18-сонли мактабда “Ҳарфларни ўргандик” дея номланган тадбир ўтказилди
Ўзбекистон Республикаси Халқ таълими вазирлигининг тегишли буйруғига асосан республикамизнинг барча умумий ўрта таълим мактабларида ўқув йилининг ҳар ойи маълум фанлар ойлиги сифатида белгиланган. Фан ойликларини ўтказишда умумий ўра таълим мактабларининг барчасини тўла қамраб олиш, бунда ўқитувчиларнинг ижодий фаоллигини ошириш, истеъдодли, ижодкор ўқитувчиларни аниқлаш, уларнинг тажрибаларини оммалаштириш ва тарғиб этиш, таълим сифатини ошириш ҳамда дарс жараёнида қўлланилаётган услубларни такомиллаштириш назарда тутилган.
Шу йилнинг 27 ноябрида туманимиздаги 18-сонли умумий ўрта таълим мактабида ноябрь – хорижий тиллар фан ойлиги дея белгиланганлиги муносабати билан ўтказилган “Ҳарфларни ўргандик” дея номланган тадбир ҳам шу мақсадга қаратилди.
Мактабнинг 2-синфлари ўқувчилари иштирокида бўлиб ўтган тадбирда болалар инглиз тили алифбосидаги ҳарфларни ўқишни, ёзишни ўзлаштириб олганликларини намойиш қилиб, саҳнага ҳар бири бир ҳарф ёзилган қалпоқчаларни кийиб, шод-хуррам чиқдилар. Улар ширин тилда инглиз тилида ўзлари тақиб чиққан ҳарфлар билан бошланувчи шеърлар ижро қилдилар.
Бола мисли оқ қоғоз, кўнглида гард, ғубор йўқ. Уларга бошланғич синфларда одоб-икром, бошланғич билимлар чуқур сингдирилса, ўқишга-ўрганишга иштиёқ, рағбат уйғотилса, бола билимдон, дунёқараши кенг бўлиб улғаяди. Агар у хорижий тилларни ҳам пухта ўзлаштириб борса, нур устига аъло нурдир. Чунки инглиз тилини билиш кўпгина дунё илмларини ўрганишга йўл очади.
Шу боисдан ҳам мазкур мактабнинг инглиз тили фани ўқитувчилари Дилафрўз Тўраева, Йўлдошевалар ўзлари дарс бераётган 2-синфлар ўқувчиларига ҳарфларни танитиш билан бир қаторда оғзаки нутқларини ривожлантириш мақсадида шеърлар ҳам ёд олдириб, инглизча қисқа суҳбатлашув кўникмасини ҳам шакллантиришга ҳаракат қилишмоқда. Бу ҳаракатлар самараси “Ҳарфларни ўргандик” деб номланган тадбирда 2-синфлар ўқувчилари намойиш этган диалогларда яққол намоён бўлди. Айниқса, болажонларнинг саҳнадаги мавжуд предметларни инглиз тилида таништириши барчанинг завқини келтирди.
Ёш авлод камолоти йўлида муҳим восита бўлиб хизмат қилувчи инглиз тилини болаларга пухта ўргатишга интилишларининг самарасини кўриш устозларга ҳам қувонарли бўлди. Айниқса, инглиз тилида янграган қўшиқлар болаларни ушбу фанни янада чуқур эгаллашга руҳлантирди.
Фан ойлиги доирасида мактаб хорижий тиллар услуббирлашмаси томонидан тасдиқланган режага мувофиқ ўтказилган суҳбатлар, адабий кечалар, викториналар ва очиқ дарсларнинг барчасида ҳам ўқувчилар фаол қатнашиб, инглиз тилини ўрганишга қизиқишлари юқори эканлигини кўрсатдилар.
Ойлик якунида ўтказилган 2-синфлар ўқувчилари иштирокидаги “Ҳарфларни ўргандик” деб номланган тадбир инглиз тилини ўрганишга болажонлар қандай қадам қўйганларини яққол намойиш этди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
