ФИЛОЛОГИЯ ФАНЛАРИ ДОКТОРИ, 57-СОНЛИ МАКТАБНИНГ СОБИҚ БИТИРУВЧИСИ ЎҚУВЧИЛАР БИЛАН УЧРАШДИ

Мактаб – муқаддас даргоҳ, ҳар бир инсонни илк қадам қўйган кундан бошлаб, илм дунёсига олиб кирадиган қутлуғ маскан. Бу масканда устозлар ёшларга таълим ва тарбия бериб, мустақил ҳаёт остонасига кузатиб қолишади.

Арна бўйи маҳалласидаги 57-сонли мактабда ҳам кўп йиллардан бери ёш авлодга таълим-тарбия берилиб, юртга нафи тегадиган, муносиб ва етук кадрлар етиштирилиб чиқарилмоқда. Ушбу мактабда илм ўрганган қанчадан-қанча инсонлар бугун жамиятнинг барча соҳаларида меҳнат қилиб, мамлакат иқтисодига, тараққиётига ўз ҳиссаларини қўшишмоқда.

Барча ҳудудлардаги каби мазкур мактабда ҳам бўлиб ўтган “Хайр, мактабим” тадбирига шу мактабда таҳсил олган собиқ ўқувчи, айни пайтда филология фанлари доктори даражасига етишган Ойбек Нуржонов ва Қорақалпоқ давлат университетининг  ўзбек тилшунослиги кафедраси мудири Шуҳрат Абдуллаев, доцент Кумуш Ражабовалар ташриф буюриб, ўқувчилар билан учрашишди.

Тадбирда мактаб директори Машариф Рўзметов шу мактабда таҳсил олиб учирма бўлган, ҳозирги кунда ўз ҳаёт йўлини топиб, Қорақалпоқ давлат университетининг филология факультетида талабаларга устозлик қилиш билан бирга изланишни, ўрганишни давом эттираётган, илмий нуфузга эга бўлган собиқ битирувчи Ойбек Нуржоновни ўқувчиларга яқиндан таништирди.

Айтиш жоизки, Ойбек Нуржонов 1992 йил 14 июнда Қорақалпоғистон Республикаси, Амударё туманида зиёли оиласида таваллуд топган. У 1999-2008 йилларда мазкур 57-сонли ўрта мактабда таҳсил олган. Мактабда 9-синфни тугатганидан сўнг, 2008-2011 йилларда тумандаги собиқ Сервис касб-ҳунар коллежида ҳунар ўрганган. Коллежни тугатиб, 2011-2015 йилларда Бердақ номидаги Қорақалпоқ давлат университетининг филология факультетида таҳсил олиб, ўзбек филологияси бакалавр таълим йўналишини, 2015-2017 йилларда  лингвистика, яъни ўзбек тили мутахассислиги бўйича магистратурани муваффақиятли тамомлаган.

Шундан сўнг, 2017-2020 йилларда Қорақалпоқ давлат университетининг ўзбек тилшунослиги кафедраси ўқитувчи-стажёри лавозимида, 2020 йилдан шу кунгача ўзбек тилшунослиги кафедраси ассистенти лавозимида ишлаб келмоқда.

У Қорақалпоғистон Республикасида хизмат кўрсатган фан арбоби, филология фанлари доктори, профессор Зарифбой Дўсимовнинг илмий раҳбарлигида “Қорақалпоғистондаги ўзбек шевалари этнографизмларининг антропоцентрик тавсифи” мавзусида диссертация ишини ёзиб тамомлаган.

Учрашувда сўзга чиққан Қорақалпоқ Давлат университети ўқитувчилари Ойбек Нуржоновнинг илм йўлида, таълим-тарбия борасида амалга ошираётган ишлари тўғрисида илиқ фикрлар айтиб, мактаб ўқувчилари ва айни пайтдаги битирувчиларни юртимизда ёшлар учун яратилган имкониятлар, шароитлардан унумли фойдаланишга, етук ва баркамол, комил, юрт келажагига муносиб инсонлар бўлиб вояга етишга чорлади.

Ўз навбатида собиқ битирувчи, айни пайтда филология фанлари доктори, олим Ойбек Нуржонов ҳам шу мактабда таълим олгани, ўқитувчиларидан таълим-тарбия олиб, панд-насиҳатларига амал қилиб, шу даражага етишгани ҳақида сўзлади. Шунингдек, мактабда таълим берган устозларига чин кўнгилдан миннатдорчилик билдирди ва тадбир иштирокчиларига китоблар совға қилди.

Учрашув давомида ўқувчилар олим Ойбек Нуржоновга ўзларини қизиқтирган саволлар билан мурожаат қилдилар ва батафсил жавоблар, касб танлаш танлаш бўйича маслаҳат, тавсиялар олдилар. Қизиқарли ўтган учрашув барчага манзур бўлди.

О.Худойберганова.