“SAYYoR KITOBLAR KARVONI” TADBIRIDA YoShLAR QIZIQARLI ADABIYoTLAR BILAN TANIShDILAR

 “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” grant loyihasi doirasida tumanimizning barcha hududlarida yoshlar oʻrtasida maʼrifiy-tarbiyaviy tadbirlar tashkil etilib, ularning boʻsh vaqtlari mazmunli oʻtkazilmoqda. Ayniqsa, kitobxonlikka daʼvat etish maqsadidagi “Kitob sayillari”, “Eng yaxshi sovgʻa – kitob”, “Farzandimga kitob sovgʻa qilaman” aktsiyalari kitobxon yoshlarning qiziqishlarini, safini oshirmoqda.

11-mart kuni ushbu grant loyihasi ish rejasiga koʻra Mangʻit shahridagi 16-sonli umumtaʼlim maktabida “Sayyor kitoblar karvoni” tadbiri tashkil etildi. Tadbirda “Taraqqiyot koʻzgusi” gazetasi tahririyati xodimlari, maktabning ona tili va adabiyot fani oʻqituvchisi Gulsara Yodgorova hamda yuqori sinf oʻquvchilari ishtirok etishdi.

Dastlab tahririyat xodimlari tomonidan amalga oshirilayotgan “Bilimli va maʼnaviyatli yoshlar bilan – Uchinchi Renessans sari” nomli grant loyihasi mazmun-mohiyati, maqsadi va rejalari, rejalarga koʻra oʻtkazilayotgan tadbirlar, ularning samarasi xususida batafsil maʼlumotlar berildi.

Taʼkidlab oʻtilganidek, ushbu loyihani amalga oshirish orqali yoshlarni ilm olish va yuksak maʼnaviyatli boʻlishga daʼvat etish, bilimli va tashabbuskor yoshlarni tengdoshlariga oʻrnak qilib koʻrsatish, shu kabilar orqali ularning safini yanada kengaytirish maqsad qilingan. Bugungi davrdagi globallashuv jarayonida yoshlarni bilimli, maʼnaviyatli qilib tarbiyalashda kitoblarning, kitobxonlikning ahamiyati katta boʻlganligi sababli, loyiha doirasida yoshlarga kitobning afzalligi tushuntirilmoqda.

Tadbir davomida loyiha ijrochilari kitobxonlikning ahamiyati haqida keng tushunchalar berib, koʻp kitob oʻqigan kishida yuksak insoniy fazilatlar – muomala madaniyati, mushohada, dunyoqarash kengligi, bilimdonlik, yurish-turish, kiyinish odobi, oʻzgalar fikriga hurmat bilan qarash, tinglash madaniyati sezilib turishini alohida eʼtirof etishdi. Shuningdek, keyingi yillarda Prezidentimiz tashabbusi bilan kitobxonlik, kitob nashr qilish, kutubxonalarni koʻpaytirish, ularni bosma va elektron adabiyotlar bilan toʻldirish davlat siyosati, madaniy hayotimizning ajralmas qismiga aylangani, bu oʻz natijalarini koʻrsata boshlaganini aytib oʻtdi.

Oʻquvchi-yoshlarga kitoblarning bilimlar kaliti ekanligi, hech bir axborot vositasi, kino yoki videofilm badiiy asar oʻrnini bosolmasligi, televideniye va radio, zamonaviy kompyuterlar imkoniyati va afzalliklari koʻp boʻlishiga qaramasdan hech biri kitobning oʻrnini bosa olmasligi, ayniqsa, badiiy kitoblar har bir kishida insoniy fazilatlarini kuchaytirishi, dunyoqarashini kengaytirishi batafsil tushuntirildi.

Maktabning ona tili va adabiyot fani oʻqituvchisi Gulsara Yodgorova ham “Eng yosh kitobxon”, “Kitobxon oila”, “Kim koʻp kitob oʻqigan?” kabi tanlovlarni oʻtkazish anʼanaga aylangani, gʻoliblar munosib taqdirlanayotgani, kitobxonlik jamiyatning barcha qatlamlarini qamrab olayotgani, kitob oʻqishga, bilimga tashna yoshlarimiz xalqaro fan olimpiadalarida faxrli oʻrinlarni egallashayotgani haqida soʻz yuritdi.

Tadbirda oʻquvchilar grant loyihasi ijrochilari tomonidan keltirilgan kitoblar bilan tanishib, tahririyat qoshidagi kutubxonaga aʼzo boʻlishga qiziqish bildirishdi. Ularga kutubxonadagi boshqa kitoblar toʻgʻrisida maʼlumotlar berish bilan birga aʼzo boʻlish va kitoblarni olib turish tartibi keng tushuntirildi.

“Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan – Uchinchi Renessans sari” grant loyihasi doirasida oʻtkazilgan “Sayyor kitoblar karvoni” tadbiri oʻquvchi-yoshlarga juda manzur boʻldi.

O.Xudoyberganova.