36-СОНЛИ МАКТАБДА НАФОСАТ ВА ГЎЗАЛЛИК БАЙРАМИГА БАҒИШЛАНГАН ТАДБИР ЎТКАЗИЛДИ
Тароватли баҳор юртимизга ўз гўзалликлари билан бирга байрамларни ҳам бошлаб келади. Кўкламнинг илк кунида атоқли шоира Зулфияхонимнинг таваллуд куни нишонланса, 8 мартда нафосатли аёл-қизлар байрами, шундан сўнг, Наврўзи олам ва бошқа байрамлар давом этади. Айниқса, 8-март – Халқаро хотин-қизлар куни муносабати билан ўтказиладиган тадбирлар барчага кўтаринки кайфият бахш этиб, навбатдаги байрамлар тадорикларига уланиб кетади.
7 март куни барча ҳудудлардаги каби 36-сонли мактабда ҳам 8 март – Халқаро хотин-қизлар кунига бағишланган байрам тадбири бўлиб ўтди. Байрам тадбирига мактабда фаолият олиб бораётган барча аёллар ва ўқувчи-қизлар таклиф этилди.
Тадбирни ўқув ишлар бўйича директор ўринбосари Сарвар Қутлимуродов очиб берди ва асрлар давомида халқимиз томонидан оналарни, аёл-қизларни эъзозлаш эзгу қадриятлардан бири сифатида алоҳида қадрланишини, меҳр-оқибат ва одамийликнинг илк сабоқлари ҳар биримизнинг юрагимизга она алласи билан кириб, ҳаёт сўқмоғи ва турмуш дарси, оила тотувлиги меҳрибон оналаримиз тарбиясидан, опа-сингилларимиз муҳаббатидан бошланишни таъкидлаб ўтди.
Ундан ташқари, бугунги кунда мамлакатимизда хотин-қизларга берилаётган эътибор, кўрсатилаётган эҳтиром ва ғамхўрликлар ҳақида гапириб, айнан таълим соҳасида меҳнат қилаётган хотин-қизларнинг фаолиятлари ҳақида ижобий фикрлар айтиб, муносабат билдириб ўтди. Шунингдек, шу мактабда фаолият юритиб келаётган хотин-қизларни ушбу байрам билан чин юракдан қутлади. Уларни гўзаллик ва нафосат, самимийлик ва баҳор айёми билан муборакбод этиб, соғлик-саломатлик, оилавий бахт ва баҳорий гўзаллик тилади.
Шундан сўнг, мактабнинг бошланғич синфлари ўқитувчилари Насиба Бобожонова, Сарагул Юсупова, Малоҳат Раҳимова, Барно Матсапоева, Барчиной Хўжамуродова, Фарида Саидова, Барно Ибодуллаевалар томонидан ташкил этилган тадбирнинг бадиий-мусиқий қисми бошланди.
Баҳорий гуллар, безаклар билан безатилган саҳнада ўқувчилар аёл, оналарни улуғловчи шеърларни ифодали ёд айтиб бердилар. Шу мавзудаги қўшиқлар, дилрабо рақслар нафосат эгаларига янада кўтаринки кайфият бағишлади. Ўқувчилар “Онажон”, “Қизалоқ” қўшиқларини айтиб, “Баҳор вальси”, “Дўппи тикдим”, “Бинафша” рақсларини ижро этдилар. Айниқса, “Лазги” ва замонавий қўшиқлар рақслари барчага жуда манзур бўлди.
Тадбир давомида бошловчилик қилган ўқувчилар ҳам юртимизда Президентимиз бошчилигида хотин-қизларни қўллаб-қувватлаш давлатимизнинг асосий йўналишларидан бирига айлангани, Зулфия номидаги Давлат мукофоти мамлакатимиз иқтидорли қизларини аниқлаш, қўллаб-қувватлаш, рағбатлантириш, янги марралар сари ҳар соҳада етук бўлишларига замин яратаётгани, буни уларнинг илм-фан, таълим, соғлиқни сақлаш, ишлаб чиқариш, санъат, адабиёт ва бошқа соҳалар ривожига ўз ҳиссаларини қўшаётганликлари, етакчилар қаторига чиқаётганликлари мисолида кўриш мумкинлигини эътироф этдилар. Шунингдек, ўзларига қадрли бўлган устозларга, мактаб ўқувчи-қизларига ўзларининг самимий тилакларини билдириб, байрам билан табрикладилар.
Шундан сўнг, яна дилтортар куй-қўшиқлар ижро этилиб, барчага хушнудлик, баҳорий ва байрамона кайфият улашилди.
О.Худойберганова, 36-сонли мактабнинг ижодий-маданий масалалар бўйича тарғиботчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
