ИМКОНИЯТИ ЧЕКЛАНГАН ЁШЛАРГА МУНОСИБ ШАРОИТЛАР ЯРАТИЛМОҚДА
Инсонлар ўртасида ўзаро меҳр-оқибат, биродарлик барқарор бўлиши учун курашиш, беғараз ёрдам бериш халқимизнинг азалий қадриятларидандир. Шунингдек, имконияти чекланганларга кўмаклашиш, уларни моддий ва маънавий қўллаб-қувватлаш, имкон даражасида меҳнатга жалб қилиш, ҳаётимизнинг барча жабҳаларида фаол иштирок этишларига шароит яратиш, уларнинг ҳақ- ҳуқуқларини ҳимоя қилишда Ўзбекистон Ногиронлар жамияти кўпгина саъй-ҳаракатларни амалга оширмоқда. Жамиятнинг туман бўлинмасида ҳам туманимизда истиқомат қилувчи имконияти чекланган, ногиронлиги бўлган фуқароларни қўллаб-қувватлаш, ҳолидан хабар олиб, моддий-маънавий кўмак бериш каби савобли ишлар доимий олиб борилмоқда.
Аввало шуни таъкидлаш керакки, ўтган йиллар мобайнида бўлинма Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятини қўллаб-қувватлаш жамоат фонди таъсис этган грант танловларида ўзининг имконияти чекланган фуқароларни касб-ҳунарга ўқитиш, ўқитиш ва малакасини ошириш каби бир неча лойиҳалари билан қатнашиб, ғолиб бўлди ва муваффақиятли амалга оширди. Натижада туманимизда имконияти чекланган ёшларга ўзларининг қобилиятларини намойиш этишларига шароит яратилди, кутубхона ташкил этилиб, илк бор кўзи ожиз фуқаролар учун ҳам китоблар келтирилди, тикувчилик цехи фаолияти йўлга қўйилди.
2021 йил давомида ҳам Ногиронлар жамияти туман бўлинмаси ҳисобида турадиган, ногиронлиги бўлганларнинг жамиятимизга фаол аралашувига эришишга, ислоҳотларда дахлдорлигини таъминлашга алоҳида эътибор қаратилди. Йил мобайнида улар учун 7 марта маданий-маърифий тадбирлар ўтказилди, 5 марта турли спорт мусобқалари ташкил этилди, 2 нафар мустақил ҳаракатланиш имкониятига эга бўлмаганларга ногиронлик аравачаси топширилди, 182 нафарига озиқ-овқат маҳсулотлари, кийим-кечаклар берилди. Шунингдек, икки нафар ногиронлиги бўлган қизлар Нукус шаҳрида ўтказилган “Биз биргамиз” деб номланган тадбирда бўлинма номидан қатнашиб, ўзларининг ҳунармандчилик намуналари кўргазмасини намойиш этиб, улкан таассуротлар билан қайтди.
Бўлинма Нодавлат нотижорат ташкилотларини қўллаб-қувватлаш жамоат фонди ва Ўзбекистон Нодавлат нотижорат ташкилотлари миллий ассоциацияси томонидан эълон қилинган “Янги Ренессанс иштирокчилари” грант танловида “Жисмоний имконияти чекланган ўсмирлар ва ёшларни интеллектуал меҳнат фаолиятига жалб қилиш” номли лойиҳаси билан қатнашиб, ғолиб бўлди.
Албатта, бу ютуқ келгусида бўлинмада жисмоний имконияти чекланган ёшларнинг ўз иқтидорларини намоён этишларига кўмаклашиш, интеллектуал меҳнат фаолиятига жалб этиш борасида кўпгина имкониятлар яратилишига асос бўлади.
Аслида бўлинма фаолияти жисмоний имконияти чекланган шахсларнинг тўлақонли бахтиёр яшашларига, уларнинг ҳам ҳеч кимдан кам бўлмай, ўқиб-илм олиб, фойдали меҳнат билан шуғулланишларига шароит яратиш, зарур ҳолларда моддий-маънавий қўллаб-қувватлашга қаратилгандир.
Нилуфар ХОЛБОЕВА, Ногиронлар жамияти Амударё туман бўлинмаси раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
