18-sonli maktabda “Harflarni oʻrgandik” deya nomlangan tadbir oʻtkazildi

Oʻzbekiston Respublikasi Xalq taʼlimi vazirligining tegishli buyrugʻiga  asosan respublikamizning barcha umumiy  oʻrta taʼlim maktablarida oʻquv yilining  har oyi maʼlum fanlar oyligi sifatida belgilangan. Fan oyliklarini oʻtkazishda umumiy oʻra taʼlim maktablarining barchasini toʻla qamrab olish, bunda  oʻqituvchilarning ijodiy faolligini oshirish, isteʼdodli, ijodkor  oʻqituvchilarni aniqlash, ularning tajribalarini ommalashtirish va targʻib etish, taʼlim sifatini oshirish hamda dars jarayonida qoʻllanilayotgan uslublarni takomillashtirish nazarda tutilgan.

Shu yilning 27-noyabrida tumanimizdagi 18-sonli umumiy oʻrta taʼlim maktabida noyabr – xorijiy tillar fan oyligi deya belgilanganligi munosabati bilan oʻtkazilgan “Harflarni oʻrgandik” deya nomlangan tadbir ham shu maqsadga qaratildi.

Maktabning 2-sinflari oʻquvchilari ishtirokida boʻlib oʻtgan tadbirda  bolalar ingliz tili alifbosidagi harflarni oʻqishni, yozishni oʻzlashtirib olganliklarini namoyish qilib, sahnaga har biri bir harf yozilgan qalpoqchalarni kiyib, shod-xurram chiqdilar. Ular shirin tilda ingliz tilida oʻzlari taqib chiqqan harflar bilan boshlanuvchi sheʼrlar ijro qildilar.

Bola misli oq qogʻoz, koʻnglida gard, gʻubor yoʻq. Ularga boshlangʻich sinflarda odob-ikrom, boshlangʻich bilimlar chuqur singdirilsa, oʻqishga-oʻrganishga ishtiyoq, ragʻbat uygʻotilsa, bola bilimdon, dunyoqarashi keng boʻlib ulgʻayadi. Agar u xorijiy tillarni ham puxta oʻzlashtirib borsa, nur ustiga aʼlo nurdir. Chunki ingliz tilini bilish koʻpgina dunyo ilmlarini oʻrganishga yoʻl ochadi.

Shu boisdan ham mazkur maktabning ingliz tili fani oʻqituvchilari Dilafroʻz Toʻrayeva, Yoʻldoshevalar oʻzlari dars berayotgan 2-sinflar oʻquvchilariga harflarni tanitish bilan bir qatorda ogʻzaki nutqlarini rivojlantirish maqsadida sheʼrlar ham yod oldirib, inglizcha qisqa suhbatlashuv koʻnikmasini ham shakllantirishga harakat qilishmoqda. Bu harakatlar samarasi “Harflarni oʻrgandik” deb nomlangan tadbirda 2-sinflar oʻquvchilari  namoyish etgan dialoglarda yaqqol namoyon boʻldi. Ayniqsa, bolajonlarning sahnadagi mavjud predmetlarni ingliz tilida tanishtirishi barchaning zavqini keltirdi.

Yosh avlod kamoloti yoʻlida muhim vosita boʻlib xizmat qiluvchi  ingliz tilini bolalarga puxta oʻrgatishga intilishlarining samarasini koʻrish ustozlarga ham quvonarli boʻldi. Ayniqsa, ingliz tilida yangragan qoʻshiqlar bolalarni ushbu fanni yanada chuqur egallashga ruhlantirdi.

Fan oyligi doirasida maktab xorijiy tillar uslubbirlashmasi tomonidan tasdiqlangan rejaga muvofiq oʻtkazilgan suhbatlar, adabiy kechalar, viktorinalar va ochiq darslarning barchasida ham oʻquvchilar faol qatnashib, ingliz tilini oʻrganishga qiziqishlari yuqori ekanligini koʻrsatdilar.

Oylik yakunida oʻtkazilgan 2-sinflar oʻquvchilari ishtirokidagi “Harflarni oʻrgandik” deb nomlangan tadbir ingliz tilini oʻrganishga bolajonlar qanday qadam qoʻyganlarini yaqqol namoyish etdi.

Oygul RAJABOVA.