HAYoTIMDA NURLI KUNLAR KOʻP
Men joriy yilning koʻklamida 80 yoshga toʻldim. Bolaligimdan musiqa chalish, ashula aytishga koʻnglimda kuchli ixlos borligi sababli sanʼat hayotimning mazmuniga aylangan, desam lof boʻlmas. Oʻquvchilik davrimdan musiqa fanidan dars bergan ustozim Usmon aka Ahmedovdan musiqa asboblarini chalish, ashula aytish boʻyicha saboqlar olib, avval maktabimizdagi bayram tadbirlarida sahnaga chiqqan boʻlsam, maktabni tugatgan yilim Berdaq nomidagi ashula va raqs ansamblining tumanda ochilgan filialiga ishga kirib, xalqimizga xizmat qilishni boshlaganman.
Madaniyat, sanʼat sohasida ishlab, taniqli sanʼatkorlar bilan hamnafas boʻldim, koʻpgina nufuzli sahnalarda qoʻshiq aytdim. Hayotimda nurli izlar qoldirgan kunlarim koʻp boʻldi. Qoraqalpogʻistonning mashhur sanʼatkorlari qatorida 1972-yilda Yugoslaviya davlatida boʻlib, tomoshalar qoʻydik. “Oʻzbekiston xalq taʼlimi aʼlochisi”, “Qoraqalpogʻistonda xizmat koʻrsatgan madaniyat xodimi” unvonlariga sazovor boʻldim.
Tuman Madaniyat boʻlimiga rahbarlik qilgan davrlarimda tumanda badiiy havaskorlikni rivojlantirishga juda katta eʼtibor qaratgan edim. Bu boradagi saʼy-harakatlarim natijasida tumandagi ikkita badiiy jamoaga Oʻzbekiston Respublikasi Madaniyat vazirligi qaroriga asosan “Xalq ansambli” maqomi berildi.
Oʻtgan hayotimni sarhisob qilsam, koʻnglimni nurga toʻldiradigan buningdek quvonchli voqealar koʻp. Biroq oilang bagʻrida, mehnat faoliyatidan tashqari holatingda ham rahbarlar yoʻqlashsa, avval qilgan mehnatlaringni eʼtirof etishsa, buning xursandchiligi oʻzgacha boʻlar ekan. Buni men joriy yilda I darajali “Mehnat faxriysi” koʻkrak nishoni bilan taqdirlanganimda chuqur his qildim. Yaqin-da Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari, “Nuroniy” jamgʻarmasi raisi Tursunboy Abdujabborov uyimga kelib, mazkur nishonni koʻksimga taqib, sovgʻalar hadya etdi.
Bu mustaqil diyorimizda inson shaʼni, qadr-qimmati eʼzozlanayotganining, inson omiliga eʼtibor kuchayayotganining samarasi, deb oʻylayman. Bu, albatta, istiqlol sharofati.
Butun tumanimiz aholisini eng ulugʻ, eng aziz bayramimiz bilan qutlayman.
Gulmirza NURMATOV,
I darajali “Mehnat faxriysi” koʻkrak nishoni sohibi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
