40-СОНЛИ МАКТАБДА “КОНСТИТУЦИЯ – БАХТИМИЗ ҚОМУСИ” ДЕБ НОМЛАНГАН ТАДБИР ЎТКАЗИЛДИ
Туманимиздаги умумтаълим муассасаларида 8 декабрь – Ўзбекистон Республикаси Конституцияси қабул қилинган куннинг 29 йиллиги муносабати билан ҳамда ижтимоий фанлар ойлиги доирасида маънавий-маърифий, ҳуқуқий-тарбиявий тадбирлар ўтказилмоқда. Мазкур тадбирларда ўқувчи-ёшлар фаол иштирок этишиб, ўзларининг ижтимоий фанлар бўйича олган билимларини ҳамда Конституция билимдонлари эканликларини намойиш этишмоқда.
Амударё тумани халқ таълими бўлимига қарашли 40-сонли умумтаълим мактабида эса Ўзбекистон Республикаси Конституцияси қабул қилинганлигининг 29 йиллик шодиёналари ҳақиқий билимдонлар байрамига айланиб кетди. Сана муносабати билан ижтимоий фанлар ойлиги доирасида қуйи ва юқори синфлар ўқувчилари томонидан бири-биридан мазмунли маънавий-маърифий тадбирлар ташкил этилди.
Хусусан, “Конституция – бахтимиз қомуси” деб номланган тадбир билимдон, зукко ва эпчил, ҳозиржавоб ўқувчилариннг ўз иқтидорларини намоён этишлари учун имконият яратди. Тадбир давомида Конституция билимдонлари тўртта шарт бўйича ўзаро беллашдилар. Унга кўра, биринчи шартда иштирокчи ўзини таништириш асносида оиласи ҳамда ўзи учун Конституцияда кафолатланган ҳуқуқлар ҳақида батафсил, сермазмун ҳикоя қилиши талаб этилди. Иккинчи шарт Конституция боблари, моддалари бўйича савол-жавоблар, учинчи шарт хотира машқи, тўртинчи шарт эса ёшлар орасида ҳуқуқбузарликларнинг келиб чиқиши ҳамда уларнинг олдини олиш ҳақида саҳна кўринишлари тайёрлашдан иборат бўлди.
Шуниси эътиборлики, иштирокчилар барча шартларни маромига етказиб адо этдилар.
“Аждодлар мероси – келажак пойдевори” шиори остида 7-синфлар ўртасида бўлиб ўтган беллашув қизиқарли таассуротларга бой бўлди. Унда “Жалолиддин Мангуберди”, “Тўмарис”, “Темурийлар” гуруҳлари ўзаро куч синашдилар. Таништирув, мантиқий савол-жавоблар, хотира синовлари асосида ўтказилган беллашувда иштирокчилар улуғ аждодларимизнинг бетимсол маънавий, маданий меросини қунт билан ўрганаётганликларини ўзларининг амалий чиқишлари, мантиқий саволларга берган жавоблари орқали намойиш этдилар.
Тадбир давомида 5-6-синфлар ўқувчилари ўртасида “Тарихий ёдгорликлар макетларини тайёрлаш” бўйича кўрик-танлов ҳам бўлиб ўтди. Мазкур танлов нафақат иштирокчилар, балки мактаб ўқитувчилари ҳамда кўрик-танлов томошабинлари учун ҳам ниҳоятда қизиқарли ва ҳаяжонли таассуротларга бой бўлди. Унда ўқувчилар ҳали жуда ёш бўлсалар-да, тарихий-меъморий ёдгорликлар хусусида анчагина яхши тасаввурга эга эканликларини ўзлари тайёрлаган макетлар орқали ифода этдилар. Шу билан бирга, Конституциямизда тарихий-маданий ёдгорликлар тўла давлат ҳимоясида ва халқимизнинг бебаҳо бойлиги, бу бойликни асраб-авайлаш ҳар бир фуқаронинг бурчи эканлигини ҳам таъкидладилар.
Тадбир якунида Конституция билимдонлари мактаб маъмурияти томонидан фахрий ёрлиқлар билан тақдирландилар.
“Конституция – бахтимиз қомуси” деб номланган маънавий-маърифий ҳамда ҳуқуқий-тарбиявий кечадан жой олган ҳар бир тадбир ўқувчи-ёшлар қалбида она Ватанга муҳаббат, Конституцияда белгиланган барча ҳуқуқий нормаларга ҳурмат туйғусини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
