БУРЧИГА САДОҚАТЛИ ҲАРБИЙ ХИЗМАТЧИ

Ватан бизга аждодларимиздан мерос қолган қутлуғ маскан, азиз тупроқ. Уни асрамоқ, ҳар қарич ерини кўзга тўтиё айламоқ  шу юрт фарзандиман, деган инсон учун муқаддас бурч. Айниқса, юрт равнақи ва фаровонлиги йўлида хизмат қилиш ҳар биримиз учун ҳам фарз, ҳам қарздир.
Ватан ҳимоячиси бўлиш эса янада шарафли бурчдир. Киндик қони тўкилган Ватанни, мустақил юртни кўз қорачиғидай асраб-авайлаш инсон учун гўё ўз оиласини, шаънини, ор-номусини, имон-эътиқодини ҳимоя қилиш кабидир. Ҳеч шубҳасиз, бугунги кунда Ўзбекистон Республикаси Давлат хавфсизлик хизмати Чегара қўшинлари сафида хизмат қилиш, Ватан остонаси дахлсизлигини таъминлаш ҳар бир йигит учун улкан орзу ва мақсадга айланган. Юртимизда ана шундай бурчига садоқат билан хизмат қилаётган, касбини  шарафлаб келаётган ҳарбий хизматчилар сафи тобора ортмоқда.
Айни пайтда Амударё туманидаги ДХХ Чегара қўшинларига қарашли ҳарбий қисмда хизмат қилиб келаётган катта сержант Ҳамза Хўжаниёзовнинг соҳадаги фаолияти 20 йилдан ошиб қолди. Бурчига садоқат билан хизмат қилиб келаётган Ҳазма Хўжаниёзов эл-юртда тинчлик-хотиржамлик ҳукмрон бўлишига муносиб ҳисса қўшиб келмоқда.
Ҳамза Хўжаниёзов Хоразм вилоятининг Хонқа туманида туғилиб, вояга етди. Ёшлигидан ҳарбий соҳага қизиқиши кучли бўлган бу йигит 2000 йилда ўрта мактабни тамомлаб, эзгу ниятларини амалга ошириш мақсадида ДХХ Чегара қўшинларига қарашли ҳарбий қисмлардан бирида муддатли ҳарбий хизматни ўтади. Муддати тугагач, ҳарбий қисмда шартнома асосида яна хизмат қила бошлади. У бу давр мобайнида намунали интизоми билан барчага ўрнак бўлди. Ўқув машғулотлари ва жамоатчилик ишларида фаол қатнашиш билан бирга Республика миқёсида ўтказилган ҳарбий мусобақаларда кўплаб соврин ва медаллар соҳибига айланди.
У бугунги кунда ҳам ўзининг билим ва кўникмаларини, илғор тажрибасини “Устоз-шогирд” анъаналарига содиқ қолган ҳолда ёш ҳарбий хизматчиларга ўргатмоқда. Шу билан бирга у чегара олди ҳудудларда жойлашган умумтаълим мактабларида тадбирлар ташкил этиб, фаоллик кўрсатмоқда. Ўқувчи-ёшларга мамлакатимизда мудофаа қудратини юксалтириш, ҳарбийларнинг хизматни аъло даражада адо этишлари учун яратилган шарт-шароит, кўрсатилаётган эътибор ва ғамхўрлик хусусида кенг маълумотлар бериб, ёшларнинг ватанпарварлик туйғуларини мустаҳкамламоқда, ҳарбийликка бўлган қизиқишларини оширмоқда.
Бугунгидек тинч, хотиржам ҳаётимиз Қуролли Кучларимиз томонидан ишончли тарзда ҳимоя қилинмоқдаки, мана шундай масъулиятли бурчини сидқидилдан адо этаётган, тараққиётимиз барқарорлигига камарбаста бўлаётган барча ҳарбийлар эъзозлашга, шарафлашга лойиқдир.

О.ХУДОЙБЕРГАНОВА.
Суратда: тумандаги ДХХ чегара қўшинларига

қарашли ҳарбий қисм хизматчиси Ҳ.Хўжаниёзов (чапда).