11-SONLI MAKTABDA NAVROʻZ BAYRAMIGA BAGʻIShLANGAN SAYIL OʻTKAZILDI
Navroʻzi olam – yurtimizga bahor tarovatini, yangilanish, yosharish va xursandchilikni boshlab, insonlarni goʻzallikka, yaxshilikka, ezgulikka, mehr-oqibatga, xayru-saxovatga chorlab, qutlugʻ poyqadamlari bilan kirib keladi. Avloddan-avlodga oʻtib kelayotgan, bebaho merosga aylangan Navroʻz bayrami har bir goʻsha-yu, elda nishonlanib, barcha insonlar ruhiga shodlik, quvonch ulashadi. Qadimdan bu bayram sharqona yangi yilning boshlanishi sifatida katta kengliklarda, adirlar-u dalalarda quvonchu-shodliklar bilan nishonlangan. Ona tabiat uygʻonayotgan pallada oʻtkazilgan bunday sayillar odamlarga beqiyos ruhiy va maʼnaviy quvvat bagʻishlagan.
12-mart kuni ushbu azaliy va abadiy, umumxalq bayrami munosabati bilan Amudaryo tumanidagi 11-sonli maktabda ham katta sayil oʻtkazildi. Bayram tadbiriga yoshi ulugʻ insonlar, maktabda ishlab nafaqaga chiqqan ustozlar taklif etildi. Bayramona bezatilgan maktab hovlisidagi sayil tomoshasiga nafaqat oʻqituvchilar va oʻquvchilar, balki yaqin-atrofdagi aholi ham tashrif buyurdi.
Sayilda maktab oʻquvchilari rangli qogʻozlardan goʻzal gullarni yasashdi, daraxtlarni bezatishdi, maktab hovlisini turli bahoriy, Navroʻzga xos bezaklar bilan bezatishdi. Milliy va bahoriy taomlardan bayram dasturxonini ham tortiq etishdi. Maktab hovlisida katta doshqozon oʻrnatilib, hamjihatlikda bahoriy va milliy taom – goʻja pishirishga kirishildi. Bu ishlarga maktabning ona tili va adabiyot fani oʻqituvchisi Erkinoy Shomurodova hamda psixologi Dilnoza Shomurodova bosh-qosh boʻldilar.
Maktab jamoasi birgalikda tashkil etgan mazkur bayram saylida musiqiy dastur namoyish etilib, yanada koʻtarinkilik baxsh etildi. Dasturni maktabning ijodiy-madaniy masalalar boʻyicha targʻibotchisi Munira Kamolova va matematika fani oʻqituvchisi Gʻafurjon Muhammadkarimovlar olib borishdi. Dastur doirasida har bir sinfning iqtidorli oʻquvchilari tomonidan tayyorlagan qoʻshiqlar, ajoyib milliy raqslar, turkiy xalqlarning bayramga xos urf-odatlaridan sahna koʻrinishlari namoyish etildi. Tadbirga fayz kiritgan musiqiy dastur barchaga birdek manzur boʻldi. Ayniqsa, adrasu-atlas liboslardagi qirq kokilli qizaloqlar, oq yaktag-u shoyi qiyiqchalardan belbogʻ taqqan, doʻppilar kiygan yigitchalarning jamoaviy raqslari koʻpchilikka xush yoqdi. Bolajonlarning yuz-koʻzidagi begʻuborlik, bahordek soflik va goʻzallik yosh-u keksaning koʻngliga iliqlik olib kirdi.
Doshqozonda qaynagan bahoriy taom – goʻja ham tayyor boʻlganidan keyin yigʻilganlarga tortiq etildi va maktab yaqinidagi aholiga ham tarqatib chiqildi. Sayildagi xursadchilikdan bahramand boʻlgan yoshu-qari dilidagi quvonchini, navroʻziy tilaklarini izhor etdi. Elimizda tinchlik-osoyishtalik barqaror boʻlishini, ona zaminimiz zavol topmasligini tilab, shu kunlarga yetkazganiga shukronalar aytishdi.
Navroʻzi olam munosabati bilan tashkil etilgan mazkur tadbir orqali maktab direktori Ulugʻbek Mamutov hamda maʼnaviy maʼrifiy masalalar boʻyicha direktor oʻrinbosari Qunduzoy Xolmurodova boshchiligidagi barcha oʻqituvchilar jamoasi qadimiy milliy qadriyatlarga sadoqat bilan yondashayotganligini, yosh avlodga shu ruhda taʼlim-tarbiya berayotganini yana bir bor namoyish etishdi.
Koʻtarinki ruhda oʻtkazilgan sayil nafaqat qipchoqliklar, balki butun amu elining yuksak maʼnaviyati, goʻzal fazilatlari, bir-biriga mehr-oqibatini oʻzida mujassam etdi.
Ozoda Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
