15-СОНЛИ МАКТАБДА “БИЗ ЗЎРАВОНЛИККА ҚАРШИМИЗ” ДЕБ НОМЛАНГАН ТАДБИР ЎТКАЗИЛДИ

Мамлакатимизда 25 ноябрдан 10 декабргача бўлган давр оралиғида «Зўравонликка қарши 16 кун» шиори остида турли тарғибот тадбирлари ўтказилди. Тегишли ташкилотларнинг масъул ходимлари таълим муассасалари ва меҳнат жамоаларида хотин-қизлар билан учрашиб, «Биз зўравонликка қаршимиз», «Зўравонликка қарши 16 кун» мавзуларида маъруза ва семинар-тренинглар ташкил этилди.

Амударё туманида ҳам барча ҳудудларда худди шундай тадбирлар ўтказилиб, хотин-қизларни тазйиқ ва зўравонликдан ҳимоя қилишга қаратилган норматив-ҳуқуқий ҳужжатлар ва айни кунларда олиб борилаётган чора-тадбирлар тўғрисида батафсил тушунтиришлар бериб борилди.

2 декабрь куни 15-сонли умумтаълим мактабида ҳам “Зўравонликка қарши 16 кун” шиори остида “Биз зўравонликка қаршимиз” деб номланган тадбир ўтказилди. Тадбирда туман Маҳалла ва оилани қўллаб-қувватлаш бўлими бошлиғининг биринчи ўринбосари Муқаддас Бекназарова, туман Халқ таълими бўлими масъуллари ва мактаб психологлари қатнашдилар.

Тадбирда иштирок этиш учун келган масъуллар мактаб ҳовлисидан кутиб олинди ва уларга ўқувчилар ўзлари ёд олган Ватанни мадҳ этувчи шеърларини ифодали айтиб бердилар. Шундан сўнг, мактабнинг “Меҳрибонлик” деб номланган биринчи қаватида “Ҳаёт гўзал чунки унда мен борман” мавзусида ўқувчилар ишлаган турли суратлар ва қўл меҳнати маҳсулларидан ташкил этилган кўргазма томоша қилинди. Мактабнинг иккинчи қаватидаги “Зўравонликка йўл қўймаслик”, “Ўзбекистон – Ватаним менинг” бурчакларида эса турли хилдаги зўравонликни талқин қилувчи суратлар билан танишдилар.

Мактабнинг учинчи қаватидаги “Кечириш” деб номланган бурчаги ҳар кимни бироз тўхтаб, кимни, қачон хафа қилганини эслашга, шу инсонни учратганда ундан кечирим сўраш кераклигини англашга, ҳис қилишига чорлайдиган қилиб безатилганлиги билан барчага манзур бўлди. Позитив, яъни “Меҳр ва табассум” қаватида эса “Менинг кайфиятим”, “Орзулар дарахти”, “Бахтли болалик” каби бурчаклар ташкил қилинган. Тадбирга ташриф буюрганлар ушбу қаватдагилар бир-бирларига болаликни эслатиб хушкайфият, меҳр улашаётганларининг, орзу-умидлар рўёби учун интилишга чорлаётганларининг гувоҳи бўлдилар. Мактабнинг 5-синф ўқувчилари иштирокида ўтказилган эртак терапия машғулоти ҳам барчага ниҳоятда манзур бўлди.

Шундан сўнг, умумий тадбир бошлаб юборилди. Тадбир давомидаги маърузаларда ҳар йили дунё миқёсида 25 ноябрдан 10 декабргача “Зўравонликка қарши 16 кун” остида турли тадбирлар ўтказилиши, Ўзбекистонда фуқароларни зўравонликдан ҳимоялаш, ҳар қандай зўравонликка муносиб жазо тайинлаш миллий қонунчилигимизда қатъий белгилаб қўйилгани хусусида сўз юритилди.  Шунингдек, зўравонликка қарши курашиш, хотин-қизларнинг ҳуқуқларини ҳимоя қилиш, зўравонликдан жабр кўрган аёлларни реабилитация қилиш институтлари фаолиятини қўллаб-қувватлаш, бу борада илғор хорижий тажрибани ўрганиш ва миллий амалиётга жорий этиш бўйича кенг кўламли ишлар олиб борилаётгани алоҳида таъкидлаб ўтилди.

Ўқувчилар томонидан тайёрланган мусиқий чиқишлар намойиш этилганидан сўнг, “Таёқча соябон ўйини”, ”Яраштириб қўйиш ролли ўйини”, ”Халқадан ўтиш ўйини” каби тренинг машғулотлар ташкил этилди. Тренинг машғулотлар орқали ўқувчилар қалбида кечиримлилик, раҳмдиллик, меҳр-оқибат туйғулари, улар ўртасидаги дўстона муносабатлар мустаҳкамлашга эришилди.

“Биз зўравонликка қаршимиз” номи билан ўтказилган ушбу кенг кўламли тадбир ҳар бир иштирокчида катта таассурот қолдиргани билан ниҳоятда аҳамиятли бўлди.

М.Жуманиёзова, 15-сонли мактаб психологи.