40-SONLI MAKTABDA “KONSTITUTsIYa – BAXTIMIZ QOMUSI” DEB NOMLANGAN TADBIR OʻTKAZILDI

Tumanimizdagi umumtaʼlim muassasalarida 8-dekabr – Oʻzbekiston Respublikasi Konstitutsiyasi qabul qilingan kunning 29 yilligi munosabati bilan hamda ijtimoiy fanlar oyligi doirasida maʼnaviy-maʼrifiy, huquqiy-tarbiyaviy tadbirlar oʻtkazilmoqda. Mazkur tadbirlarda oʻquvchi-yoshlar faol ishtirok etishib, oʻzlarining ijtimoiy fanlar boʻyicha olgan bilimlarini hamda Konstitutsiya bilimdonlari ekanliklarini namoyish etishmoqda.

Amudaryo tumani xalq taʼlimi boʻlimiga qarashli 40-sonli umumtaʼlim maktabida esa Oʻzbekiston Respublikasi Konstitutsiyasi qabul qilinganligining 29 yillik shodiyonalari haqiqiy bilimdonlar bayramiga aylanib ketdi. Sana munosabati bilan ijtimoiy fanlar oyligi doirasida quyi va yuqori sinflar oʻquvchilari tomonidan biri-biridan mazmunli maʼnaviy-maʼrifiy tadbirlar tashkil etildi.

Xususan, “Konstitutsiya – baxtimiz qomusi” deb nomlangan tadbir bilimdon, zukko va epchil, hozirjavob oʻquvchilarinng oʻz iqtidorlarini namoyon etishlari uchun imkoniyat yaratdi. Tadbir davomida Konstitutsiya bilimdonlari toʻrtta shart boʻyicha oʻzaro bellashdilar. Unga koʻra, birinchi shartda ishtirokchi oʻzini tanishtirish asnosida oilasi hamda oʻzi uchun Konstitutsiyada kafolatlangan huquqlar haqida batafsil, sermazmun hikoya qilishi talab etildi. Ikkinchi shart Konstitutsiya boblari, moddalari boʻyicha savol-javoblar, uchinchi shart xotira mashqi, toʻrtinchi shart esa yoshlar orasida huquqbuzarliklarning kelib chiqishi hamda ularning oldini olish haqida sahna koʻrinishlari tayyorlashdan iborat boʻldi.

Shunisi eʼtiborliki, ishtirokchilar barcha shartlarni maromiga yetkazib ado etdilar.

“Ajdodlar merosi – kelajak poydevori” shiori ostida 7-sinflar oʻrtasida boʻlib oʻtgan bellashuv qiziqarli taassurotlarga boy boʻldi. Unda “Jaloliddin Manguberdi”, “Toʻmaris”, “Temuriylar” guruhlari oʻzaro kuch sinashdilar. Tanishtiruv, mantiqiy savol-javoblar, xotira sinovlari asosida oʻtkazilgan bellashuvda ishtirokchilar ulugʻ ajdodlarimizning betimsol maʼnaviy, madaniy merosini qunt bilan oʻrganayotganliklarini oʻzlarining amaliy chiqishlari, mantiqiy savollarga bergan javoblari orqali namoyish etdilar.

Tadbir davomida 5-6-sinflar oʻquvchilari oʻrtasida “Tarixiy yodgorliklar maketlarini tayyorlash” boʻyicha koʻrik-tanlov ham boʻlib oʻtdi. Mazkur tanlov nafaqat ishtirokchilar, balki maktab oʻqituvchilari hamda koʻrik-tanlov tomoshabinlari uchun ham nihoyatda qiziqarli va hayajonli taassurotlarga boy boʻldi. Unda oʻquvchilar hali juda yosh boʻlsalar-da, tarixiy-meʼmoriy yodgorliklar xususida anchagina yaxshi tasavvurga ega ekanliklarini oʻzlari tayyorlagan maketlar orqali ifoda etdilar. Shu bilan birga, Konstitutsiyamizda tarixiy-madaniy yodgorliklar toʻla davlat himoyasida va xalqimizning bebaho boyligi, bu boylikni asrab-avaylash har bir fuqaroning burchi ekanligini ham taʼkidladilar.

Tadbir yakunida Konstitutsiya bilimdonlari maktab maʼmuriyati tomonidan faxriy yorliqlar bilan taqdirlandilar.

“Konstitutsiya – baxtimiz qomusi” deb nomlangan maʼnaviy-maʼrifiy hamda huquqiy-tarbiyaviy kechadan joy olgan har bir tadbir oʻquvchi-yoshlar qalbida ona Vatanga muhabbat, Konstitutsiyada belgilangan barcha huquqiy  normalarga hurmat tuygʻusini yanada mustahkamladi.

Robiya YOʻLDOShEVA.