11-СОНЛИ МАКТАБДА НАВРЎЗ БАЙРАМИГА БАҒИШЛАНГАН САЙИЛ ЎТКАЗИЛДИ
Наврўзи олам – юртимизга баҳор тароватини, янгиланиш, ёшариш ва хурсандчиликни бошлаб, инсонларни гўзалликка, яхшиликка, эзгуликка, меҳр-оқибатга, хайру-саховатга чорлаб, қутлуғ пойқадамлари билан кириб келади. Авлоддан-авлодга ўтиб келаётган, бебаҳо меросга айланган Наврўз байрами ҳар бир гўша-ю, элда нишонланиб, барча инсонлар руҳига шодлик, қувонч улашади. Қадимдан бу байрам шарқона янги йилнинг бошланиши сифатида катта кенгликларда, адирлар-у далаларда қувончу-шодликлар билан нишонланган. Она табиат уйғонаётган паллада ўтказилган бундай сайиллар одамларга беқиёс руҳий ва маънавий қувват бағишлаган.
12 март куни ушбу азалий ва абадий, умумхалқ байрами муносабати билан Амударё туманидаги 11-сонли мактабда ҳам катта сайил ўтказилди. Байрам тадбирига ёши улуғ инсонлар, мактабда ишлаб нафақага чиққан устозлар таклиф этилди. Байрамона безатилган мактаб ҳовлисидаги сайил томошасига нафақат ўқитувчилар ва ўқувчилар, балки яқин-атрофдаги аҳоли ҳам ташриф буюрди.
Сайилда мактаб ўқувчилари рангли қоғозлардан гўзал гулларни ясашди, дарахтларни безатишди, мактаб ҳовлисини турли баҳорий, Наврўзга хос безаклар билан безатишди. Миллий ва баҳорий таомлардан байрам дастурхонини ҳам тортиқ этишди. Мактаб ҳовлисида катта дошқозон ўрнатилиб, ҳамжиҳатликда баҳорий ва миллий таом – гўжа пиширишга киришилди. Бу ишларга мактабнинг она тили ва адабиёт фани ўқитувчиси Эркиной Шомуродова ҳамда психологи Дилноза Шомуродова бош-қош бўлдилар.
Мактаб жамоаси биргаликда ташкил этган мазкур байрам сайлида мусиқий дастур намойиш этилиб, янада кўтаринкилик бахш этилди. Дастурни мактабнинг ижодий-маданий масалалар бўйича тарғиботчиси Мунира Камолова ва математика фани ўқитувчиси Ғафуржон Муҳаммадкаримовлар олиб боришди. Дастур доирасида ҳар бир синфнинг иқтидорли ўқувчилари томонидан тайёрлаган қўшиқлар, ажойиб миллий рақслар, туркий халқларнинг байрамга хос урф-одатларидан саҳна кўринишлари намойиш этилди. Тадбирга файз киритган мусиқий дастур барчага бирдек манзур бўлди. Айниқса, адрасу-атлас либослардаги қирқ кокилли қизалоқлар, оқ яктаг-у шойи қийиқчалардан белбоғ таққан, дўппилар кийган йигитчаларнинг жамоавий рақслари кўпчиликка хуш ёқди. Болажонларнинг юз-кўзидаги беғуборлик, баҳордек софлик ва гўзаллик ёш-у кексанинг кўнглига илиқлик олиб кирди.
Дошқозонда қайнаган баҳорий таом – гўжа ҳам тайёр бўлганидан кейин йиғилганларга тортиқ этилди ва мактаб яқинидаги аҳолига ҳам тарқатиб чиқилди. Сайилдаги хурсадчиликдан баҳраманд бўлган ёшу-қари дилидаги қувончини, наврўзий тилакларини изҳор этди. Элимизда тинчлик-осойишталик барқарор бўлишини, она заминимиз завол топмаслигини тилаб, шу кунларга етказганига шукроналар айтишди.
Наврўзи олам муносабати билан ташкил этилган мазкур тадбир орқали мактаб директори Улуғбек Мамутов ҳамда маънавий маърифий масалалар бўйича директор ўринбосари Қундузой Холмуродова бошчилигидаги барча ўқитувчилар жамоаси қадимий миллий қадриятларга садоқат билан ёндашаётганлигини, ёш авлодга шу руҳда таълим-тарбия бераётганини яна бир бор намойиш этишди.
Кўтаринки руҳда ўтказилган сайил нафақат қипчоқликлар, балки бутун аму элининг юксак маънавияти, гўзал фазилатлари, бир-бирига меҳр-оқибатини ўзида мужассам этди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
