“БАҒРИКЕНГЛИК ҲАФТАЛИГИ” ДОИРАСИДА ТАДБИР ЎТКАЗИЛДИ

Ўзбекистон Республикаси Президентининг 2019 йил 19 ноябрда қабул қилган “Миллатлараро муносабатлар соҳасида Ўзбекистон Республикаси давлат сиёсати концепциясини тасдиқлаш тўғрисида”ги Фармонига мувофиқ ҳар йили 16 ноябрь – “Халқаро бағрикенглик куни”га бағишланган “Бағрикенглик ҳафталигини” ўтказишга улкан эътибор қаратилмоқда.

Бирлашган миллатлар Ташкилоти Бош Ассамблеяси қарорига мувофиқ 1977 йилдан буён 16 ноябрь санаси “Халқаро бағрикенглик куни” сифатида нишонланиб келинади.

130 дан ортиқ миллатлар вакиллари истиқомат қиладиган бағрикенг юртимизда ушбу сана муносабати билан “Бағрикенглик ҳафталиги”нинг ўтказилиши, шу муносабат билан барча миллатга мансуб аҳоли ўртасида ўзаро дўстлик, биродарлик, миллий ва умуминсоний қадриятларга ҳурмат, юртга муҳаббат, диний бағрикенглик тарғиб этиладиган турли маданий тадбирлар ташкиллаштирилиши анъанага айланиб қолди.

Шу йилнинг 18 ноябрида юртимизнинг барча ҳудудларида бўлгани каби ҳафталик доираси туманимиздаги 76-сонли умумий ўрта таълим мактабида ҳам маънавий-маърифий тадбир ўтказилди. Унда режага кўра, 5-, 6-синфлар ўқувчилари орасида “Менинг бағрикенг дўстим” деб номланган расмлар танлови бўлиб ўтди. Шуниси эътиборлики, танлов иштирокчиларининг  ўз идеалидаги дўст инсони сиймосини тўла гавдалантириб бера олиши учун етарли шароитлар яратилди. Маълум муддат ичида чизилган расмларни ҳакамлар ҳайъати синчиклаб ўрганиб, ҳаққоний баҳоладилар.

Мактабнинг 7-,8-синфлари ўқувчилари иштирокидаги дўстлик, бағрикенглик, ўзаро меҳр-оқибат, она Ватанимизга муҳаббат тараннум этилган шеърхонлик барча ўқувчиларда улкан таассуротлар қолдирди.

Тадбирда 9-, 11-синфлар ўқувчилар ўртасида “Бағрикенглик – менинг наздимда” мавзусида иншолар танлови ҳамда миллий либослар намойиши ўтказилгани, айниқса, ўқувчиларга манзур бўлди. Боиси туманимизда ҳам ўзбек, қорақалпоқлардан ташқари қозоқ, қирғиз, татар, туркман, рус, корейс ва  бошқада миллатлар вакиллари бир оила фарзандларидай аҳил, иноқ яшашади. Уларнинг ҳаммаси ҳам ўз миллийгини асраши, ривожлантириши учун юртимизда кенг имкониятлар мавжуд. Шунинг учун ҳам улар ўз миллий либосларини фахр-ифтихор билан кийишади. Тадбирда турли халқлар миллий либосларини томоша қилиш ўқувчиларга завқ-шавқ бағишлади.

Шунингдек, 5-, 11-синфлар ўқувчилар орасида миллий таомлар кўргазмаси ҳам ташкил этилди.

Тадбир сўнгида мактаб бадиий ҳаваскорлари ижросида турли миллатлар миллий қўшиқ ва рақсларидан тузилган концерт дастури намойиш этилди.

Тадбирда ўз иқтидорини намоён этган ўқувчилар мактаб маъмурияти томонидан рағбатлантирилди.

Ойгул РАЖАБОВА.