Reyd tadbirida noqonuniy suv isteʼmoliga chek qoʻyilib, qoidabuzarlarga jarima qoʻllanildi
Iqlim oʻzgarishi va suv tanqisligi sharoitida aholini toza va sifatli ichimlik suvi bilan taʼminlash masalasi har qachongidan ham muhim ahamiyat kasb etmoqda. Davlatimiz tomonidan sohaga yoʻnaltirilayotgan katta hajmdagi investitsiyalar, yangilanayotgan tarmoqlar va inshootlar aholi farovonligini oshirishga xizmat qilmoqda.
Biroq, yaratilayotgan sharoitlarga qaramasdan, joylarda ichimlik suvi tarmoqlariga oʻzboshimchalik bilan ulanish, suvdan noqonuniy va isrofgarchilik bilan foydalanish holatlari uchrab turayotgani achinarli holdir. Bu kabi qonunbuzarliklar nafaqat tizimning barqaror ishlashiga salbiy taʼsir koʻrsatadi, balki suv bosimining pasayishiga va halol isteʼmolchilarning haqli eʼtirozlariga sabab boʻlmoqda. Shu bois, sohada nazoratni kuchaytirish, noqonuniy ulanishlarni aniqlash va bartaraf etish maqsadida mutasaddi tashkilotlar tomonidan muntazam ravishda nazorat-reyd tadbirlari oʻtkazib kelinmoqda.
Amudaryo tumanida oʻtkazilgan navbatdagi qoʻshma reyd tadbiri ham aynan suv resurslaridan oqilona foydalanishni taʼminlashga qaratildi. Mazkur tadbir Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat qilish inspektsiyasi, “Qoraqalpoq suv taʼminoti” aktsiyadorlik jamiyati hamda Qoraqalpogʻiston Respublikasi prokuraturasining qoʻshma qaroriga asosan tashkil etildi.
Ishchi guruh tomonidan tumanning Boʻston mahallasi hududidagi xonadonlar va tadbirkorlik subʼektlarida ichimlik suvi hamda oqova suv tarmoqlaridan foydalanish holati oʻrganildi. Tekshiruvlar davomida afsuski, belgilangan tartib-qoidalarni qoʻpol ravishda buzib, tarmoqqa noqonuniy ravishda ulanganlik holatlari fosh etildi. Xususan, reyd davomida ikki nafar fuqaroning hech qanday ruxsatnomasiz, texnik shartlarga amal qilmagan holda ichimlik suvi tarmoqlariga oʻzboshimchalik bilan ulanib olganligi aniqlandi.
Aniqlangan qonunbuzilish holatlari yuzasidan joyida tegishli hujjatlar rasmiylashtirilib, aybdorlarga nisbatan qonuniy choralar koʻrildi. Oʻzbekiston Respublikasi Maʼmuriy javobgarlik toʻgʻrisidagi kodeksning 163-moddasi 1-qismiga muvofiq, ushbu ikki nafar fuqaroga nisbatan jami 8 million 240 ming soʻm miqdorida jarima jazosi tayinlandi.
Taʼkidlash joizki, Maʼmuriy javobgarlik toʻgʻrisidagi kodeksning ushbu moddasi vodoprovod va kanalizatsiya tarmoqlaridan foydalanish qoidalarini buzishni nazarda tutadi va bu qilmish jiddiy moddiy javobgarlikka sabab boʻladi. Oʻtkazilgan bu kabi tadbirlardan koʻzlangan asosiy maqsad faqatgina aholini jarimaga tortish emas, balki jamiyatda qonun ustuvorligini taʼminlash, suvning qadriga yetish va isteʼmol madaniyatini shakllantirishdan iboratdir.
Mutaxassislarning ogohlantirishicha, oʻzboshimchalik bilan tarmoqqa ulanish oqibatida suv quvurlari shikastlanishi, tizimda avariya holatlari koʻpayishi va ichimlik suvining ifloslanish xavfi yuzaga kelishi mumkin. Shu sababli, “Qoraqalpoq suv taʼminoti” aktsiyadorlik jamiyati va nazorat organlari barcha fuqarolarni ichimlik suvidan qonuniy asosda, shartnoma tuzgan holda foydalanishga, toʻlovlarni oʻz vaqtida amalga oshirishga chaqiradi.
Amudaryo tumanida bunday nazorat tadbirlari davom ettirilmoqda va har bir noqonuniy harakatga nisbatan qonuniy jazo muqarrarligi taʼminlanadi. Unutmang, suvni tejash va undan oqilona foydalanish – kelajak avlodlar oldidagi burchimizdir.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
