KUYuK KOʻPIR OVULIDA SEKTOR RAHBARI FUQAROLAR BILAN UChRAShDI

Kuyuk koʻpir ovul fuqarolar yigʻinida muammoli masalalarni hal qilish boʻyicha qoʻshimcha chora-tadbirlar hamda aholidan kelib tushayotgan murojaatlarni koʻrib chiqish maqsadida hudud boʻyicha sektor rahbari – tuman Ichki ishlar boʻlimi boshligʻi Ulugʻbek Xudoyberganov fuqarolar bilan uchrashuv oʻtkazdi.

28-aprel kuni boʻlib oʻtgan tadbirda sektor rahbari bilan birga tuman Xalq qabulxonasi mudiri Erkin Rajabov, sektor aʼzolari, fuqarolar yigʻini raisi hokim yordamchisi, yoshlar yetakchisi, korxona-tashkilotlar, tijorat banklari rahbarlari va boshqalar ishtirok etdilar.

Uchrashuvda dastlab sektor rahbari, tuman Ichki ishlar boʻlimi boshligʻi Ulugʻbek Xudoyberganov soʻzga chiqib, Kuyuk koʻpir ovul fuqarolar yigʻini hududida istiqomat qiluvchi aholining turmush tarzini yanada yaxshilash, ijtimoiy-iqtisodiy muammolarni hal qilish eng ustuvor vazifalardan biri ekanligini taʼkidlab, bu borada amalga oshirilayotgan ishlar xususida keng toʻxtaldi.

Shuningdek, tuman hududida voyaga yetmagan va yoshlar tomonidan sodir etilgan jinoyatlarning oqibatlari, jinoyatlar sodir etilishiga imkon bergan shart-sharoit va omillar xususida gapirib, voyaga yetmaganlar va yoshlar oʻrtasida huquqbuzarlik va jinoyatlarni barvaqt oldini olish borasida birgalikdagi profilaktik ishlarni yanada kuchaytirish yuzasidan taklif hamda tavsiyalar berdi. Sektor rahbari aholining sarson-sargardon boʻlishining oldini olish uchun tuman darajasida yechiladigan muammolarni shu yerning oʻzida hokim yordamchilari va yoshlar yetakchilari bilan birgalikda hal etish lozimligini taʼkidlab oʻtdi.

Undan tashqari, uchrashuvda mamlakatimizda tadbirkorlikni rivojlantirish, aholi bandligini taʼminlash, kambagʻallikni qisqartirish, “Temir daftar” va “Ayollar daftari” bilan ishlash, “Yoshlar daftari” va yoshlar dasturlarini shakllantirib, ularning ijrosini taʼminlash, mahalladagi har bir yosh bilan manzilli ishlab, ularning muammolarini hal etish, yoshlarning boʻsh vaqtini mazmunli tashkil etish singari muhim vazifalarni bajarishdagi ahamiyati haqida ham soʻz yuritildi.

Shundan soʻng, mutasaddilar bilan birgalikda fuqarolarning murojaatlari tinglandi. Fuqarolar asosan, oqova suv, koʻchalarni asfalt qilish, shagʻal yotqizish va elektr taʼminoti, ishga joylashish, ijtimoiy himoya, tadbirkorlik faoliyatini kengaytirish, suyultirilgan gaz hamda kredit mablagʻi ajratilishi kabi masalalar yuzasidan murojaatlar qilishdi.

Jumladan, shu ovulda yashovchi Saparboy Allayarov “Mangʻit-Gurlan” asfalt yoʻlining Xitoy ovuliga qayrilish joyiga svetofor oʻrnatish, Sara Allanazarova nevarasiga moddiy yordam berish, Jasurbek Sidabullayev 14-sonli maktabga sport zali qurish, Nodirbek Norimbatov “Mangʻit-Gurlan” asfalt yoʻlining Xoʻja ovul aholi punktiga oʻtish joyiga piyodalar yoʻlakchasi qurish kabilar boʻyicha amaliy yordam soʻradilar.

Ushbu murojaatlarning barchasi tegishli mutasaddilar ishtirokida birma-bir koʻrib chiqilib, ularni hal etish yuzasidan mutasaddilarga aniq va manzilli koʻrsatmalar berildi.

Uchrashuvda hududdagi bandlik masalalari, tadbirkorlikni rivojlantirish hamda ularni qoʻllab-quvvatlash, ehtiyojmand oilalarga yordam berish masalalari ham muhokama qilinib, mavjud muammolarni hal etish masʼullarga topshirildi.

O.Xudoyberganova.