56-сонли мактабда чақириққа қадар бошланғич тайёргарлик фани намунавий тарзда ўқитилмоқда

Ёшларни ватанпарвар инсонлар қилиб тарбиялаб, вояга етказишда халқимизнинг тарихий-маънавий мероси жуда катта аҳамиятга эга. Шу сабабли тарихий-маънавий меросни асраб-авайлаш, ўрганиш, уни ўз тажрибаларимиз, ҳаётий фаолиятимиз, миллий ғоямизга содиқлигимиз орқали келажак авлодларга бус-бутун қолдириш давлатимиз сиёсатининг устувор вазифаларидан бирига айланган.

Хусусан, 2018 йил 23 февралда эълон қилинган “Ёшларни ҳарбий ватанпарварлик руҳида тарбиялаш концепцияси”да ёшларни миллий ғоя ва Ватанга садоқат руҳида тарбиялаш, уларнинг қалби ва онгига Ватан ҳимоя си шарафли ва муқаддас бурч эканини чуқур сингдириш, қадимий тарихимиз ва маданиятимиз, жонажон Ватанимизнинг мустақиллиги ва равнақи йўилда фидокорона курашган миллий қаҳрамонларимиз билан фахрланиш, уларга муносиб бўлиш туйғусини шакллантириш асосий вазифалар этиб белгиланган.

Шу нуқтаи назардан келиб чиқиб, умумтаълим мактабларида жорий этилган чақириққа қадар бошланғич тайёргарлик фани Ватанимизнинг бўлғуси ҳимоячиларини ватанпарварлик руҳида тарбиялашда муҳим ўрин тутади.

Бу борада бизнинг 56-сонли умумтаълим мактабида чақириққа қадар бошланғич тайёргарлик фани ўтиладиган 10-11-синфлар ўқувчилари иштирокида Конституциявий ҳуқуқ, Ватанга бўлган  меҳр-муҳаббат мавзуларига бағишланган дарс-машғулотлар, дарсдан ташқари давра суҳбатлари ўтказилиб, бу машғулотлар ва суҳбатлар жараёнида ўқувчи-ёшларнинг шахсий фикр ва мулоҳазаларига асосий эътибор қаратилади. Чунки бўлғуси Ватан ҳимоячиси аввало бой тарихий-маънавий меросимизни пухта билиши, ҳам маънан, ҳам жисмонан етуклик сари интилиб яшаши ва бунга албатта эришиши зарур.

Дарс жараёнида Қуролли Кучларимизнинг ҳарбий салоҳияти, замонавий ҳарбий техникалар билан муфассал таништириб борилади. Бундан ташқари, эпчиллик, кучлилик, заковат баҳслари, сафда юриш, сафда туриш, қоматни ростлаш машқлари орқали ўқувчи-ёшлар ўзларининг ҳарбий ҳаётга қизиқишларини, она Ватан ҳимоячиси бўлишдек шарафли ва муқаддас бурчларига садоқат туйғуларини амалда намоён этишга ҳаракат қиладилар.

Мактабимизнинг 10-синфида 73 нафар, 11-синфида 58 нафар ўқувчи таълим-тарбия олишади. Шуниси эътиборлики, уларнинг деярли ярмидан кўпи ҳарбий соҳага қизиқибгина қолмай, ҳарбий Низомларни ҳам қунт билан ўрганишмоқда.

Назарий машғулотлардан ташқари, ўқувчи-ёшлар иштирокида фавқулодда вазиятларда, айниқса, тезкор қутқарув ишларида ўзини қандай тутишлари юзасидан амалий-тажриба машқлари ҳам амалга оширилиб, уларнинг кўникмалари синовдан ўтказилиб борилади. Бу борада мактабда  ташкил этилган “Бўлажак ёш ҳарбийлар” ва “Темурбеклар” тўгараклари муҳим аҳамият касб этади.

Ўсиб келаётган ёш авлодни миллий истиқлол ғоялари асосида тарбиялаш мақсадида 5-6-синфлар ўқувчилари учун ташкил этилган “Бўлажак ёш ҳарбийлар” тўгараги мунтазам фаолият олиб боради. Асосан 10-11-синфлар ўқувчилари билан машғулотлар олиб бориладиган “Темурбеклар” тўгараги машғулотларининг қизиқарли ва жанговар руҳда ўтказилишига  алоҳида эътибор қаратилади. Шу боис, мактаб ўқувчилари Мудофаага кўмаклашувчи “Ватанпарвар” ташкилоти томонидан ўтказиладиган ҳарбий-спорт мусобақаларининг ҳудудий ва туман босқичларида фахрли ўринларни эгаллаб келмоқда.

Мактабимиз ўқувчилари орасида “Темурбеклар” мактаби курсантлари борлиги эса қалбимизда фахр уйғотади. Ўтган 2021 ўқув йилида 9-синфни тугатган собиқ ўқувчиларимиздан бири Жавоҳир Раҳимбоев Давлат хавфсизлик хизматига қарашли “Темурбеклар” мактаби курсанти бўлди.

Бугунги ёшлар бўлғуси она Юрт посбонлари, Ватан келажаги учун масъул, Президентимиз таъбири билан айтганда: “Янги Ўзбекистоннинг тоза қонлари!” Уларни Ватанга, тарихий-маънавий меросимизга садоқатли, матонатли ва жасоратли инсонлар қилиб тарбиялаш биз – чақириққа қадар  тайёргарлик фани ўқитувчиларининг зиммамиздаги юксак масъулиятдир.

Юсуфбой АЛЛАБЕРГАНОВ, 56-сонли мактабнинг чақириққа қадар тайёргарлик фани ўқитувчиси.