“ҚОРАДОРИ – 2022” ТАДБИРИДА ТОМОРҚАДАГИ “ЗАҲРИ ҚОТИЛ” ФОШ ЭТИЛДИ

Гиёҳвандлик сўнгги даврларда инсониятга ташвиш келтираётган иллатлардан бирига айланди. У нафақат инсон саломатлиги, камолотига, балки жамият тараққиёти, ривожланишига ҳам салбий таъсир кўрсатади. Гиёҳвандга айланган одам бутун борлиқни унутади. Соғлигини йўқотиб, яқинларини қаттиқ ташвишга қўяди.

Қўлида бинойидек иши бор, рўзғорини ҳеч кимникидан кам қилмай эплаб келаётган З.А. қўшни Туркманистондаги қариндошиникига борганида шу “заҳри қотил”ни татиб кўрди-ю, тез-тез қўмсайдиган бўлди.

Ўша қариндошидан олиб келган ўсимлик уруғини ўз томорқасига экиб кўрди. Пишиб етилгунича яхшилаб парваришлади ва керак пайтида тайёрлаб, истеъмол қила бошлади.

Аммо бу узоққа бормади. Шу ҳудудда туман ДХХ ва ИИБ ходимлари томонидан ўтказилган “Қорадори – 2022” тадбири давомида ушбу хонадон томорқасининг 2 кв/м қисмида 4 туп марихуана гиёҳвандлик воситасига ўхшаш ўткир ҳидли ўсимлик етиштирлаётгани аниқланди. Ушбу ўсимлик текширувдан ўтказилганида унинг каннабис ўсимлиги эканлиги ва соф оғирлиги 267 граммдан оғир эканлиги маълум бўлди.

Бундан ташқари, тадбир давомида З.А.нинг хонадони ва қўшимча хўжалик хоналари кўздан кечирилганида молхонасидан 3 дона 1 литр ҳажмдаги шиша банкада ва 1 дона қоғозга ўралган ҳолда ўткир ҳидли, яшил рангли қуритилган марихуана гиёҳвандлик воситаси ҳам топилиб, ашёвий далил сифатида олиб кетилди.

Айбига тўла иқрор бўлган З.А. бели оғриганида уларни истеъмол қилиб келаётганини, ўзи учун етиштириб, сақлаб келаётганини айтиб, яна 1 дона 0,5 литр ҳажмдаги “Жеско” ёзувли, оғзига фальга қоғоз ўралган баклажка ва 2 бўлак куйдирилган фальга қоғозларни ҳам топширди.

Ушбу олинган ашёвий далиллар текшириб кўрилганида ҳақиқатан ҳам таркибида гиёҳванд моддалар мавжуд бўлган ўсимлик эканлиги ва З.А.нинг гиёҳвандлик хасталигига чалингани маълум бўлди.

Бел оғирғини баҳона қилиб, ўз дардини ўзи оғирлаштирган З.А. қонунга хилоф йўл тутгани учун жазога тортилди.

Расул Назаров, Жиноят ишлари бўйича Шуманай тумани суди раиси.