Рейд тадбирида ноқонуний сув истеъмолига чек қўйилиб, қоидабузарларга жарима қўлланилди
Иқлим ўзгариши ва сув танқислиги шароитида аҳолини тоза ва сифатли ичимлик суви билан таъминлаш масаласи ҳар қачонгидан ҳам муҳим аҳамият касб этмоқда. Давлатимиз томонидан соҳага йўналтирилаётган катта ҳажмдаги инвестициялар, янгиланаётган тармоқлар ва иншоотлар аҳоли фаровонлигини оширишга хизмат қилмоқда.
Бироқ, яратилаётган шароитларга қарамасдан, жойларда ичимлик суви тармоқларига ўзбошимчалик билан уланиш, сувдан ноқонуний ва исрофгарчилик билан фойдаланиш ҳолатлари учраб тураётгани ачинарли ҳолдир. Бу каби қонунбузарликлар нафақат тизимнинг барқарор ишлашига салбий таъсир кўрсатади, балки сув босимининг пасайишига ва ҳалол истеъмолчиларнинг ҳақли эътирозларига сабаб бўлмоқда. Шу боис, соҳада назоратни кучайтириш, ноқонуний уланишларни аниқлаш ва бартараф этиш мақсадида мутасадди ташкилотлар томонидан мунтазам равишда назорат-рейд тадбирлари ўтказиб келинмоқда.
Амударё туманида ўтказилган навбатдаги қўшма рейд тадбири ҳам айнан сув ресурсларидан оқилона фойдаланишни таъминлашга қаратилди. Мазкур тадбир Қорақалпоғистон Республикаси Қурилиш ва уй-жой коммунал хўжалиги соҳасида ҳудудий назорат қилиш инспекцияси, “Қорақалпоқ сув таъминоти” акциядорлик жамияти ҳамда Қорақалпоғистон Республикаси прокуратурасининг қўшма қарорига асосан ташкил этилди.
Ишчи гуруҳ томонидан туманнинг Бўстон маҳалласи ҳудудидаги хонадонлар ва тадбиркорлик субъектларида ичимлик суви ҳамда оқова сув тармоқларидан фойдаланиш ҳолати ўрганилди. Текширувлар давомида афсуски, белгиланган тартиб-қоидаларни қўпол равишда бузиб, тармоққа ноқонуний равишда уланганлик ҳолатлари фош этилди. Хусусан, рейд давомида икки нафар фуқаронинг ҳеч қандай рухсатномасиз, техник шартларга амал қилмаган ҳолда ичимлик суви тармоқларига ўзбошимчалик билан уланиб олганлиги аниқланди.
Аниқланган қонунбузилиш ҳолатлари юзасидан жойида тегишли ҳужжатлар расмийлаштирилиб, айбдорларга нисбатан қонуний чоралар кўрилди. Ўзбекистон Республикаси Маъмурий жавобгарлик тўғрисидаги кодекснинг 163-моддаси 1-қисмига мувофиқ, ушбу икки нафар фуқарога нисбатан жами 8 миллион 240 минг сўм миқдорида жарима жазоси тайинланди.
Таъкидлаш жоизки, Маъмурий жавобгарлик тўғрисидаги кодекснинг ушбу моддаси водопровод ва канализация тармоқларидан фойдаланиш қоидаларини бузишни назарда тутади ва бу қилмиш жиддий моддий жавобгарликка сабаб бўлади. Ўтказилган бу каби тадбирлардан кўзланган асосий мақсад фақатгина аҳолини жаримага тортиш эмас, балки жамиятда қонун устуворлигини таъминлаш, сувнинг қадрига етиш ва истеъмол маданиятини шакллантиришдан иборатдир.
Мутахассисларнинг огоҳлантиришича, ўзбошимчалик билан тармоққа уланиш оқибатида сув қувурлари шикастланиши, тизимда авария ҳолатлари кўпайиши ва ичимлик сувининг ифлосланиш хавфи юзага келиши мумкин. Шу сабабли, “Қорақалпоқ сув таъминоти” акциядорлик жамияти ва назорат органлари барча фуқароларни ичимлик сувидан қонуний асосда, шартнома тузган ҳолда фойдаланишга, тўловларни ўз вақтида амалга оширишга чақиради.
Амударё туманида бундай назорат тадбирлари давом эттирилмоқда ва ҳар бир ноқонуний ҳаракатга нисбатан қонуний жазо муқаррарлиги таъминланади. Унутманг, сувни тежаш ва ундан оқилона фойдаланиш – келажак авлодлар олдидаги бурчимиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
