Чойкўл овулида «Нўғай Эшон бобо» жоме масжидининг янги биноси фойдаланишга топширилди
Амударё туманининг Чойкўл овулида халқимизнинг кўп асрлик қадриятлари, иймон-эътиқоди ва ўзаро жипслигининг тимсоли сифатида, азалдан аҳиллик ва бунёдкорликни шиор қилган овул аҳлининг холис ниятлари ва фидокорона меҳнати меваси ўлароқ «Нўғай Эшон бобо» жоме масжидининг муҳташам янги биноси қад ростлади. Ҳашар йўли билан барпо этилган ушбу масканнинг тантанали очилиш маросими нафақат ҳудуд аҳли, балки бутун туман жамоатчилиги учун чинакам маънавият байрамига айланди.
Очилиш маросимида Қорақалпоғистон Республикаси Вазирлар Кенгаши Раисининг ўринбосари Алишер Алланиязов, Қорақалпоғистон мусулмонлари қозиёти қозиси Баҳрамаддин Разов, Амударё тумани ҳокими Собир Хўжаметов ҳамда сектор раҳбарлари, нуронийлар ва кенг жамоатчилик вакиллари қатнашдилар.
Сўзга чиққанлар юртимизда қадимдан анъана бўлиб келаётган ҳашарнинг моҳиятига алоҳида тўхталдилар. Таъкидландики, ҳашар — бу шунчаки жамоавий меҳнат эмас, балки миллатнинг руҳий бирлиги, мушкулини осон қилиш йўлидаги бирдамлиги ва келажак авлодларга қолдириладиган эзгу меросдир. Айниқса, масжид каби муқаддас даргоҳларни тиклашда бу анъананинг ўрни беқиёс бўлиб, у инсонлар қалбида саховат ва фидойилик туйғуларини тарбиялашга хизмат қилади.
«Нўғай Эшон бобо» масжидининг янги иморати қурилиш жараёнида маҳалла фаолларидан тортиб, тадбиркорлар ва оддий фуқароларгача бирдек масъулият билан енг шимариб хизмат қилдилар. Кимдир моддий маблағ билан ҳисса қўшган бўлса, яна кимдир ўз қўл меҳнати, муҳандислик маҳорати ёки дуо ва эзгу тилаклари билан мазкур хайрли ишга шерик бўлди.
Очилиш маросими доирасида масжид бунёд этилишида алоҳида жонбозлик кўрсатган, туну кун меҳнат қилган қурувчилар ва саховатпеша ҳомийларга алоҳида эҳтиром кўрсатилди. Бир гуруҳ фаол фуқароларга ташкилотчилар томонидан ташаккурномалар ва эсдалик совғалари топширилди. Бу каби рағбатлантиришлар нафақат қилинган меҳнатнинг эътирофи, балки жамиятда бунёдкорлик руҳини янада кучайтиришга хизмат қилувчи муҳим омилдир.
Маросимда муқаддас Қуръони карим оятлари тиловат қилинди. Йиғилганлар юртимиз тинчлиги, осмони мусаффолиги, халқимизнинг фаровонлиги ва давлатимиз равнақини сўраб дуога қўл очишди.
«Нўғай Эшон бобо» жоме масжидининг янги биноси Чойкўл овули тарихида янги саҳифа очди. Ушбу муқаддас маскан келгуси авлодлар учун иймон-эътиқод, саховат ва бирдамлик рамзи бўлиб қолаверади. Зеро, халқ бирлашиб бунёд этган иншоотнинг умри боқий, файзи эса беқиёсдир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
