«ОНА ТАБИАТ БАҒРИДА БИР КУН» МАВЗУСИДА АМУДАРЁЛИК ЁШЛАР УЧУН ҚУЙИ АМУДАРЁ ДАВЛАТ БИОСФЕРА РЕЗЕРВАТИГА САЁҲАТ УЮШТИРИЛДИ

Атрофимизни ўраб турган жонли табиат бетакрор гўзаллиги, турфа неъматлари билан ҳаётимизга файз бағишлаб туради. Инсон ҳаёти  учун энг зарурий манба – битмас-туганмас кислород фабрикаси, кўзларимизга қувонч бағишловчи фауна ва флораси нақадар бебаҳо эканлигини англаш, бу гўзалликни бойитишга ҳисса қўшиш – нафақат ўзимиз, балки инсоният учун азалий қадриятдир. Чунки она табиатсиз биз ҳеч ким эмасмиз ва ўзимиз жонажон табиат маҳсулимиз.

Қорақалпоғистон Республикаси Экология ва атроф-муҳитни муҳофаза қилиш қўмитасининг Амударё туман бўлими томонидан ёшларнинг экологик маданиятини шакллантириш, экологик билимини ва экологияга бўлган муносабатини, меҳр-муҳаббатини кучайтириш муносабатини, меҳр-муҳаббатини кучайтириш мақсадида Қуйи Амударё давлат биосфера резерватига тез-тез саёҳатлар ташкил этилиб, атроф-муҳит муҳофазасига бағишланган тарғибот-ташвиқот тадбирлари амалга оширилиб келинмоқда.

Маълумки, Қуйи Амударё давлат биосфера резервати 2021 йил 16 сентябрда ЮНЕСКОнинг  “Инсон ва биосфера” дастури доирасида бутунжаҳон  қўриқхоналари тармоғига киритилди. Қуйи Амударё давлат биосфера резервати Амударё қуйи оқимининг шимолий қисмида, Орол денгизининг собиқ соҳили жанубий-шарқида жойлашган бўлиб, бу Марказий Осиёдаги энг йирик табиий тўқайлардан бири ҳисобланади. У глобал нуқтаи назардан йўқ бўлиб кетиш хавфи остида турган ноёб экотизмдир.

Бу ҳудуд ўсимликлар ва ҳайвонларнинг муҳим яшаш жойи  бўлиб, Ўрта Осиёнинг чўл минтақаларида энг юқори  биологик хилма-хиллиги билан ажралиб турадиган ва шунингдек, йўқолиб кетиш хавфи остида турган Бухоро кийикларининг қўриқланадиган табиий яшаш жойидир. Қорақалпоғистон Республикаси экология ва атроф-муҳитни муҳофаза қилиш қўмитасининг Амударё туман бўлими томонидан яқинда амударёлик ёшлар учун уюштирилган “Она табиат бағрида бир кун” мавзусидаги маънавий-маърифий ва экологик тарғибот-ташвиқот тадбирида бу ҳақда ёшларга мутахассислар томонидан зарур тушунча ва маълумотлар берилди.

Ёшлар Қуйи Амударё давлат биосфера резервати Қорақалпоғистон Республикасининг Беруний ва Амударё туманлари ҳудудида жойлашгани, Марказий Осиё ўрмонларининг 20 фоизи, Ўзбекистон ўрмонларининг 74 фоизи ушбу ҳудудга  тўғри келиши ҳақидаги қимматли маълумотларга эга бўлдилар.

Умумий ер майдони 69 минг гектарни ташкил этувчи мазкур биосфера резерватидаги мавжуд 419 турдаги ўсимликларнинг 2 тури, 36 турдаги ҳайвонларнинг 1 таси, 43 хил балиқ турининг 12 таси, 246 қушлар туридан 23 та си Қизил Китобга киритилгани ҳақидаги маълумотлар саёҳат иштирокчилари бўлган ёшлар қалбида атроф-муҳит, айниқса, жонли табиат билан эҳтиёткорона муносабатда бўлиш туйғусини уйғотди.

Айниқса, ёшлар Ўзбекистон Республикаси Фанлар Академияси Қорақалпоғистон бўлими, олий таълим муассасалари профессор ўқитувчилари, талабалари билан ҳамкорликда Бухоро буғуларининг популяцияси, биосфера резервати энтемофаунаси, ҳудуддаги ўсимликларнинг мониторинги, олиб борилаётган илмий тадқиқот ишларига катта қизиқиш билдирдилар.

Ёшлар жонли табиат мўъжизалари билан ошно бўлиб, Бухоро буғулари ва турфа қушлар, ўсимликлар олами билан яқиндан танишдилар. “Она табиат бағрида бир кун” мавзусида, амударёлик ёшлар иштирокида ўтказилган маънавий-маърифий ва экологик тарғибот-ташвиқот саёҳат тадбири ёшларнинг экология ва атроф-муҳит бўйича билим ва кўникмаларини оширишларида муҳим аҳамият касб этди.

Робия ЙЎЛДОШЕВА.