Qoraqalpogʻiston Respublikasi Adliya vazirligining 2025-yildagi faoliyati yakunlari boʻyicha matbuot anjumani oʻtkazildi

Mamlakatimizda amalga oshirilayotgan keng koʻlamli huquqiy islohotlarning tub mohiyati inson huquq va erkinliklarini himoya qilish, davlat organlari faoliyatida qonuniylikni taʼminlash hamda aholiga koʻrsatilayotgan davlat xizmatlari sifatini yangi bosqichga koʻtarishga qaratilgan. Yagona davlat huquqiy siyosatini amalga oshiruvchi asosiy idora sifatida Adliya vazirligi zimmasiga bu borada ulkan masʼuliyat yuklangan. 23-yanvar kuni Qoraqalpogʻiston Respublikasi adliya vaziriligi tomonidan 2025-yil davomida amalga oshirilgan ishlar yuzasidan oʻtkazilgan matbuot anjumani ham oʻtgan davr mobaynida sohada erishilgan natijalar va yoʻl qoʻyilgan kamchiliklarni tahlil qilish, kelgusi rejalarni belgilab olishda muhim ahamiyat kasb etdi. Matbuot anjumanida Qoraqalpogʻistonda faoliyat yuritayotgan ommaviy axborot vositalari vakillari va jurnalistlar qatnashdilar.

Qoraqalpogʻiston Respublikasi adliya vazirining birinchi oʻrinbosari Amangeldi Prenov taʼkidlaganidek, hisobot davrida vazirlik tomonidan eng avvalo, fuqarolarning buzilgan huquqlarini tiklash masalasiga ustuvor ahamiyat qaratilgan. Raqamlarga murojaat qiladigan boʻlsak, 2025-yil davomida jismoniy va yuridik shaxslardan vazirlik va uning quyi tizimlariga jami 5 ming 45 ta murojaat kelib tushgan. Eʼtiborlisi, ushbu murojaatlarning 2 ming 779 tasi, yaʼni 55 foizi qanoatlantirilib, fuqarolarning huquqlari tiklanishiga erishilgan.

Tahlillar shuni koʻrsatmoqdaki, aholini koʻproq mehnat munosabatlari, uy-joy masalalari, ijtimoiy himoya va davlat xizmatlarini koʻrsatish bilan bogʻliq muammolar tashvishga solmoqda. Shuningdek, oʻtgan yil davomida fuqarolar manfaatini koʻzlab sudlarga kiritilgan 13 ming 161 ta daʼvo arizalari natijasida 7 milliard 151 million soʻmdan ortiq mablagʻ undirib berilgan.

Vazirlik faoliyatining yana bir muhim yoʻnalishi – bu davlat organlari va tashkilotlarida qonunchilik ijrosini nazorat qilishdir. Vazirlik tomonidan amalga oshirilgan monitoringlar va oʻtkazilgan tekshirishlar natijasida davlat idoralarida 45 mingdan ortiq qonun buzilish holatlari aniqlangan. Ushbu qonun buzilishi holatlarini bartaraf etish boʻyicha tegishli muassasa, idora va tashkilotlarga 1217 ta taklif, 317 ta ogohlantirish kiritildi. Aniqlangan kamchiliklarni bartaraf etish yuzasidan kiritilgan taqdimnomalar asosida aholiga 23 milliard 391 million soʻmlik mablagʻlar qaytarilgan. Shu bilan birga, oʻz vazifasiga sovuqqonlik bilan qaragan 789 nafar mansabdor shaxs maʼmuriy javobgarlikka tortilgan. Ushbu raqamning oʻziyoq joylarda hali-hanuz qonunchilikka rioya qilishda masʼuliyatsizlik holatlari uchrayotganidan dalolat beradi.

Aholiga qulaylik yaratish, ortiqcha ovoragarchiliklarning oldini olish maqsadida davlat xizmatlari koʻrsatish tizimi ham tubdan takomillashtirilmoqda. 2025-yilda Davlat xizmatlari markazlari orqali 1 million 133 mingdan ortiq xizmat koʻrsatilgani, shundan 410 mingtasi onlayn tarzda amalga oshirilgani raqamlashtirish jarayonining jadallashganini koʻrsatadi. Infratuzilmani yaxshilash maqsadida Nukus shahri va 17 ta tumanda zamonaviy markaz binolari foydalanishga topshirildi. Shuningdek, Fuqarolik holati dalolatnomalarini yozish boʻlimlari arxivlaridagi 3 million 700 mingdan ortiq hujjatlarning raqamlashtirilishi fuqarolarga hujjat olishda tezkorlikni taʼminlashga xizmat qilmoqda.

Yuridik xizmat koʻrsatish sohasidagi islohotlar ham eʼtiborga molik. Xususan, tuman va shahar adliya boʻlimlari huzurida tashkil etilgan 17 ta Yuridik xizmat koʻrsatish markazi bugungi kunda maktablar, bogʻchalar va poliklinikalar kabi ijtimoiy soha obʼektlariga sifatli huquqiy xizmat koʻrsatmoqda. Bu esa byudjet tashkilotlarida qonun buzilishlarining oldini olishda muhim omil boʻlmoqda. Bundan tashqari, aholining huquqiy savodxonligini oshirish maqsadida 51 mingdan ortiq targʻibot tadbirlari oʻtkazilgani jamiyatda huquqiy madaniyatni yuksaltirishga xizmat qiladi.

Xulosa qilib aytganda, 2025-yilda amalga oshirilgan ishlar vazirlik jamoasining "Inson qadri uchun" tamoyili asosida, masʼuliyat bilan faoliyat yuritganidan dalolat beradi.