15-SONLI MAKTABDA “BIZ ZOʻRAVONLIKKA QARShIMIZ” DEB NOMLANGAN TADBIR OʻTKAZILDI

Mamlakatimizda 25-noyabrdan 10-dekabrgacha boʻlgan davr oraligʻida «Zoʻravonlikka qarshi 16 kun» shiori ostida turli targʻibot tadbirlari oʻtkazildi. Tegishli tashkilotlarning masʼul xodimlari taʼlim muassasalari va mehnat jamoalarida xotin-qizlar bilan uchrashib, «Biz zoʻravonlikka qarshimiz», «Zoʻravonlikka qarshi 16 kun» mavzularida maʼruza va seminar-treninglar tashkil etildi.

Amudaryo tumanida ham barcha hududlarda xuddi shunday tadbirlar oʻtkazilib, xotin-qizlarni tazyiq va zoʻravonlikdan himoya qilishga qaratilgan normativ-huquqiy hujjatlar va ayni kunlarda olib borilayotgan chora-tadbirlar toʻgʻrisida batafsil tushuntirishlar berib borildi.

2-dekabr kuni 15-sonli umumtaʼlim maktabida ham “Zoʻravonlikka qarshi 16 kun” shiori ostida “Biz zoʻravonlikka qarshimiz” deb nomlangan tadbir oʻtkazildi. Tadbirda tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova, tuman Xalq taʼlimi boʻlimi masʼullari va maktab psixologlari qatnashdilar.

Tadbirda ishtirok etish uchun kelgan masʼullar maktab hovlisidan kutib olindi va ularga oʻquvchilar oʻzlari yod olgan Vatanni madh etuvchi sheʼrlarini ifodali aytib berdilar. Shundan soʻng, maktabning “Mehribonlik” deb nomlangan birinchi qavatida “Hayot goʻzal chunki unda men borman” mavzusida oʻquvchilar ishlagan turli suratlar va qoʻl mehnati mahsullaridan tashkil etilgan koʻrgazma tomosha qilindi. Maktabning ikkinchi qavatidagi “Zoʻravonlikka yoʻl qoʻymaslik”, “Oʻzbekiston – Vatanim mening” burchaklarida esa turli xildagi zoʻravonlikni talqin qiluvchi suratlar bilan tanishdilar.

Maktabning uchinchi qavatidagi “Kechirish” deb nomlangan burchagi har kimni biroz toʻxtab, kimni, qachon xafa qilganini eslashga, shu insonni uchratganda undan kechirim soʻrash kerakligini anglashga, his qilishiga chorlaydigan qilib bezatilganligi bilan barchaga manzur boʻldi. Pozitiv, yaʼni “Mehr va tabassum” qavatida esa “Mening kayfiyatim”, “Orzular daraxti”, “Baxtli bolalik” kabi burchaklar tashkil qilingan. Tadbirga tashrif buyurganlar ushbu qavatdagilar bir-birlariga bolalikni eslatib xushkayfiyat, mehr ulashayotganlarining, orzu-umidlar roʻyobi uchun intilishga chorlayotganlarining guvohi boʻldilar. Maktabning 5-sinf oʻquvchilari ishtirokida oʻtkazilgan ertak terapiya mashgʻuloti ham barchaga nihoyatda manzur boʻldi.

Shundan soʻng, umumiy tadbir boshlab yuborildi. Tadbir davomidagi maʼruzalarda har yili dunyo miqyosida 25-noyabrdan 10-dekabrgacha “Zoʻravonlikka qarshi 16 kun” ostida turli tadbirlar oʻtkazilishi, Oʻzbekistonda fuqarolarni zoʻravonlikdan himoyalash, har qanday zoʻravonlikka munosib jazo tayinlash milliy qonunchiligimizda qatʼiy belgilab qoʻyilgani xususida soʻz yuritildi.  Shuningdek, zoʻravonlikka qarshi kurashish, xotin-qizlarning huquqlarini himoya qilish, zoʻravonlikdan jabr koʻrgan ayollarni reabilitatsiya qilish institutlari faoliyatini qoʻllab-quvvatlash, bu borada ilgʻor xorijiy tajribani oʻrganish va milliy amaliyotga joriy etish boʻyicha keng koʻlamli ishlar olib borilayotgani alohida taʼkidlab oʻtildi.

Oʻquvchilar tomonidan tayyorlangan musiqiy chiqishlar namoyish etilganidan soʻng, “Tayoqcha soyabon oʻyini”, ”Yarashtirib qoʻyish rolli oʻyini”, ”Xalqadan oʻtish oʻyini” kabi trening mashgʻulotlar tashkil etildi. Trening mashgʻulotlar orqali oʻquvchilar qalbida kechirimlilik, rahmdillik, mehr-oqibat tuygʻulari, ular oʻrtasidagi doʻstona munosabatlar mustahkamlashga erishildi.

“Biz zoʻravonlikka qarshimiz” nomi bilan oʻtkazilgan ushbu keng koʻlamli tadbir har bir ishtirokchida katta taassurot qoldirgani bilan nihoyatda ahamiyatli boʻldi.

M.Jumaniyozova, 15-sonli maktab psixologi.