“BAGʻRIKENGLIK HAFTALIGI” DOIRASIDA TADBIR OʻTKAZILDI

Oʻzbekiston Respublikasi Prezidentining 2019-yil 19-noyabrda qabul qilgan “Millatlararo munosabatlar sohasida Oʻzbekiston Respublikasi davlat siyosati kontseptsiyasini tasdiqlash toʻgʻrisida”gi Farmoniga muvofiq har yili 16-noyabr – “Xalqaro bagʻrikenglik kuni”ga bagʻishlangan “Bagʻrikenglik haftaligini” oʻtkazishga ulkan eʼtibor qaratilmoqda.

Birlashgan millatlar Tashkiloti Bosh Assambleyasi qaroriga muvofiq 1977-yildan buyon 16-noyabr sanasi “Xalqaro bagʻrikenglik kuni” sifatida nishonlanib kelinadi.

130 dan ortiq millatlar vakillari istiqomat qiladigan bagʻrikeng yurtimizda ushbu sana munosabati bilan “Bagʻrikenglik haftaligi”ning oʻtkazilishi, shu munosabat bilan barcha millatga mansub aholi oʻrtasida oʻzaro doʻstlik, birodarlik, milliy va umuminsoniy qadriyatlarga hurmat, yurtga muhabbat, diniy bagʻrikenglik targʻib etiladigan turli madaniy tadbirlar tashkillashtirilishi anʼanaga aylanib qoldi.

Shu yilning 18-noyabrida yurtimizning barcha hududlarida boʻlgani kabi haftalik doirasi tumanimizdagi 76-sonli umumiy oʻrta taʼlim maktabida ham maʼnaviy-maʼrifiy tadbir oʻtkazildi. Unda rejaga koʻra, 5-, 6-sinflar oʻquvchilari orasida “Mening bagʻrikeng doʻstim” deb nomlangan rasmlar tanlovi boʻlib oʻtdi. Shunisi eʼtiborliki, tanlov ishtirokchilarining  oʻz idealidagi doʻst insoni siymosini toʻla gavdalantirib bera olishi uchun yetarli sharoitlar yaratildi. Maʼlum muddat ichida chizilgan rasmlarni hakamlar hayʼati sinchiklab oʻrganib, haqqoniy baholadilar.

Maktabning 7-,8-sinflari oʻquvchilari ishtirokidagi doʻstlik, bagʻrikenglik, oʻzaro mehr-oqibat, ona Vatanimizga muhabbat tarannum etilgan sheʼrxonlik barcha oʻquvchilarda ulkan taassurotlar qoldirdi.

Tadbirda 9-, 11-sinflar oʻquvchilar oʻrtasida “Bagʻrikenglik – mening nazdimda” mavzusida insholar tanlovi hamda milliy liboslar namoyishi oʻtkazilgani, ayniqsa, oʻquvchilarga manzur boʻldi. Boisi tumanimizda ham oʻzbek, qoraqalpoqlardan tashqari qozoq, qirgʻiz, tatar, turkman, rus, koreys va  boshqada millatlar vakillari bir oila farzandlariday ahil, inoq yashashadi. Ularning hammasi ham oʻz milliygini asrashi, rivojlantirishi uchun yurtimizda keng imkoniyatlar mavjud. Shuning uchun ham ular oʻz milliy liboslarini faxr-iftixor bilan kiyishadi. Tadbirda turli xalqlar milliy liboslarini tomosha qilish oʻquvchilarga zavq-shavq bagʻishladi.

Shuningdek, 5-, 11-sinflar oʻquvchilar orasida milliy taomlar koʻrgazmasi ham tashkil etildi.

Tadbir soʻngida maktab badiiy havaskorlari ijrosida turli millatlar milliy qoʻshiq va raqslaridan tuzilgan kontsert dasturi namoyish etildi.

Tadbirda oʻz iqtidorini namoyon etgan oʻquvchilar maktab maʼmuriyati tomonidan ragʻbatlantirildi.

Oygul RAJABOVA.