АҲОЛИГА ПОЧТА АЛОҚА ХИЗМАТИ КЎРСАТИШ ЯХШИЛАНМОҚДА

Почта-алоқаси тизими бугунги кунда мамлакат ҳудудларида хат ва почта жўнатмалари билан бир қаторда товарларни етказиб бериш, банк, молия ва давлат хизматларини кўрсатиш бўйича ўз инфратузилмасига эга бўлган муҳим соҳа ҳисобланади.

«Ўзбекистон почтаси» акциядорлик жамияти мамлакатимизнинг почта-алоқаси миллий оператори сифатида республика миқёсида 2 мингга яқин почта-алоқаси объектига эга бўлиб, барча аҳоли пунктларини қамраб олган.

Ўзбекистон Республикаси Призидентининг «Почта алоқаси хизматларини кўрсатиш тизимини тубдан такомиллаштириш чора-тадбирлари тўғрисида”ги 2020 йил 14 декабрдаги Қарори ижросини таъминлаш мақсадида «Ўзбекистон почтаси» акциядорлик жамиятининг 2021 йил 6 январдаги 6-сонли буйруғи асосида Амударё тумани Почта алоқа тармоғи томонидан кенг қўламли ишлар амалга оширилмоқда.

Бугунги кунда муассасада 26 нафар мутахассис ва техник ходимлари туман аҳолисига почта-алоқа хизматини кўрсатиб келмоқда.

Айни пайтда Амударё туман Почта алоқа тармоғига қарашли шаҳар марказида 3 та жойда ҳамда туманнинг турли овулларида, хусусан Ўрта қалъа, Куюк кўпир, Хитой, Бобур номли, Чойкўл, Тўлқин, Дўрман, Қиличбой, Назархон овулларидаги бўлимларда аҳолига почта-алоқа хизматлари кўрсатилмоқда.

Ушбу бўлимлар томонидан барча турдаги тўловлар, жумладан коммунал тўловлар, жарималар, алимент тўловлари ҳамда Давлат хизматлари маркази томонидан кўрсатилаётган 33 та хизмат тури бўйича тўловларни қабул қилиш йўлга қўйилган. Шунингдек, банк пластик карталарини тўлдириш ва пул маблағларини ечиш каби хизматлар ҳам амалга оширилмоқда.

Юқоридаги Президент Қарори ижросини таъминлаш мақсадида соҳада электрон тижорат бозоридаги фаолиятни ривожлантириш бўйича маҳаллий ишлаб чиқарувчиларнинг маҳсулотларини онлайн сотиш ва мижозларга етказиб бериш имкониятини берувчи электрон савдо майдончаси ахборот тизимини яратиш ҳамда логистика марказларини ташкил этиш, товарларни сақлаш ва етказиб беришни ўз ичига олган хизматларни йўлга қўйиш ва ривожлантириш бўйича онлайн савдо майдончаси ташкил қилинди.

Шуни алоҳида қайд этиш керакки, яқин вақт ичида Қорақалпоғистон Республикасида учта – Қораўзак, Амударё ва Қўнғирот туманларининг Почта алоқа тармоғи бинолари замонавий кўринишда қайта реконструкция қилиниши кўзда тутилган.

Амударё туман Почта алоқа тармоғи биноси ва 7 та алоқа бўлимлари биноларини давлат-хусусий шериклик асосида замонавий кўринишда қайта қуриш бўйича давлат дастурига киритилган бўлиб, ушбу ишлар баажрилиши бўйича барча тегишли ҳужжатлар тайёрланиб, амалий-ташкилий ишлар бошлаб юборилди.

Қолаверса, мазкур 3 та туманлардаги Почта алоқаси корхоналарини трансформация қилиш бўйича “Йўл харитаси”га мувофиқ туманимизнинг Қиличбой, Манғит, Зарбдор алоқа бўлимлари биноларида давлат-хусусий шерикчилик шартлари асосида янгидан қуриш ва таъмирлаш ишлари амалга оширилди.

Бундан ташқари, Манғит, Чойкўл, Тўлқин, Назархон, Зарбдор, Куюккўпир, Хитой, Қиличбой, Ўрта қалъа, Дўрман Почта алоқа бўлимлари биносларини таъмирлаб, замонавий кўринишга келтириш ҳам кўзда тутилган.

Ҳозирда Чойкўл ва Назархон Почта алоқа бўлимлари биноларини давлат-хусусий шерикчилик шартлари асосида янгидан қуриш бўйича ташаббускорларни аниқлаш ишлари олиб борилмоқда. Хитой, Тўлқин алоқа бўлимлари бинолари эса ҳозирги кунда туман ҳокимлиги томонидан ажратилган маблағ ҳисобига замонавий кўринишга келтирилиб, ишга туширилди.

Амударё туман Почта алоқа тармоғи томонидан 2021-2022 йиллар давомида гибрид почта хизмати ҳам йўлга қўйилиб, барча турдаги давлат органлари ва корхоналари томонидан автомат тарзда гибрид шартномаси асосида хатларни жўнатиш ишлари тезкор ва сифатли амалга оширилмоқда.

Ўз вақтида ва сифатли хизмат кўрсатиш мақсадида Амударё туман Почта алоқа тармоғига қарашли алоқа бўлимлари почтальонлари учун 8 та велосипед, 2та скутер ажратилиб, Почта алоқа операторлари 11 дона онлайн касса аппаратлари билан таъминланган.

Хулоса қилиб айтганда, халқимизга замон талаблари асосида почта-алоқа хизматлари кўрсатиш, электрон тижорат бозоридаги фаолиятни ривожлантириш, маҳаллий ишлаб чиқарувчиларнинг маҳсулотларини онлайн сотиш ва мижозларга етказиб берувчи электрон савдо майдончаси ахборот тизимини яратиш ҳамда логистика марказларини ташкил этиш, товарларни сақлаш ва етказиб беришни ўз ичига олган хизматларни йўлга қўйиш ва ривожлантириш бўйича онлайн савдо майдончасини ташкил этиш ҳамда халқимизга қулайликлар яратиш – Амударё туман Почта алоқа тармоғи ходимларининг бош мақсадидир.

Ш.Гаипов, Амударё туман Почта алоқа тармоғи бошлиғи.