ҲАЁТИМДА НУРЛИ КУНЛАР КЎП

Мен жорий йилнинг кўкламида 80 ёшга тўлдим. Болалигимдан мусиқа чалиш, ашула айтишга кўнглимда кучли ихлос борлиги сабабли санъат ҳаётимнинг мазмунига айланган, десам лоф бўлмас. Ўқувчилик давримдан мусиқа фанидан дарс берган устозим Усмон ака Аҳмедовдан мусиқа асбобларини чалиш, ашула айтиш бўйича сабоқлар олиб, аввал мактабимиздаги байрам тадбирларида саҳнага чиққан бўлсам, мактабни тугатган йилим Бердақ номидаги ашула ва рақс ансамблининг туманда очилган филиалига ишга кириб, халқимизга хизмат қилишни бошлаганман.

Маданият, санъат соҳасида ишлаб, таниқли санъаткорлар билан ҳамнафас бўлдим, кўпгина нуфузли саҳналарда қўшиқ айтдим. Ҳаётимда нурли излар қолдирган кунларим кўп бўлди. Қорақалпоғистоннинг машҳур санъаткорлари қаторида 1972 йилда Югославия давлатида бўлиб, томошалар қўйдик. “Ўзбекистон халқ таълими аълочиси”, “Қорақалпоғистонда хизмат кўрсатган маданият ходими” унвонларига сазовор бўлдим.

Туман Маданият бўлимига раҳбарлик қилган даврларимда туманда бадиий ҳаваскорликни ривожлантиришга жуда катта эътибор қаратган эдим. Бу борадаги саъй-ҳаракатларим натижасида тумандаги иккита бадиий жамоага Ўзбекистон Республикаси Маданият вазирлиги қарорига асосан “Халқ ансамбли” мақоми берилди.

Ўтган  ҳаётимни сарҳисоб қилсам, кўнглимни нурга тўлдирадиган бунингдек қувончли воқеалар кўп. Бироқ оиланг бағрида, меҳнат фаолиятидан ташқари ҳолатингда ҳам раҳбарлар йўқлашса, аввал қилган меҳнатларингни эътироф этишса, бунинг хурсандчилиги ўзгача бўлар экан. Буни мен жорий йилда I даражали “Меҳнат фахрийси” кўкрак нишони билан тақдирланганимда чуқур ҳис қилдим. Яқин-да Қорақалпоғистон Республикаси Маҳалла ва нуронийларни қўллаб-қувватлаш вазири ўринбосари, “Нуроний” жамғармаси раиси Турсунбой Абдужабборов уйимга келиб, мазкур нишонни кўксимга тақиб, совғалар ҳадя этди.

Бу мустақил диёримизда инсон шаъни, қадр-қиммати эъзозланаётганининг, инсон омилига эътибор  кучаяётганининг самараси, деб ўйлайман. Бу, албатта, истиқлол шарофати.

Бутун туманимиз аҳолисини энг улуғ, энг азиз байрамимиз билан қутлайман.

Гулмирза НУРМАТОВ,

I даражали “Меҳнат фахрийси” кўкрак нишони соҳиби.