ПРОКУРОР ВА ЁШЛАР УЧРАШУВИ ДАВОМ ЭТМОҚДА

27 январь куни Амударё туманининг Янгиобод маҳалласи ҳудудидаги 40-сонли мактабда прокурор ва ёшлар учрашуви тадбири ташкил этилди.

Тадбирда туман прокурори Жавлонбек Муфтуллаев, туман Халқ қабулхонаси мудири Эркин Ражапов, Ёшлар иттифоқи туман Кенгаши раиси Сардор Исмоилов ҳамда Янгиобод, Дўстлик маҳаллаларида истиқомат қилувчи 35 нафар фаол ёшлар қатнашишди.

Сайёр қабул тарзида ўтказилган мазкур учрашувдан кўзланган мақсад, ёшларнинг ҳуқуқий салоҳиятини янада ошириш, ижтимоий-сиёсий фаоллигини қўллаб-қувватлаш, муаммоларини тинглаш ва ижобий ҳал этилишига кўмаклашишдан иборатдир.

Учрашувда Жавлонбек Муфтуллаев ёшларга қарата мурожаат қилар экан, мамлакатимизда ёшларнинг юксак марраларни эгаллашлари учун яратилаётган шарт-шароитлар, чексиз имкониятлар мавжудлиги ҳақида тўхталиб, ёшларни ўқиб билим олишга, шижоат билан олға интилишга чорлади. Ҳамда суҳбат давомида ёшларнинг прокуратура органлари фаолиятига доир қизиқтирган саволларига мисоллар билан жавоб қайтарди.

Эркин мулоқот тарзида ўтган учрашувда ёш авлод вакиллари туман прокурорига ўз режалари, мақсад ва интилишларини баён этишди. Ўз навбатида туман прокурори бугунги кунда ёшларнинг янада фаол бўлишига ва келгусида мамлакат равнақига муносиб ҳисса қўшишлари учун ҳаётий тажрибсидан келиб чиқиб, ўз таклиф ва маслаҳатларини берди.

Туман Халқ қабулхонаси мудири Эркин Ражапов эса бугунги кунда ёшларни қийнаётган муаммо ва камчиликлар билан мурожаат қилишларида ҳеч қандай тўсиқлар йўқлигини, қабул қилинган мурожаатлар албатта, ижобий натижалар беришини айтиб ўтди.

Фаол ёшлардан Мансурбек Алламберганов юқоридаги сўзларнинг тасдиғи сифатида Олий ўқув юртида таълим олиши учун контракт пулининг 30 фоизини қоплаб беришда амалий ёрдам берганлиги учун туман прокурорига миннаддорлик билдирди.

Шундан сўнг ёшлардан келиб тушган мурожаатлар тингланди. Мурожаатлар мазмуни асосан имтиёзли кредит олиш, бандлик, ер ажратилиши масалаларида бўлди.

Бундан ташқари, Олий таълим муассасасида таълим олувчи фаол ёшлардан бири Хурсанд Ортиқбоевнинг “Ёшлар келажаги” телеграм - боти ишлаб чиқилиши бўйича билдирган таклифи қабул қилинди. Ҳамда тадбиркорлик қилиш истагидаги ёшлардан бири, Дастон Мурадовга “е-auksion” орқали ер олиш тартиби бўйича тушинчалар бериб ўтилди.

Учрашув давомида ёшлардан 6 та мурожаат ва таклифлар келиб тушди. Қабул қилинган мурожаатлар ижроси тез орада ҳал қилиниш маълум этилди. Учрашув сўнгида туман прокурори ёшларга келажакдаги ишларига омад тилаб, туман прокуратураси доимо ёшлар билан бирга эканлиги, идора эшиклари ёшлар учун ҳамиша очиқ эканлигини таъкидлади.

Ф.Эшимбетова