“ОМАД ШОУ”ДА ОМАДИ КЕЛГАН ОТАХОНГА “ДАМАС” АВТОМАШИНАСИ ТОПШИРИЛДИ
Ўзбекистон дея аталмиш ушбу табаррук заминда аждодларимиз бир-бирига меҳр-оқибатли, ғамхўр бўлиб умргузаронлик қилиб келишган. Ҳозирги кунда ҳам яқин қўшничилик, бир-бировни йўқлаб туриш, қувончларини бирга баҳам кўришдек боқий қадриятлар ҳаётимизга файз, маъно-мазмун бахш этмоқда.
Юртдошларимиз Янги 2022 йилни кутишга улкан тадориклар кўраётган байрам арафаси кунларининг бири Манғит шаҳрининг Янгиобод маҳалласида истиқомат қилувчи Соатбой Отажонов хонадони қувончли воқеа сабаб дўст-биродарлар яқинлар билан гавжум бўлди. Боиси, хонадон соҳиби Соатбой ака Ўзбекистон миллий телерадиокомпаниясининг “Менинг юртим” телеканали эфирга узатилаётган “Омад шоу” ўйинида иштирок этиб, “Дамас” автомашинасини ютиб олди.
Ўйинни томоша қилган яқинлар Соатбой Отажоновни уйига қайтганида қувониб қарши олишди ва ютуқ билан қутлашди.
Соатбой Отажонов ҳам, аёли Тўхтажон опа ҳам ўғил-қизларини уйли-жойли қилиб, неваралар қизиқларини кўриб ўтирган элда азиз инсонлар. Соатбой ота Янгиобод кўчаси кўчабошчиси. Отахон ўзи масъул бўлган ҳудуд хонадонлар тинч-осойишталиги, оилалар мустаҳкамлиги, шу оилаларда вояга етаётган ёш авлод камолининг чинакам фидойиси. Тўй-маъракаларни ортиқча чиқимларсиз, исрофгарчиликларсиз ўтказиш учун жон куйдиради, меъёрда ўтказишга бош-қош бўлади. Шунданми, маҳаллада обрў-эътибори баланд. Фарзанди, келини ҳам касбли, одобли.
Шу боисдан хушхабардан қувонганлар ҳам, қутлаганлар ҳам кўп бўлди. Шу йил 6 январь куни отахоннинг уйида ҳақиқий байрам бўлди: “Дамас” автомашинаси телеўйин қоидасига кўра, тантанали равишда ғолибнинг уйига келган ҳолда топширилди.
Ютуқ-машинани “Омад шоу” телеўйини ижодкорларининг ҳовлиси олдига ҳайдаб келишини қўни-қўшнилар, қариндошлар, дўст-биродарлар қувонч билан қарши олдилар. Машина калитининг ютуқ эгасига топширилиши қарсаклар билан олқишланди.
Байрам шукуҳи сўнмаган кунларнинг бирида оиласини шодликларга белаган ютуқ машина калитини қўлига олган Соатбой Отажонов телеўйин ташкилотчиларига, қувончига шерик бўлиш учун хонадонига ташриф буюрган қариндошлари, маҳалладошлари ва дўст-биродарларига чуқур миннатдорчилик билдирди, барчага ҳам шундай ютуқлар насиб этишини тилади.
У анчадан бери ушбу телеўйинда иштирок этиш ҳуқуқини берувчи маҳсулотларни аввало сифатлилиги учун невараларига харид қилар, стекерини телеўйинга ҳам СМС тарзида жўнатиб турар эди.
Отахоннинг невараларига атаб олган ширинликлари эвазига ана шундай ютуққа сазовор бўлгани ҳавас қилса, арзийди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
