiboriga sazovor boʻlgan. U oʻz pedagogik faoliyati mobaynida qator koʻrik tanlovlarda ishtorok etib sovrinli oʻrinlarni egallab kelmoqda. Shuningdek, Abtabida Abdimuratovaning shogirdlari qoraqalpoq tili va adbiyoti fani boʻyicha tuman va respublika miqyosidagi qator bellashuvlarda, olimpiyadalarda faol ishtirok etib, ustozining mehnatlarini yuzaga chiqarib, gʻoliblikni qoʻlga kiritib kelmoqdalar. Maktabning turli fan oʻqituvchilari yuqori pedogogik mahoratga ega boʻlgan hamkasbi tomonidan oʻtilayotgan ochiq darsni katta qiziqish bilan kuzatib bordilar hamda yangi tajribalar orttirdilar.

Shunigdek, maktabning qoraqalpoq tili va adabiyoti fani oʻqituvchilari hisoblangan birinchi toifali oʻqituvchi Dildora Qoʻchqarova 7-sinflarda, ikkinchi toifali oʻqituvchi Nasiba Qoʻchqarova 3-sinflarda, Yangila Shomuratova 2-sinflarda, Mohira Kamolova 7-sinflarda, Dilnoza Ibrohimova 8-sinflarda qoraqalpoq va adabiyoti fanlaridan har xil mavzularda namunali ochiq darslar tashkil etdilar. Ochiq dars jarayonlarida yangi pedogogik texnologiyalardan, innavatsion taʼlim metodlaridan foydalanilishi oʻquvchilarning ochiq darslardagi faolligini yanada oshirdi.

Ochiq darslarda oʻqituvchilar yurtimizda qoraqalpoq tili va adabiyotini yanada rivojlantirishga qaratilgan eʼtibor tobora kuchayib borayotgani, qoraqalpoq adabiyoti vakillarining ijod maktablari tashkil etilishi qoraqalpoq tili va adabiyotining boy xazinasi, nafosatini yosh avlod qalbiga singdirishda muhim ahamiyat kasb etayotgani xususida soʻz yuritdilar.

Aytish kerakki, fan oyligi doirasida tashkil etilgan adabiy-musiqiy kecha barcha oʻquvchilarda katta taassurotlar qoldirdi. 5-8-sinflar oʻquvchilari qoraqaloq adabiyoti namunalaridan ajoyib sheʼrlar hamda kuy-qoʻshiqlar ijro qildilar. Tadbir koʻtarinki ruhda hamda bayramona tarzda oʻtdi.

Charos Arslonova.