Суд-ҳуқуқ соҳаси масъуллари ёшлар билан учрашди

Ёшлар ҳафталиги доирасида суд-ҳуқуқ соҳаси масъуллари томонидан ёшларнинг ҳуқуқий саводхонлигини ошириш, суд-ҳуқуқ соҳасидаги ислоҳотларни ёшларга таништириш, ёш авлодни қонунларга ҳурмат руҳида тарбиялаш, улар ўртасида ҳуқуқбузарликларни олдини олиш  мақсадида тадбирлар ташкил этилди.  

21 декабрь куни 76-сонли мактабда ҳафталик доирасида ёшлар билан ўтказилган учрашувда Жиноят ишлари бўйича Амударё тумани суди раиси Жасур Ўразбоев, Фуқаролик ишлар бўйича туман суди раиси Қайрулла Атамурадов,   Ёшлар ишлари Агентлиги туман бўлими бошлиғи Жасур Давлетов,  туман прокурори ёрдамчиси Аббаз Ниязимбетов,  Юридик хизмат кўрсатиш маркази  бош юристконсульти Журъат Авезовлар иштирок этдилар.

Учрашувда юртимизда ёшларнинг билим олишлари учун яратилган муносиб шароитлар, шунга яраша эртамиз эгалари доимо олдинга интилиши, билимга чанқоқлик, меҳнатсеварлик фазилатларини шакллантиришлари лозимлиги, китобга меҳр қўйишлари, ўз билим ва маънавиятини ошириб боришлари, ёт ғояларга берилмаслик кераклиги ҳақида сўз юритилди. Шунингдек, Президентимиз ташаббуслари билан мамлакатда жиноятчиликнинг олдини олиш, унга қарши кескин курашиш чора-тадбирлари кўрилаётгани, инсонпарварлик тамойиллари кенг тадбиқ этилаётган бир вазиятда, айрим ёшлар томонидан жиноят ҳамон содир этилаётгани таъкидлаб ўтилди. Бундай ҳолатларнинг олдини олишда ёшларнинг муаммоларини аниқлаш ва ечимини топиш, улар ўртасида ҳуқуқбузарлик профилактикаси, жиноятчиликни олдини олиш, ватанпарварлик руҳида тарбиялашнинг муҳим аҳамият касб этиши эътироф этилди.

Суд-ҳуқуқ соҳаси масъуллари коррупция ва порахўрликдек ёмон иллатларнинг олдини олиш учун аввало таълим соҳасига эътиборимизни қаратиб, тартиб-интизомни кучайтириш лозимлиги ҳақида ҳам тушунтиришлар бериб ўтдилар.

 Шу куни Бойовул маҳалла фуқаролар йиғини биносида сайёр суд мажлиси ҳам ўтказилди. Суд мажлисида Жиноят ишлари бўйича туман суди раиси Жасур Ўразбоев, туман прокурори ёрдамчиси Аббаз Ниёзимбетов, туман ички ишлар органлари Пробация гуруҳи катта инспектори Руслан Искандаровлар иштирок этишди.

Сайёр судда туман Ички ишлар органлари Пробация гуруҳи томонидан 6 нафар маҳкумга нисбатан киритилган тақдимномалар кўриб чиқилди.

Суд давомида илгари ёлғон хабар бериш, ўғирлик, қўшмачилик, транспорт воситалари ҳаракати ёки улардан фойдаланиш хавфсизлиги қоидаларини бузиш каби жиноятларни содир этганлиги учун жазога маҳкум этилган, айни пайтда Пробация гуруҳи назоратида бўлган 5 нафар маҳкумнинг ўтган давр мобайнида муносиб хулқ-атворда бўлгани, жазони ўташ тартиб-қоидаларига амал қилиб, суд томонидан зиммасига юклатилган мажбуриятларни бажаргани маълум қилинди. Меҳнатга ҳалол муносабатда бўлгани учун ушбу маҳкумлар ўталмаган жазо муддатидан Ўзбекистон Республикаси Жиноят кодексининг 73-моддасига асосан муддатидан илгари шартли равишда озод қилинди.

Аммо берилган имкониятдан тўғри фойдаланмасдан, тайинланган жазони ўташдан қасддан бўйин товлаб юрган 1 нафар маҳкум жазо ўташдан бўйин товлаб келганлиги ва номаълум томонга яширингани сабабли унга нисбатан белгиланган жазо оғирроқ турдаги, яъни озодликдан маҳрум қилиш жазосига алмаштирилди. Шундан сўнг, шартли равишда озод этилган шахсларга ўталмасдан қолган жазо муддати давомида туман ички ишлар органлари Пробация гуруҳи назорати остида туришлари, ҳар ойда бир марта Пробация гуруҳи суҳбатидан ўтиши, қайта жиноят ва маъмурий ҳуқуқбузарлик содир этмаслик, жамиятда юриш-туриш қоидаларига тўлиқ амал қилишлари юзасидан профилактик тушунтиришлар бериб ўтилди.

Пробация гуруҳи назоратида турган шахслар назорат даври мобайнида ўзини яхши хулқ-атвори, меҳнатга ҳалол муносабати орқали кўрсатса, судда ҳамиша уларнинг ҳақ-ҳуқуқи ҳимоя қилинади ва адолатли ҳукм чиқарилади.

О.Худойберганова.