56-sonli maktabda chaqiriqqa qadar boshlangʻich tayyorgarlik fani namunaviy tarzda oʻqitilmoqda

Yoshlarni vatanparvar insonlar qilib tarbiyalab, voyaga yetkazishda xalqimizning tarixiy-maʼnaviy merosi juda katta ahamiyatga ega. Shu sababli tarixiy-maʼnaviy merosni asrab-avaylash, oʻrganish, uni oʻz tajribalarimiz, hayotiy faoliyatimiz, milliy gʻoyamizga sodiqligimiz orqali kelajak avlodlarga bus-butun qoldirish davlatimiz siyosatining ustuvor vazifalaridan biriga aylangan.

Xususan, 2018-yil 23-fevralda eʼlon qilingan “Yoshlarni harbiy vatanparvarlik ruhida tarbiyalash kontseptsiyasi”da yoshlarni milliy gʻoya va Vatanga sadoqat ruhida tarbiyalash, ularning qalbi va ongiga Vatan himoya si sharafli va muqaddas burch ekanini chuqur singdirish, qadimiy tariximiz va madaniyatimiz, jonajon Vatanimizning mustaqilligi va ravnaqi yoʻilda fidokorona kurashgan milliy qahramonlarimiz bilan faxrlanish, ularga munosib boʻlish tuygʻusini shakllantirish asosiy vazifalar etib belgilangan.

Shu nuqtai nazardan kelib chiqib, umumtaʼlim maktablarida joriy etilgan chaqiriqqa qadar boshlangʻich tayyorgarlik fani Vatanimizning boʻlgʻusi himoyachilarini vatanparvarlik ruhida tarbiyalashda muhim oʻrin tutadi.

Bu borada bizning 56-sonli umumtaʼlim maktabida chaqiriqqa qadar boshlangʻich tayyorgarlik fani oʻtiladigan 10-11-sinflar oʻquvchilari ishtirokida Konstitutsiyaviy huquq, Vatanga boʻlgan  mehr-muhabbat mavzulariga bagʻishlangan dars-mashgʻulotlar, darsdan tashqari davra suhbatlari oʻtkazilib, bu mashgʻulotlar va suhbatlar jarayonida oʻquvchi-yoshlarning shaxsiy fikr va mulohazalariga asosiy eʼtibor qaratiladi. Chunki boʻlgʻusi Vatan himoyachisi avvalo boy tarixiy-maʼnaviy merosimizni puxta bilishi, ham maʼnan, ham jismonan yetuklik sari intilib yashashi va bunga albatta erishishi zarur.

Dars jarayonida Qurolli Kuchlarimizning harbiy salohiyati, zamonaviy harbiy texnikalar bilan mufassal tanishtirib boriladi. Bundan tashqari, epchillik, kuchlilik, zakovat bahslari, safda yurish, safda turish, qomatni rostlash mashqlari orqali oʻquvchi-yoshlar oʻzlarining harbiy hayotga qiziqishlarini, ona Vatan himoyachisi boʻlishdek sharafli va muqaddas burchlariga sadoqat tuygʻularini amalda namoyon etishga harakat qiladilar.

Maktabimizning 10-sinfida 73 nafar, 11-sinfida 58 nafar oʻquvchi taʼlim-tarbiya olishadi. Shunisi eʼtiborliki, ularning deyarli yarmidan koʻpi harbiy sohaga qiziqibgina qolmay, harbiy Nizomlarni ham qunt bilan oʻrganishmoqda.

Nazariy mashgʻulotlardan tashqari, oʻquvchi-yoshlar ishtirokida favqulodda vaziyatlarda, ayniqsa, tezkor qutqaruv ishlarida oʻzini qanday tutishlari yuzasidan amaliy-tajriba mashqlari ham amalga oshirilib, ularning koʻnikmalari sinovdan oʻtkazilib boriladi. Bu borada maktabda  tashkil etilgan “Boʻlajak yosh harbiylar” va “Temurbeklar” toʻgaraklari muhim ahamiyat kasb etadi.

Oʻsib kelayotgan yosh avlodni milliy istiqlol gʻoyalari asosida tarbiyalash maqsadida 5-6-sinflar oʻquvchilari uchun tashkil etilgan “Boʻlajak yosh harbiylar” toʻgaragi muntazam faoliyat olib boradi. Asosan 10-11-sinflar oʻquvchilari bilan mashgʻulotlar olib boriladigan “Temurbeklar” toʻgaragi mashgʻulotlarining qiziqarli va jangovar ruhda oʻtkazilishiga  alohida eʼtibor qaratiladi. Shu bois, maktab oʻquvchilari Mudofaaga koʻmaklashuvchi “Vatanparvar” tashkiloti tomonidan oʻtkaziladigan harbiy-sport musobaqalarining hududiy va tuman bosqichlarida faxrli oʻrinlarni egallab kelmoqda.

Maktabimiz oʻquvchilari orasida “Temurbeklar” maktabi kursantlari borligi esa qalbimizda faxr uygʻotadi. Oʻtgan 2021 oʻquv yilida 9-sinfni tugatgan sobiq oʻquvchilarimizdan biri Javohir Rahimboyev Davlat xavfsizlik xizmatiga qarashli “Temurbeklar” maktabi kursanti boʻldi.

Bugungi yoshlar boʻlgʻusi ona Yurt posbonlari, Vatan kelajagi uchun masʼul, Prezidentimiz taʼbiri bilan aytganda: “Yangi Oʻzbekistonning toza qonlari!” Ularni Vatanga, tarixiy-maʼnaviy merosimizga sadoqatli, matonatli va jasoratli insonlar qilib tarbiyalash biz – chaqiriqqa qadar  tayyorgarlik fani oʻqituvchilarining zimmamizdagi yuksak masʼuliyatdir.

Yusufboy ALLABERGANOV, 56-sonli maktabning chaqiriqqa qadar tayyorgarlik fani oʻqituvchisi.