КУЮК КЎПИР ОВУЛИДА СЕКТОР РАҲБАРИ ФУҚАРОЛАР БИЛАН УЧРАШДИ

Куюк кўпир овул фуқаролар йиғинида муаммоли масалаларни ҳал қилиш бўйича қўшимча чора-тадбирлар ҳамда аҳолидан келиб тушаётган мурожаатларни кўриб чиқиш мақсадида ҳудуд бўйича сектор раҳбари – туман Ички ишлар бўлими бошлиғи Улуғбек Худойберганов фуқаролар билан учрашув ўтказди.

28 апрель куни бўлиб ўтган тадбирда сектор раҳбари билан бирга туман Халқ қабулхонаси мудири Эркин Ражабов, сектор аъзолари, фуқаролар йиғини раиси ҳоким ёрдамчиси, ёшлар етакчиси, корхона-ташкилотлар, тижорат банклари раҳбарлари ва бошқалар иштирок этдилар.

Учрашувда дастлаб сектор раҳбари, туман Ички ишлар бўлими бошлиғи Улуғбек Худойберганов сўзга чиқиб, Куюк кўпир овул фуқаролар йиғини ҳудудида истиқомат қилувчи аҳолининг турмуш тарзини янада яхшилаш, ижтимоий-иқтисодий муаммоларни ҳал қилиш энг устувор вазифалардан бири эканлигини таъкидлаб, бу борада амалга оширилаётган ишлар хусусида кенг тўхталди.

Шунингдек, туман ҳудудида вояга етмаган ва ёшлар томонидан содир этилган жиноятларнинг оқибатлари, жиноятлар содир этилишига имкон берган шарт-шароит ва омиллар хусусида гапириб, вояга етмаганлар ва ёшлар ўртасида ҳуқуқбузарлик ва жиноятларни барвақт олдини олиш борасида биргаликдаги профилактик ишларни янада кучайтириш юзасидан таклиф ҳамда тавсиялар берди. Сектор раҳбари аҳолининг сарсон-саргардон бўлишининг олдини олиш учун туман даражасида ечиладиган муаммоларни шу ернинг ўзида ҳоким ёрдамчилари ва ёшлар етакчилари билан биргаликда ҳал этиш лозимлигини таъкидлаб ўтди.

Ундан ташқари, учрашувда мамлакатимизда тадбиркорликни ривожлантириш, аҳоли бандлигини таъминлаш, камбағалликни қисқартириш, “Темир дафтар” ва “Аёллар дафтари” билан ишлаш, “Ёшлар дафтари” ва ёшлар дастурларини шакллантириб, уларнинг ижросини таъминлаш, маҳалладаги ҳар бир ёш билан манзилли ишлаб, уларнинг муаммоларини ҳал этиш, ёшларнинг бўш вақтини мазмунли ташкил этиш сингари муҳим вазифаларни бажаришдаги аҳамияти ҳақида ҳам сўз юритилди.

Шундан сўнг, мутасаддилар билан биргаликда фуқароларнинг мурожаатлари тингланди. Фуқаролар асосан, оқова сув, кўчаларни асфальт қилиш, шағал ётқизиш ва электр таъминоти, ишга жойлашиш, ижтимоий ҳимоя, тадбиркорлик фаолиятини кенгайтириш, суюлтирилган газ ҳамда кредит маблағи ажратилиши каби масалалар юзасидан мурожаатлар қилишди.

Жумладан, шу овулда яшовчи Сапарбой Аллаяров “Манғит-Гурлан” асфальт йўлининг Хитой овулига қайрилиш жойига светофор ўрнатиш, Сара Алланазарова неварасига моддий ёрдам бериш, Жасурбек Сидабуллаев 14-сонли мактабга спорт зали қуриш, Нодирбек Норимбатов “Манғит-Гурлан” асфальт йўлининг Хўжа овул аҳоли пунктига ўтиш жойига пиёдалар йўлакчаси қуриш кабилар бўйича амалий ёрдам сўрадилар.

Ушбу мурожаатларнинг барчаси тегишли мутасаддилар иштирокида бирма-бир кўриб чиқилиб, уларни ҳал этиш юзасидан мутасаддиларга аниқ ва манзилли кўрсатмалар берилди.

Учрашувда ҳудуддаги бандлик масалалари, тадбиркорликни ривожлантириш ҳамда уларни қўллаб-қувватлаш, эҳтиёжманд оилаларга ёрдам бериш масалалари ҳам муҳокама қилиниб, мавжуд муаммоларни ҳал этиш масъулларга топширилди.

О.Худойберганова.