“САЙЁР КИТОБЛАР КАРВОНИ” ТАДБИРИДА ЁШЛАР ҚИЗИҚАРЛИ АДАБИЁТЛАР БИЛАН ТАНИШДИЛАР

 “Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари” грант лойиҳаси доирасида туманимизнинг барча ҳудудларида ёшлар ўртасида маърифий-тарбиявий тадбирлар ташкил этилиб, уларнинг бўш вақтлари мазмунли ўтказилмоқда. Айниқса, китобхонликка даъват этиш мақсадидаги “Китоб сайиллари”, “Энг яхши совға – китоб”, “Фарзандимга китоб совға қиламан” акциялари китобхон ёшларнинг қизиқишларини, сафини оширмоқда.

11 март куни ушбу грант лойиҳаси иш режасига кўра Манғит шаҳридаги 16-сонли умумтаълим мактабида “Сайёр китоблар карвони” тадбири ташкил этилди. Тадбирда “Тараққиёт кўзгуси” газетаси таҳририяти ходимлари, мактабнинг она тили ва адабиёт фани ўқитувчиси Гулсара Ёдгорова ҳамда юқори синф ўқувчилари иштирок этишди.

Дастлаб таҳририят ходимлари томонидан амалга оширилаётган “Билимли ва маънавиятли ёшлар билан – Учинчи Ренессанс сари” номли грант лойиҳаси мазмун-моҳияти, мақсади ва режалари, режаларга кўра ўтказилаётган тадбирлар, уларнинг самараси хусусида батафсил маълумотлар берилди.

Таъкидлаб ўтилганидек, ушбу лойиҳани амалга ошириш орқали ёшларни илм олиш ва юксак маънавиятли бўлишга даъват этиш, билимли ва ташаббускор ёшларни тенгдошларига ўрнак қилиб кўрсатиш, шу кабилар орқали уларнинг сафини янада кенгайтириш мақсад қилинган. Бугунги даврдаги глобаллашув жараёнида ёшларни билимли, маънавиятли қилиб тарбиялашда китобларнинг, китобхонликнинг аҳамияти катта бўлганлиги сабабли, лойиҳа доирасида ёшларга китобнинг афзаллиги тушунтирилмоқда.

Тадбир давомида лойиҳа ижрочилари китобхонликнинг аҳамияти ҳақида кенг тушунчалар бериб, кўп китоб ўқиган кишида юксак инсоний фазилатлар – муомала маданияти, мушоҳада, дунёқараш кенглиги, билимдонлик, юриш-туриш, кийиниш одоби, ўзгалар фикрига ҳурмат билан қараш, тинглаш маданияти сезилиб туришини алоҳида эътироф этишди. Шунингдек, кейинги йилларда Президентимиз ташаббуси билан китобхонлик, китоб нашр қилиш, кутубхоналарни кўпайтириш, уларни босма ва электрон адабиётлар билан тўлдириш давлат сиёсати, маданий ҳаётимизнинг ажралмас қисмига айлангани, бу ўз натижаларини кўрсата бошлаганини айтиб ўтди.

Ўқувчи-ёшларга китобларнинг билимлар калити эканлиги, ҳеч бир ахборот воситаси, кино ёки видеофильм бадиий асар ўрнини босолмаслиги, телевидение ва радио, замонавий компьютерлар имконияти ва афзалликлари кўп бўлишига қарамасдан ҳеч бири китобнинг ўрнини боса олмаслиги, айниқса, бадиий китоблар ҳар бир кишида инсоний фазилатларини кучайтириши, дунёқарашини кенгайтириши батафсил тушунтирилди.

Мактабнинг она тили ва адабиёт фани ўқитувчиси Гулсара Ёдгорова ҳам “Энг ёш китобхон”, “Китобхон оила”, “Ким кўп китоб ўқиган?” каби танловларни ўтказиш анъанага айлангани, ғолиблар муносиб тақдирланаётгани, китобхонлик жамиятнинг барча қатламларини қамраб олаётгани, китоб ўқишга, билимга ташна ёшларимиз халқаро фан олимпиадаларида фахрли ўринларни эгаллашаётгани ҳақида сўз юритди.

Тадбирда ўқувчилар грант лойиҳаси ижрочилари томонидан келтирилган китоблар билан танишиб, таҳририят қошидаги кутубхонага аъзо бўлишга қизиқиш билдиришди. Уларга кутубхонадаги бошқа китоблар тўғрисида маълумотлар бериш билан бирга аъзо бўлиш ва китобларни олиб туриш тартиби кенг тушунтирилди.

“Тараққиёт кўзгуси” газетаси таҳририятининг “Билимли ва маънавиятли ёшлар билан – Учинчи Ренессанс сари” грант лойиҳаси доирасида ўтказилган “Сайёр китоблар карвони” тадбири ўқувчи-ёшларга жуда манзур бўлди.

О.Худойберганова.