FILOLOGIYa FANLARI DOKTORI, 57-SONLI MAKTABNING SOBIQ BITIRUVChISI OʻQUVChILAR BILAN UChRAShDI

Maktab – muqaddas dargoh, har bir insonni ilk qadam qoʻygan kundan boshlab, ilm dunyosiga olib kiradigan qutlugʻ maskan. Bu maskanda ustozlar yoshlarga taʼlim va tarbiya berib, mustaqil hayot ostonasiga kuzatib qolishadi.

Arna boʻyi mahallasidagi 57-sonli maktabda ham koʻp yillardan beri yosh avlodga taʼlim-tarbiya berilib, yurtga nafi tegadigan, munosib va yetuk kadrlar yetishtirilib chiqarilmoqda. Ushbu maktabda ilm oʻrgangan qanchadan-qancha insonlar bugun jamiyatning barcha sohalarida mehnat qilib, mamlakat iqtisodiga, taraqqiyotiga oʻz hissalarini qoʻshishmoqda.

Barcha hududlardagi kabi mazkur maktabda ham boʻlib oʻtgan “Xayr, maktabim” tadbiriga shu maktabda tahsil olgan sobiq oʻquvchi, ayni paytda filologiya fanlari doktori darajasiga yetishgan Oybek Nurjonov va Qoraqalpoq davlat universitetining  oʻzbek tilshunosligi kafedrasi mudiri Shuhrat Abdullayev, dotsent Kumush Rajabovalar tashrif buyurib, oʻquvchilar bilan uchrashishdi.

Tadbirda maktab direktori Masharif Roʻzmetov shu maktabda tahsil olib uchirma boʻlgan, hozirgi kunda oʻz hayot yoʻlini topib, Qoraqalpoq davlat universitetining filologiya fakultetida talabalarga ustozlik qilish bilan birga izlanishni, oʻrganishni davom ettirayotgan, ilmiy nufuzga ega boʻlgan sobiq bitiruvchi Oybek Nurjonovni oʻquvchilarga yaqindan tanishtirdi.

Aytish joizki, Oybek Nurjonov 1992-yil 14-iyunda Qoraqalpogʻiston Respublikasi, Amudaryo tumanida ziyoli oilasida tavallud topgan. U 1999-2008-yillarda mazkur 57-sonli oʻrta maktabda tahsil olgan. Maktabda 9-sinfni tugatganidan soʻng, 2008-2011-yillarda tumandagi sobiq Servis kasb-hunar kollejida hunar oʻrgangan. Kollejni tugatib, 2011-2015-yillarda Berdaq nomidagi Qoraqalpoq davlat universitetining filologiya fakultetida tahsil olib, oʻzbek filologiyasi bakalavr taʼlim yoʻnalishini, 2015-2017-yillarda  lingvistika, yaʼni oʻzbek tili mutaxassisligi boʻyicha magistraturani muvaffaqiyatli tamomlagan.

Shundan soʻng, 2017-2020-yillarda Qoraqalpoq davlat universitetining oʻzbek tilshunosligi kafedrasi oʻqituvchi-stajyori lavozimida, 2020-yildan shu kungacha oʻzbek tilshunosligi kafedrasi assistenti lavozimida ishlab kelmoqda.

U Qoraqalpogʻiston Respublikasida xizmat koʻrsatgan fan arbobi, filologiya fanlari doktori, professor Zarifboy Doʻsimovning ilmiy rahbarligida “Qoraqalpogʻistondagi oʻzbek shevalari etnografizmlarining antropotsentrik tavsifi” mavzusida dissertatsiya ishini yozib tamomlagan.

Uchrashuvda soʻzga chiqqan Qoraqalpoq Davlat universiteti oʻqituvchilari Oybek Nurjonovning ilm yoʻlida, taʼlim-tarbiya borasida amalga oshirayotgan ishlari toʻgʻrisida iliq fikrlar aytib, maktab oʻquvchilari va ayni paytdagi bitiruvchilarni yurtimizda yoshlar uchun yaratilgan imkoniyatlar, sharoitlardan unumli foydalanishga, yetuk va barkamol, komil, yurt kelajagiga munosib insonlar boʻlib voyaga yetishga chorladi.

Oʻz navbatida sobiq bitiruvchi, ayni paytda filologiya fanlari doktori, olim Oybek Nurjonov ham shu maktabda taʼlim olgani, oʻqituvchilaridan taʼlim-tarbiya olib, pand-nasihatlariga amal qilib, shu darajaga yetishgani haqida soʻzladi. Shuningdek, maktabda taʼlim bergan ustozlariga chin koʻngildan minnatdorchilik bildirdi va tadbir ishtirokchilariga kitoblar sovgʻa qildi.

Uchrashuv davomida oʻquvchilar olim Oybek Nurjonovga oʻzlarini qiziqtirgan savollar bilan murojaat qildilar va batafsil javoblar, kasb tanlash tanlash boʻyicha maslahat, tavsiyalar oldilar. Qiziqarli oʻtgan uchrashuv barchaga manzur boʻldi.

O.Xudoyberganova.